11 ¹Дараа нь наамат хүн Зофар хариулан,
²-Олон үг хариулагдалгүй урсаж,
чалчаа хүн зөвтгөгдөх ёстой юу?
³Чиний бардам үгс хүмүүсийг дуугүй болгох ёстой юу?
Чи хэнд ч зэмлүүлэлгүйгээр тохуурхах ёстой юу?
⁴Учир нь чи “Миний сургаал бол цэвэр бөгөөд
би та нарын нүдэнд гэмгүй билээ” гэж хэлсэн юм.
⁵Харин Бурхан ярьж,
чиний эсрэг Өөрийн уруулыг нээж,
⁶чамд мэргэн ухааны нууцуудыг үзүүлдэг ч болоосой!
Учир нь жинхэнэ мэргэн ухаан хоёр талтай юм.
Тэгвэл Бурхан чиний гэм буруугийн нэг хэсгийг мартдаг болохыг мэдтүгэй.

⁷Чи судалснаараа Бурханы гүнийг олж чадах уу?
Эсвэл чи Төгс Хүчит Нэгэний хязгаарыг олж чадах уу?
⁸Тэдгээр нь тэнгэрээс ч өндөр.
Чи юу хийж чадах юм бэ?
Тэдгээр нь Үхэгсдийн орноос ч гүн.
Чи юу мэдэж чадах юм бэ?
⁹Түүний хэмжээс газар дэлхийгээс ч урт,
далайгаас ч өргөн юм.
¹⁰Хэрэв Тэрээр өнгөрөн явж,
хорьж, эсвэл чуулганыг дуудвал
хэн Түүнийг хориглож чадах юм бэ?
¹¹Тэрээр хуурамч хүмүүсийг таньж,
гэм бурууг хардаг бөгөөд
түүнд санаа тавихгүй гэж үү?
¹²Учир нь хоосон хүн ухаанаар дутмаг бөгөөд
хүн илжигний дудран мэт төрдөг юм.

¹³Хэрэв чи зүрхээ зөв удирдаж,
гараа Түүн уруу сунгаж,
¹⁴чиний гарт гэм буруу байвал тэдгээрийг хол зайлуулж,
майхнууддаа хорон мууг оршин байлгахгүй бол,
¹⁵чи өө сэвгүйгээр царайгаа өргөн явж үнэхээр чадахсан бөгөөд
чи бат бөх болж, айхгүй байх байсан.
¹⁶Чи зовлонг мартах байсан бөгөөд
урсан одох ус мэт түүнийг санах байсан.
¹⁷Амьдрал чинь жин үдээс ч илүү хурц гэрэлтэй байхсан.
Харанхуй ч өглөө мэт байхсан.
¹⁸Тэгэхэд, найдвар бий учраас чи итгэх байсан.
Чи эргэн тойрноо харж, аюулгүйгээр амрахсан.
¹⁹Үймүүлэх зүйлгүйгээр чи хэвтэхсэн бөгөөд
олон хүн чиний тааллыг гуйх байсан.
²⁰Харин хорон муу хүмүүсийн нүд сүүмийж,
тэдэнд зугтах газар ч олдохгүй.
Тэдний найдвар нь эцсийнх нь амьсгал ажээ гэв.