36 ¹Тэгээд Елиху үргэлжлүүлэн
²-Намайг жаахан хүлээгээч,
Бурханы төлөө хэлэх зүйл илүү их бий гэдгийг би чамд үзүүлье.
³Би мэдлэгээ алс холоос авч,
шударга зөв байдлыг Бүтээгчдээ хамааруулна.
⁴Үнэхээр миний үгс худал биш юм.
Мэдлэгээр төгс нэгэн чамтай хамт байна шүү дээ.
⁵Харагтун, Бурхан хүчирхэг боловч жигшдэггүй,
ухааны чадавхаар хүчирхэг билээ.
⁶Тэр хорон муу хүмүүсийг амьд үлдээдэггүй,
харин дарлагдагсдад шударга ёсыг өгдөг.
⁷Тэрээр шударга зөв нэгнээс мэлмийгээ салгадаггүй.
Харин сэнтий дэх хаадтай Тэрээр
тэднийг үүрд залсан бөгөөд тэд өргөмжлөгдсөн.
⁸Хэрэв тэд дөнгөнд хүлэгдэж,
зовлонгийн урхинд баригдсан бол,
⁹тэгэхэд Тэрээр тэдэнд өөрсдийнх нь ажил болон
тэд өөрсдийгөө өргөмжилсөн тэдний нүгэл хилэнцийг мэдүүлж өгдөг.
¹⁰Тэрээр тэдний чихийг заавар тушаалуудад нээж,
тэднийг бузар муугаас эргэхийг тушаадаг.
¹¹Хэрэв тэд сонсоод үйлчилбэл
тэд өөрсдийн өдрүүдээ амжилт цэцэглэлд,
жилүүдээ таашаал дунд өнгөрөөх болно.
¹²Харин тэд сонсохгүй аваас
илдэнд мөхөж, мэдлэггүйгээр үхэх болно.
¹³Харин зүрхэндээ бурхангүй хүмүүс уур хилэнг нөөцөлдөг.
Тэрээр тэднийг хүлэх үед тэд тусламж эрэн хашхирдаггүй.
¹⁴Тэд залуугаараа үхэж,
тэдний амьдрал шүтээний янхнуудын дунд байдаг.
¹⁵Тэрээр зовогсдыг зовлон дотор нь аварч,
дарлал дотор чихийг нь нээдэг.
¹⁶Тэгээд Тэрээр чамайг ч зовлонгийн амнаас шахалт байхгүй өргөн уудам газар уруу гаргахсан.
Чиний ширээн дээр тавигдсан юмс нь ч өөхлөг байхсан.

¹⁷Харин чи хорон муугийн шийтгэлээр дүүрэн байсан.
Шийтгэл болон шударга ёс чамайг барьж авдаг.
¹⁸Уур хилэн жигшүүлтэл чамайг уруу татаг.
Чиний төлөөсийн агуу байдал чамайг эргүүлэхийг бүү зөвшөөр.
¹⁹Чиний баялгууд, эсвэл бүх хүч чадлууд
чамайг зовлонгоос хамгаалж чадах уу?
²⁰Хүмүүс газар дээрээ алга болдог шөнийг бүү хүсэмжил.
²¹Болгоомжтой бай, бузар муу уруу бүү эргэ.
Учир нь чи үүнийг зовлонгоос илүүгээр эрхэмлэсэн билээ.
²²Харагтун, Бурхан Өөрийн хүч дотроо өргөмжлөгджээ.
Түүн шиг багш хэн бэ?
²³Хэн Түүнд замыг нь тогтоож,
хэн “Та буруу үйлдэж байна?” гэж хэлсэн юм бэ?

²⁴Чи Түүний ажлыг өргөх ёстой гэдгээ сана.
Хүмүүс ч үүний тухай дуулсан.
²⁵Бүх хүн үүнийг харсан бөгөөд
хүн алсаас үздэг.
²⁶Харагтун, Бурхан өргөмжлөгдсөн бөгөөд бид мэддэггүй.
Түүний он жилүүдийн тоог ухварлашгүй.
²⁷Учир нь Тэрээр усны дуслуудыг дээшээ татдаг бөгөөд
тэр дундаас бороог бий болгодог.
²⁸Үүнийг үүлс доош асгадаг бөгөөд
тэдгээр нь хүн дээр бялхмаар дусалдаг.
²⁹Үүлсийн тархахыг хийгээд Түүний оршихуйн нижигнэх дууг
хэн нэгэн ойлгож чаддаг уу?
³⁰Үзэгтүн, Тэр Өөрийн аянгыг эргэн тойрондоо цацрааж,
далай тэнгисийн гүнийг ч бүрхдэг.
³¹Учир нь эдгээрээрээ Тэрээр хүмүүсийг шийтгэдэг.
Тэрээр хоол хүнсийг ч элбэг хангалуунаар өгдөг.
³²Тэрээр аянгаар мутраа бүрхэн,
байг ниргэхийг түүндээ тушаадаг.
³³Дуу чимээ нь Түүний оршихуйг илэрхийлдэг.
Мал сүрэг ч хүртэл юу болж буйг мэдэрдэг билээ.