15 ¹Дараа нь теман хүн Елифаз хариулан
²-Мэргэн хүн хоосон мэдлэгийг ярьж,
өөрийгөө дорнын салхиар дүүргэдэг байх ёстой гэж үү?
³Тэрээр хэрэггүй яриа,
эсвэл ашиг өгдөггүй үгсээр маргадаг байх ёстой юу?
⁴Үнэндээ чи хүндэтгэлийг зайлуулж,
Бурханы өмнөх бясалгалыг саатуулж байна.
⁵Чиний гэм буруу амыг чинь сургадаг бөгөөд
чи зальтны хэлийг сонгодог.
⁶Би биш, өөрийн чинь ам чамайг буруутгадаг.
Өөрийн чинь уруул чиний эсрэг гэрчилдэг.

⁷Чи анхны хүн болон төрж,
эсвэл толгодоос ч өмнө бүтээгдсэн үү?
⁸Чи Бурханы нууц зөвлөгөөг сонссон бөгөөд
мэргэн ухааныг өөрөөрөө хязгаарладаг уу?
⁹Бидний мэддэггүй юуг чи мэддэг юм бэ?
Эсвэл бидэнд байдаггүй юуг чи ойлгодог юм бэ?
¹⁰Чиний эцгээс ч ахмад, буурал толгойтон болон өтөл настнуудын аль аль нь бидний дунд байна.
¹¹Бурханы тайтгарууллууд болоод чамд зөөлнөөр айлдсан үг нь ч хүртэл
чамд чамлагдаж байгаа юм уу?
¹²Яагаад сэтгэл чинь чамайг авч явна вэ?
Юунд нүд чинь гялалзан,
¹³ингэснээрээ чи өөрийн сүнсээ Бурханы эсрэг эргүүлж,
амнаасаа үгсийг гаргана вэ?
¹⁴Цэвэр байхаар хүн гээч нь юу юм бэ?
Зөвт байхаар эмэгтэйгээс төрсөн нэгэн нь юу юм бэ?
¹⁵Үзэгтүн, Тэрээр Өөрийн ариун нэгнүүддээ ч итгэдэггүй бөгөөд
тэнгэрүүд ч хүртэл Түүний мэлмийд цэвэр биш байдаг.
¹⁶Тэр тусмаа жигшмээр, завхарсан нэгэн буюу гэм бурууг ус адил уудаг хүн ямар байх бол!

¹⁷Би чамд хэлье, намайг сонс.
Юу үзсэнээ ч би бас мэдүүлэх болно.
¹⁸Мэргэдийн өөрсдийн эцэг өвгөдөөс нуулгүй хэлсэнийг ч мэдүүлнэ.
¹⁹Зөвхөн тэдэнд газар нутаг өгөгдсөн бөгөөд
тэдний дундуур харийн ямар ч хүн өнгөрөөгүй билээ.
²⁰Хорон муу хүн бүх өдрүүдийн турш өвчин дотор тарчилдаг бөгөөд
харгис хүнд хадгалагдсан жилүүд тоотой бөлгөө.
²¹Түгшүүрийн чимээ чихэнд нь байна.
Амар амгалан байхад нь сүйтгэгч түүн дээр ирдэг аж.
²²Тэрээр харанхуйгаас эргэн гарна гэдэгт итгэдэггүй бөгөөд
тэрээр илдэнд заяагдсан ажээ.
²³Тэрээр хоол хайн тэнүүчилж, “Хаана байна вэ?” хэмээдэг.
Харанхуйн өдөр маш ойр байгааг тэр мэддэг билээ.
²⁴Зовлон ба өвчин түүнийг айлгадаг бөгөөд
довтлоход бэлэн буй хаан мэт тэд түүнийг нөмрөн авдаг.
²⁵Учир нь тэрээр Бурханы эсрэг гараа сунгаж,
Төгс Хүчит Нэгэний эсрэг ихэмсгээр үйлддэг.
²⁶Тэрээр зузаан, бат бөх бамбайтайгаар
Түүн уруу гөжүүдээр дайрдаг аж.
²⁷Учир нь тэр өөрийн нүүрийг өөхөөрөө бүтээж,
гуяа цулцгар махаар бүрсэн.
²⁸Тэрээр эзгүйрсэн хотуудад болон хэний ч амьдрахааргүй сууцнуудад амьдарч байсан.
²⁹Тэрээр баяжихгүй, эд баялаг нь ч үүрдийнх биш.
Үр тариа нь газарт унахгүй.
³⁰Тэрээр харанхуйгаас зугтахгүй.
Мөчрүүдийг нь гал хуйхлах бөгөөд
Түүний амны амьсгалаар тэрээр одох бөлгөө.
³¹Тэрээр өөрийгөө хуурч, хоосонд бүү итгэг.
Хоосон нь түүний шагнал болно.
³²Түүний цагаас өмнө энэ нь биелэгдэж,
далдуу модны мөчир ч ногоорохгүй.
³³Тэр өөрийн боловсорч гүйцээгүй усан үзмийг усан үзмийн мод мэт унагаж,
өөрийн цэцгээ чидун мод шиг хаях болно.
³⁴Учир нь бурхангүй хүмүүсийн нөхөрлөл үргүй бөгөөд
завхрагчдын майхнуудыг гал шатаадаг юм.
³⁵Тэд худал хуурмагийг тээж,
гэм бурууг төрүүлдэг бөгөөд тэдний оюун бодол заль мэхийг бэлтгэдэг ажээ гэв.