26 ¹Тэгэхэд Иов хариулж,
²-Сул нэгэнд чи юутай их тусламж вэ!
Хүчгүй болсон гарыг чи хэрхэн аврав аа!
³Мэргэн бус нэгэнд чи ямар үнэт зөвлөгөө өгөв өө!
Ямар хэрэгтэй билэг ухааныг чи өгөөмрөөр өгөв өө!
⁴Хэнд чи үгсийг хэлсэн бэ?
Хэний сүнс чамаар дамжуулж ярив?

⁵Усны доороос үхэгсдийн сүнснүүд усанд амьдрагсдын хамтаар чичирдэг.
⁶Түүний өмнө Үхэгсдийн орон нүцгэн бөгөөд
Сүйрлийн Газар ч бүтээгдэж халхлагдаагүй.
⁷Тэрээр хоосон газрын дээр умардыг дэлгэж,
хоосон юман дээр газар дэлхийг өлгөдөг.
⁸Тэрээр ус чийгийг Өөрийн зузаан үүлс дотор цуглуулдаг боловч
усан доор үүлс задарч унадаггүй.
⁹Тэрээр тэргэл сарны нүүрийг бүтээж,
дээгүүр нь Өөрийн үүлсийг дэлгэдэг.
¹⁰Гэрэл хийгээд харанхуйн хил зааг дээр
Тэрээр усны мандал дээр тойргийг зурав.
¹¹Түүнийг зэмлэхэд тэнгэрийн багананууд ганхаж, гайхацгаадаг.
¹²Тэрээр Өөрийн хүчээр далай тэнгисийг номхруулж,
Өөрийн ойлголтоор тэрээр Рахабыг бут цохисон.
¹³Түүний амьсгалаар тэнгэр цэлмэдэг.
Өөрийн мутраар тэрээр зугтагч могойг цоо хатгав.
¹⁴Харагтун, эдгээр нь бол Түүний замуудын өчүүхэн нь юм.
Түүний талаар бидний сонсдог үг ямар амархан бэ!
Гэвч Түүний хүчит нүргээнийг хэн ойлгож чадах вэ? гэв.