5 ¹Одоо дуудаач, чамд хариулах хэн нэгэн хүн байгаа юм уу?
Ариун хүмүүсийн аль уруу нь чи эргэх юм бэ?
²Уур хорсол нь мунхаг хүнийг алж,
атаархал нь гэнэн нэгнийг үхүүлдэг.
³Үндэслэж буй мунхгийг би харсан бөгөөд
түүний орон гэрийг би шууд хараасан билээ.
⁴Түүний хөвгүүд аюулгүй байдлаас хол бөгөөд
тэд дааман хаалган дотор бяцлагдавч, аврагч байхгүй аж.
⁵Өлсөгчид ургацыг нь цөлмөж,
өргөст бутнууд уруу авч явдаг.
Ундаасагчид эд хөрөнгөнд нь санаархдаг.
⁶Золгүй явдал шорооноос гардаггүй,
гай зовлон ч газраас ургадаггүй.
⁷Дээшээ цорволзон үсчих очнуудын адил хүн зовлонгийн төлөө л төрдөг.

⁸Харин миний хувьд, би Бурханыг эрэлхийлж,
Бурханы өмнө би өөрийн хэргийг тавихсан.
⁹Тэрээр агуу, ухааршгүй зүйлсийг болон
тоо томшгүй гайхамшгуудыг үйлддэг юм.
¹⁰Тэрээр газар дэлхий дээр хур бороо өгч,
талбайнууд уруу ус илгээдэг бөгөөд
¹¹ингэснээр Тэрээр дорой хүмүүсийг өндөрт тавьж,
гашуудагсад ч аюулгүй байдалд өргөгдөх ажээ.
¹²Тэрээр башир хүмүүсийн хуйвалдааныг тасалдаг бөгөөд
ингэснээр тэдний гар амжилт олж чаддаггүй аж.
¹³Тэр ухаантнуудыг башир байдал дотор нь олзолдог бөгөөд
зальтнуудын зөвлөгөө хурдан хүчингүй болдог.
¹⁴Өдрөөр тэд харанхуйтай учирч,
үд дунд ч шөнө мэт тэмтэчдэг.
¹⁵Харин Тэрээр тэдний амны сэлмээс хийгээд
ядуусыг хүчтэний савраас авардаг.
¹⁶Тиймээс тусламж дэмжлэггүй хүмүүст найдвар байгаа бөгөөд
шударга бус нь өөрийн амыг түгжих ёстой юм.

¹⁷Үзэгтүн, Бурханаар сургамжлагддаг хүн юутай жаргалтай вэ,
тиймээс Төгс Хүчит Нэгэний гэсгээлтийг бүү жигш.
¹⁸Тэрээр өвтгөдөг бөгөөд шархыг боож өгдөг.
Тэрээр шархлуулдаг бөгөөд Түүний мутар эдгээдэг аж.
¹⁹Зургаан гай гамшгаас Тэрээр чамайг аварч,
долоон бузар муу зүйл ч чамд хүрэхгүй.
²⁰Өлсгөлөнгийн үед Тэрээр чамайг үхлээс,
дайны үед илдний хүчнээс золино.
²¹Чи хэлний ташуураас халхлагдаж,
ирэхэд нь хүчирхийллээс айхгүй болно.
²²Хүчирхийлэл ба өлсгөлөн болоход чи инээж,
зэрлэг араатнуудаас ч айхгүй болно.
²³Учир нь чи талын чулуунуудтай холбоотон болж,
хээрийн араатнууд ч чамтай эвтэй байх болно.
²⁴Чи орших сууцаа эргэж, ямар ч алдагдлаас эмээхгүй учраас
майхан чинь аюулгүй болохыг чи мэднэ.
²⁵Үр удмууд чинь өнөр өтгөн, үр хүүхэд чинь газар дэлхийн өвс мэт болохыг чи бас мэдэх болно.
²⁶Цагт нь хурааж юүжилсэн тариа адил
чи бүрэн хүч тэнхээтэй байхдаа булшинд орно.
²⁷Үүнийг үзэгтүн. Ийм учиртай болохыг бид шалгасан билээ.
Үүнийг сонсож, өөртөө ухаарагтун гэв.