1 ¹Иудагийн хаад болох Уззиа, Иотам, Ахаз, Хезекиа нарын өдрүүдэд, Иуда болон Иерусалимын тухай Амозын хүү Исаиагийн үзсэн үзэгдэл.
²Аяа, тэнгэр минь, сонсогтун.
Газар минь, чих тавигтун.
ЭЗЭН айлдаж байна.
“Миний өсгөж,
торниулсан хөвгүүд Миний эсрэг бослоо.
³Шар өөрийн эзнээ таньдаг.
Илжиг ч эзнийхээ тэвшийг таньдаг.
Харин Израиль мэддэггүй.
Миний хүмүүс ойлгодоггүй”.
⁴Ээ халаг,
нүгэлт үндэстэн,
гэмд дарагдсан ард түмэн,
хорлогчдын үр удам,
ялзарсан хөвгүүд.
Тэд ЭЗЭНийг орхилоо.
Тэд Израилийн Ариун Нэгэнийг жигшин,
Түүнээс гэдрэг эргэлээ.
⁵Та нар урваж шарвасаар дахин хаанаа цохиулмаар байна?
Толгой нь бүхэлдээ өвчтэй,
зүрх нь бүхэлдээ ядруу байна.
⁶Хөлийн улнаас толгой хүртлээ эрүүл газар алга.
Шахаагүй, боогоогүй,
тосоор зөөллөөгүй шарх, сорви, өмхий яр л байна.
⁷Та нарын газар эзгүйрч,
та нарын хотууд галд шатаж,
тариан талбайг чинь та нарын нүүрэн дээр харийнхан залгиж байна.
Харийнхнаар устгагдсан хоосрол.
⁸Усан үзмийн талбай дахь нуувч,
өргөст хэмхний талбай дахь манаачийн овоохой болон
бүслэгдсэн хот мэт Сионы охин орхигдов.
⁹Хэрэв түмэн цэргийн ЭЗЭН цөөн хүмүүсийг бидэнд амьд үлдээгээгүй бол
бид Содомтой адил болж,
Гоморратай төстэй байцгаах байсан.
¹⁰Содомын захирагчид аа!
ЭЗЭНий үгийг сонсогтун.
Гоморрагийн хүмүүс ээ!
Бидний Бурханы зааварт чих тавигтун.
¹¹ЭЗЭН айлдаж байна.
“Та нарын олон тахил Надад юу юм бэ?
Би хуцын шатаалт тахилд,
бордсон үхрийн өөхөнд бүр цадлаа.
Надад бух, хурга, ямааны цус ч таалагдсангүй.
¹²Та нар Миний өмнө үзэгдэхээр ирэхдээ
Миний хашааг дэвслэхийг хэн шаардсан бэ?
¹³Зохисгүй өргөлөө цаашид бүү авчрагтун.
Утлага чинь Надад жигшүүртэй байна.
Шинэ сар, амралтын өдөр,
цугларалтын дуудлага болох
бузар гэм болон ёслолын чуулганыг Би тэвчиж чадахгүй.
¹⁴Та нарын шинэ сарын баяр,
тогтоосон найруудыг Би үзэн ядаж байна.
Тэдгээр нь Надад дарамт болж,
тэднийг үүрснээс болж Би ядарч байна.
¹⁵Та нар гараа өргөх үед,
Би та нараас мэлмийгээ нууна.
Тийм ээ,
та нар олонтаа залбирсан ч Би сонсохгүй.
Та нарын гар цусаар бялджээ.
¹⁶Биесээ угаагтун.
Өөрсдийгөө цэвэрлэ.
Миний хараанаас бузар муу үйлсээ зайлуул.
Нүгэл хийхээ болигтун.
¹⁷Сайныг үйлдэхэд суралц.
Шударга ёсыг эр.
Хэрцгий догшинийг зэмлэ.
Өнчнийг хамгаал.
Бэлэвсэнг өмгөөлөгтүн”.
¹⁸“Нааш ир. Хамт хэлэлцье” гэж ЭЗЭН айлдаж байна.
“Та нарын нүглүүд час улаан мэт боловч
цас шиг цагаан болно.
Тэдгээр нь хүрэн улаан боловч
ноос шиг болох болно.
¹⁹Хэрэв та нар зөвшөөрч,
дуулгавартай дагавал,
энэ газрын хамгийн сайныг иднэ.
²⁰Харин та нар эсэргүүцэж босвол,
илдээр цавчигдана” гэж ЭЗЭНий ам айлдаж байна.
²¹Итгэмжит хот яаж янхан болсон бэ?
Зөв шударгаар дүүрэн,
энд үнэн зөв хоноглодог байсан атал,
харин одоо алуурчдаар л дүүрчээ.
²²Чиний мөнгө хог болсон.
Чиний дарс усаар шингэлэгдсэн.
²³Чиний ноёд бол бослого гаргагчид,
хулгайчдын найзууд.
Хүн бүр хахуульд дуртай бөгөөд
шан харамж хөөцөлддөг.
Тэд өнчнийг хамгаалдаггүй,
бэлэвсний өргөдлийг хүлээн авдаггүй.
²⁴Тийм учраас түмэн цэргийн БУРХАН Эзэн,
Израилийн Хүчит Нэгэн тунхаглаж байна.
“Аяа,
Намайг эсэргүүцэгчдээс Би чөлөөлөгдөж,
дайснуудаас Өөрийнхөө өшөөг авна.
²⁵Би бас мутраа чиний эсрэг эргүүлж,
чиний хогийг бүхэлд нь шүлтэд хийх мэт цэвэршүүлж,
бүх хольцыг чинь зайлуулна.
²⁶Би танай шүүгчдийг анхных шиг нь,
мөн зөвлөхүүдийг чинь эхнийх шиг нь сэргээнэ.
Үүний дараа чи шударга хот,
итгэлт хот гэж нэрлэгдэнэ”.
²⁷Сион үнэн шударгаар аврагдахад,
Түүний гэмшсэн нэгэн зөвт байдлаар аврагдана.
²⁸Харин гэмт хэрэгтнүүд,
нүгэлтнүүд хамтдаа бяцлагдан,
ЭЗЭНийг умартагчдад төгсгөл ирнэ.
²⁹Та нар өөрсдийн хүссэн царснаас болж ичнэ.
Та нар өөрсдийн сонгосон цэцэрлэгээс болж гутамшиг болно.
³⁰Учир нь та нар навчис нь хийсэх царс мэт,
ямар ч усгүй цэцэрлэг мэт болно.
³¹Хүчтэн нь хуурайшсан мод болж,
түүний үйлс нь оч болно.
Тэд хоёул хамтдаа шатах бөгөөд
түүнийг хэн ч унтраахгүй.