9 ¹Зовлонтой байсан газар нутагт дахин харанхуй болохгүй. Урьдын цагт Тэр Зебулун болон Нафталийн нутагт жигшүүрээр хандаж байсан бол дараа нь харь үндэстнүүдийн Галил, Иорданы нөгөө талд, тэнгисийн хажуугаар сүр жавхлантай болгоно.
²Харанхуйд алхаж яваа хүмүүс агуу их гэрлийг үзнэ.
Харанхуй газарт амьдарч байгаа хүмүүс дээр гэрэл тусна.
³Та үндэстнийг олшруулан,
тэдний баяр хөөрийг нь ихэсгэнэ.
Хүмүүс олзоо хуваах үед баярладаг шиг,
тэд Таны оршихуйд ургац хураан баярлалдана.
⁴Учир нь Мидианы өдрийнх шиг тэднийг дарангуйлагчийн ташуур болох тэднийг дарамтлах буулга,
мөрөн дээрх дөнгийг нь Та эвдэнэ.
⁵Тулалдаанд цэрэг хүний өмссөн гутал бүрийг,
цусанд өнхрүүлсэн хувцас бүхнийг галын түлш мэт шатаана.
⁶Учир нь бидний төлөө хүүхэд төрж,
бидэнд хүү өгөгдөнө.
Засаглал Түүний мөрөн дээр байх болно.
Түүний нэрийг Гайхамшигт Зөвлөгч,
Хүчит Бурхан,
Мөнхийн Эцэг,
Энхийн Жонон гэж дуудна.
⁷Давидын сэнтий,
түүний хаанчлалд шударга ёс, үнэн зөвийг үеийн үед тогтооход,
Түүний засаглал болон энх амгалан нь
одоогоос үүрд мөнхөд байх болно.
Түмэн цэргийн ЭЗЭНий зүтгэл үүнийг хэрэгжүүлнэ.

⁸Эзэн Иаковын эсрэг үг илгээв.
Энэ нь Израиль дээр буув.
⁹Ефраим болон Самарийн оршин суугчид зүрхний бардамнал,
их зангаар ийнхүү ярьж байгааг бүх хүмүүс мэддэг.
¹⁰“Тоосгонууд эвдрэн нурсан ч,
бид гөлгөр чулуугаар дахин барина.
Тошлогийн мод огтлогдсон ч,
бид хуш модоор орлуулна”.
¹¹Ийм учраас ЭЗЭН тэдний эсрэг дайснуудыг нь Резинээс өдөөн босгох болно.
¹²Дорно зүгээс арамейчууд,
баруун зүгээс филистчүүдийг явуулахад
тэд амаа ангайлган Израилийг залгина.
Энэ бүхнээс үл хамааран,
Түүний уур хилэн эргэхгүй,
Өөрийн мутраа сунгасан хэвээр байна.

¹³Учир нь хүмүүс өөрсдийг нь цохисон Түүн уруу буцаж эргэдэггүй,
түмэн цэргийн ЭЗЭНийг эрж хайдаггүй.
¹⁴Тиймээс ЭЗЭН Израилиас толгой,
сүүлийг нь тастаж,
ганцхан өдөрт далдуу модны иш,
мөчрийг нь тас огтолно.
¹⁵Толгой нь өтгөс болон хүндэт хүмүүс,
сүүл нь худал хуурмагийг номлодог эш үзүүлэгч юм.
¹⁶Учир нь энэ хүмүүсийн газарчлагчид нь тэднийг төөрүүлж,
тэднээр газарчлуулсан хүмүүс нь будлин самуурдаг.
¹⁷Тийм учраас Эзэн тэдний залуусаас ч таашаал авахгүй.
Өнчин, бэлэвсэн хүмүүсийг нь ч Тэр өрөвдөхгүй.
Учир нь тэд бүгдээрээ бурхангүй ба бурууг үйлдэгчид ажээ.
Ам болгон мунхаг зүйл ярьж байна.
Энэ бүхнээс үл хамааран,
Түүний уур хилэн эргэхгүй,
Өөрийн мутраа сунгасан хэвээр байна.

¹⁸Учир нь бузар муу явдал нь гал мэт шатаж,
үүргэнэ болон өргөст бутыг түймэрддэг.
Энэ нь ойн ширэнгийг хүртэл ноцоож,
дээшээ утаан багана мэт хөөрнө.
¹⁹Түмэн цэргийн ЭЗЭНий уур хилэнгээр газар хуйхлагдах бөгөөд хүмүүс галын түлш мэт юм.
Хэн ч ах дүүгээ хайрлахгүй.
²⁰Тэд баруун гарт байгаагаа шүүрэн ававч,
өлссөн хэвээрээ.
Тэд зүүн гарт юу байгаагаа идэвч үл цадна.
Хүн бүр өөрийнхөө шууны махнаас иддэг.
²¹Манассе Ефраимыг,
Ефраим Манассег залгина.
Тэд хамтарч Иудагийн эсрэг босно.
Энэ бүхнээс үл хамааран,
Түүний уур хилэн эргэхгүй,
Өөрийн мутраа сунгасан хэвээр байна.