28 ¹Ефраимын архичдын бардам титэм болон
үржилт хөндийн аман дахь гундмал цэцэг болох
түүний цуутай гоо үзэсгэлэн нь дарсанд цохигдсон хүмүүс хөөрхийлөлтэй еэ!
²Үзэгтүн, шуурган мөндөр,
сүйрлийн хар салхи мэт,
үерлэх усны хүчит шуурга мэт хүч чадалт нэгэн Эзэнд бий.
Түүнийг Өөрийн мутраараа дэлхий уруу чулуудна.
³Ефраимын архичдын бардам титэм нь хөл дор гишгэгдэнэ.
⁴Үржилт хөндийн аман дахь гундмал цэцэг болох түүний цуутай гоо үзэсгэлэн нь
зуны өмнөх боловсорсон анхны инжрийн жимс мэт болно.
Харсан хүн түүнийг шүүрэн авч залгина.
⁵Тэр өдөр түмэн цэргийн ЭЗЭН Өөрийн амьд үлдсэн хүмүүст цог жавхлант титэм, үзэсгэлэнт цэцгэн хэлхээ болж,
6шүүх газар сууж буй хүнд шударга сүнс болж,
дааман хаалга тийш гэдрэг довтлогч хүмүүст хүч чадал нь болно.
⁷Тэд бас дарсанд найгаж, архинд алмайрч,
тахилч хийгээд эш үзүүлэгч ч архинд найгалаа.
Тэд дарсанд самуурч, архинд алмайрч,
үзэгдэл үзэнгээ найган, шүүхэд согтуу байна.
⁸Тэгээд бүх ширээ заваан бөөлжсөөр дүүрч,
цэвэр газаргүй болж байна.

⁹“Тэр хэнд мэдлэг заах болж байна вэ?
Тэр хэнд сургаалыг ойлгуулах болж байна вэ?
Сүүнээс гарсан хүүхдэд үү, хөхнөөсөө салсан хүүхдэд үү?
¹⁰Учир нь Тэр
“Тушаалын дээр тушаал, тушаалын дээр тушаал,
журам дээр журам, журам дээр журам.
Энд жаахан, тэнд жаахан” гэж байна”.
¹¹Үнэхээр Тэр энэ ард түмэнд хандаж шулганасан уруул,
харь хэлээр дамжуулан ярих болно.
¹²Тэр тэдэнд хандан,
“Энд амралт байна.
Эцэж туйлдагсдад амралтыг өгөгтүн.
Энд тайван байна” гэсэн боловч
тэд сонсохгүй байх юм.
¹³Иймээс тэдэнд айлдах ЭЗЭНий үг нь
“Тушаалын дээр тушаал, тушаалын дээр тушаал,
журам дээр журам, журам дээр журам.
Энд жаахан, тэнд жаахан” гэнэ.
Энэ нь тэд явж, гэдрэг бүдрэн, эвдрээд,
урхинд орж баригдахын тулд юм.
¹⁴Тиймээс Иерусалим дахь энэ ард түмнийг захирагч, шооч хүмүүс ээ.
ЭЗЭНий үгийг сонсогтун.
¹⁵Учир нь та нар
“Бид үхэлтэй гэрээ байгуулсан,
бид Үхэгсдийн оронтой хэлэлцээр хийсэн.
Дийлдэшгүй ташуур дайран өнгөрөхдөө бидэнд хүрэхгүй.
Учир нь бид худал хуурмагийг өөрсдийн хоргодох газар болгож,
заль мэхээр өөрсдийгөө далдалсан” гэж хэлсэн.
¹⁶Тийм учраас Эзэн БУРХАН
“Үзэгтүн. Би Сионд нэг чулууг тавина.
Тэр нь шалгагдсан бөгөөд бат тавигдсан суурийн булангийн үнэт чулуу юм.
Түүнд итгэгчийг яаруулахгүй.
¹⁷Би шударга ёсыг хэмжих шугам болгон,
үнэн зөвийг түвшин болгоно.
Худлын хоргодох газрыг мөндрөөр арчин,
нууц газрыг усаар нөмөргөнө.
¹⁸Та нарын үхэлтэй байгуулсан гэрээ,
Үхэгсдийн оронтой тохиролцсон хэлэлцээр нь хүчингүй болно.
Дийлдэшгүй ташуур дайран өнгөрөхдөө та нарыг гишгэчин дэвслэх болно.
¹⁹Тэр өнгөрөх бүрдээ та нарыг барина.
Өглөө бүр, өдөр шөнөгүй дайран өнгөрнө.
Энэ мэдээг ойлгох нь үнэхээр аймшигтай байх болно” гэж айлдаж байна.
²⁰Сунаж хэвтэхэд ор нь хэт богино,
биеэ хучихад хөнжил нь хэт нарийн ажээ.
²¹ЭЗЭН Перазим уулан дээр боссон шиг босож,
Гибеоны хөндийд хилэгнэсэн шиг хилэгнэн,
Өөрийн үйлийг, ер бусын үйлийг үйлдэнэ.
Тэр Өөрийн ажил, гайхамшигт ажлыг хийнэ.
²²Элэглэхээ одоо зогсогтун.
Эс тэгвэл та нарын гинж чангарна.
Учир нь бүх дэлхий дээрх тогтоогдсон сүйрлийг
түмэн цэргийн Эзэн БУРХАНаас би сонсов.
²³Чих тавин миний дууг чагнаач.
Сонс, миний үгийг чагнаач.
²⁴Тариачин үр цацахын тулд газраа бүх л өдөржингөө хагалдаг уу?
Тэр үргэлж борнойдон хөрсийг нь сийрүүлдэг үү?
²⁵Тэр газрын гадаргыг тэгшлэн, ногоон гоньд тарьж, гоньд цацдаггүй гэж үү?
Тэр буудайг эгнээгээр, арвайг газарт нь,
хөх тариаг талбай дээр нь тарьдаг биш үү?
²⁶Учир нь түүнд Бурхан ёс журмаар нь заан, сургадаг юм.
²⁷Ногоон гоньдыг лантуугаар цохидоггүй,
тэрэгний дугуй ч гоньдны дээгүүр өнхөрдөггүй.
Харин ногоон гоньдыг саваагаар,
гоньдыг шийдмээр балбадаг.
²⁸Талх барихын тулд үр тариаг буталж үйрүүлэх хэрэгтэй,
тиймээс тэр нь түүнийг үргэлжид үл цохих бөгөөд
тэрэгний дугуй үл эвдрэн,
өөрийн морьтой хүмүүсээр бутаргахгүй.
²⁹Энэ нь бас түмэн цэргийн ЭЗЭНээс ирсэн бөгөөд
Түүний зөвлөгөө нь гайхамшигтай, Түүний мэргэн ухаан нь агуу их билээ.