21 ¹Тэнгис хавийн зэлүүд газрын тухай зөн.
Өмнөдийн нутгаар дайран өнгөрөх хуй салхи шиг тэрээр цөлөөс,
аймшигт газраас ирнэ.
²Надад аймшигт үзэгдэл үзэгдэв.
Урвагч нь урвасаар,
сүйтгэгч нь сүйтгэсээр байна.
Елам аа, давш!
Медиа аа, бүслэгтүн!
Түүний учруулсан бүх шаналлын төгсгөлийг Би хийлээ.
³Үүнээс болж миний ууц бүхэлдээ өвдөн,
төрөх эмэгтэйн өвдөлт мэт хүчтэй өвчинд баригдав.
Би ичсэнээсээ болж сонсож чадсангүй,
айснаасаа болж харж чадсангүй.
⁴Миний зүрх чичрэн, айдас намайг эзэмдэн,
миний хүсэн тэмүүлсэн бүрэнхий нь миний хувьд аймшиг болон эргэв.
⁵Тэд ширээ засаж, бүтээлэг дэлгээд, идэж ууна.
“Ахмадууд аа, босогтун.
Бамбайнуудаа тослогтун”.
⁶Тиймээс Эзэн надад айлдан
“Яв. Манаач тавь. Тэр юу үзсэнээ илтгэг.
⁷Тэр морьтонгууд, тэрэгтэнгүүд болон илжигний ба тэмээн цувааг хармагцаа маш анхааралтай,
сонор сэрэмжтэй байгтун” гэв.
⁸Тэгээд манаач ийн хашхирав.
“Өө Эзэн, би өдрөөр үргэлж харуулын цамхаг дээр зогсож байна.
Би шөнө бүр манааны байрандаа байрлаж байна.
⁹Одоо харагтун. Морьтой цэргүүд, тэрэгтэй хүн ирж явна”.
Нэг нь “Вавилон унав, унав.
Түүний бурхдын бүх хөрөг газар сайгүй хэвтэнэ” гэж өгүүлнэ.
¹⁰Үтрэм дээр цохигдсон миний ард түмэн!
Израилийн Бурхан, түмэн цэргийн ЭЗЭНээс юу сонссоноо би та нарт мэдүүлж байна.
¹¹Едомын тухай зөн.
Сеирээс нэгэн хүн намайг дуудсаар
“Манаач аа. Шөнийн хэдэн цаг вэ? Манаач аа. Шөнийн хэдэн цаг вэ?” гэв.
¹²Манаач хариулж
“Өглөө болж байна, гэвч шөнө болно.
Хэрэв та асуувал асуу. Дахин буцаж ир” гэв.
¹³Арабын тухай зөн.
Деданчуудын жинчид ээ! Та нар Арабын шигүү ойд хоноглох ёстой.
¹⁴Темагийн нутгийн оршин суугчид аа.
Цангасанд нь ус авчирч, оргодлуудыг талхтай угтагтун.
¹⁵Учир нь тэд илднээс, далайсан илднээс, татсан нумаас, дайны дарамтаас зугтсан юм. ¹⁶Эзэн үүнийг надад айлдав. “Хөлсний жилүүд гэж тооцогдож байсан нэг жилийн дотор Кедарын бүх сүр жавхлан эцэс болно. ¹⁷Кедарын хөвгүүдийн хүчит эрс болох харваачдаас үлдсэн нь цөөхөн байх болно” гэж Израилийн Бурхан ЭЗЭН айлдсан”.