64 ¹Аяа, Та тэнгэрийг яран, доош бууж ирвэл,
Таны оршихуйд уулс доргин чичрэхсэн.
²Ширэнгэ бутыг шатаадаг гал мэт,
ус буцалгадаг гал адил
Өөрийнхөө оршихуйд үндэстнүүдийг чичрүүлэхийн тулд
Өөрийн нэрийг дайснууддаа мэдүүлэхээр бууж ирээч.
³Учир нь бидний хүсээгүй аймшигт үйлсийг Та хийх үед,
Таныг доош буухад уулс Таны оршихуйд чичрэв.
⁴Өөрийг нь итгэн хүлээгч нэгний төлөө үйлддэг Танаас өөр Бурханыг эртнээс нааш тэд сонсоогүй,
чихээрээ сонсоогүй бөгөөд нэг ч нүд хараагүй.
⁵Үнэн зөвийг баяртайгаар үйлдэгч,
Таны замуудад Таныг санадаг хүнтэй Та уулздаг.
Үзэгтүн, бид нүгэл үйлдэж,
үүнийгээ удаан хугацаагаар үргэлжлүүлсээр байсан учир Та уурласан.
Бид аврагдах болов уу?
⁶Бид бүгдээрээ бузар нэгэн мэт болсон бөгөөд бидний бүх зөв үйлс нь бохир хувцас мэт байдаг.
Бид бүгдээрээ навч мэт хатаж,
бидний нүгэл нь биднийг салхи мэт хийсгэнэ.
⁷Таны нэрийг дуудан Танаас зуурахаар өндийх хүн нэг ч алга.
Учир нь Та биднээс нүүрээ нууж,
биднийг өөрсдийн минь нүглийн хүчинд тушаасан.

⁸Гэвч эдүгээ ЭЗЭН, Та бол бидний Эцэг билээ.
Бид шавар, Та бол бидний ваарчин.
Бид бүгдээрээ Таны мутрын бүтээл.
⁹ЭЗЭН минь. Хэмжээ хязгааргүй бүү хилэгнээч.
Нүглийг үүрд бүү дурсаач.
Үзэгтүн, одоо хар, бид бүгд Таны ард түмэн.
¹⁰Таны ариун хотууд, Сион ч хүртэл зэлүүд газар боллоо.
Иерусалим эзгүйрлээ.
¹¹Эцэг өвгөдийн маань Таныг магтаж байсан газар болох бидний ариун үзэсгэлэнт өргөө галд шатжээ.
Бидний бүх үнэт юмс нуранги боллоо.
¹²ЭЗЭН минь. Эдгээрийг Та тэвчсээр байх уу?
Та дуугүй байсаар, хэмжээ хязгааргүйгээр биднийг зовоох уу?