2 ¹Иуда, Иерусалимын талаар үзсэн Амозын хүү Исаиагийн үг.

²Эцсийн өдрүүдэд
ЭЗЭНий өргөөний уул нь уулсын тэргүүнээр тохоогдон,
толгодын дээгүүр өргөгдөнө.
Бүх үндэстнүүд түүн уруу цутган ирнэ.
³Олон ард түмнүүд ирээд
“Ирцгээ,
ЭЗЭНий уул уруу,
Иаковын Бурханы өргөө уруу явцгаая.
Тийнхүү Тэрээр бидэнд Өөрийн замыг зааж,
бид Түүний жимээр алхах юм” гэцгээнэ.
Учир нь хууль Сионоос гарч,
ЭЗЭНий үг Иерусалимаас гарна.
⁴Тэр үндэстнүүдийн хоорондхыг шүүж,
олон ард түмнүүдэд шийдвэр гаргах болно.
Тэд илдээ анжисны хошуу,
жадаа хадуур болгон давтана.
Үндэстэн үндэстнийхээ эсрэг илд далайхгүй бөгөөд
дахин хэзээ ч тэд дайтахад суралцахгүй.

⁵Иаковын гэр ээ, ирцгээ.
ЭЗЭНий гэрэлд цөмөөрөө алхацгаая.
⁶Та Өөрийн ард түмнийг буюу Иаковын гэрийг хаялаа.
Юу гэвэл тэд дорнын нөлөөг авч,
филистчүүд шиг мэргэч төлөгчдөөр дүүрэн болж,
харийнхны хүүхдүүдтэй наймаалцаж байна.
⁷Тэдний нутаг мөн алт мөнгөөр бялхаж,
тэдний эрдэнэсийн санд эцэс төгсгөл алга.
Тэдний нутаг морьдоор дүүрч,
тэдний тэрэгнүүд эцэс төгсгөлгүй аж.
⁸Тэдний нутаг мөн шүтээнүүдээр дүүрэн,
тэд өөрсдийн хуруугаар хийсэн гарынхаа бүтээлийг шүтдэг.
⁹Тиймээс хүн номхтгогдож,
хүн басамжлагдсан ч гэсэн тэднийг бүү уучил.
¹⁰ЭЗЭНий аймшиг,
Түүний жавхлант сүр хүчнээс зугтаж,
хавцалд шургаж,
шороонд нуугдагтун.
¹¹Харин тэр өдөр хүний бардам харц басамжлагдаж,
хүний ихэмсэг зан номхтгогдож,
ЭЗЭН ганцаараа өргөмжлөгдөнө.

¹²Бардам ба ихэмсэг,
өргөгдсөн хүн бүрийг басамжлах өдөр түмэн цэргийн ЭЗЭНд бий.
¹³Энэ нь Ливаны ихэмсэг,
өргөгдсөн бүх Башаны бүх царс болон,
¹⁴бүх ихэмсэг уул,
бүх өргөмжлөгдсөн толгод,
¹⁵аливаа өндөр цамхаг,
аливаа бэхлэгдсэн хэрэм,
¹⁶Таршишийн бүх усан онгоц,
бүх үзэсгэлэнт гар урлалын эсрэг байх юм.
¹⁷Тэр өдөр хүний бардамнал нь номхтгогдож,
хүмүүсийн ихэмсэг зан нь басамжлагдахад,
ЭЗЭН ганцаараа өргөмжлөгдөнө.
¹⁸Шүтээнүүд оргүй алга болно.
¹⁹ЭЗЭН газрыг донсолгохоор босоход,
Түүний жавхлант сүр хүч,
болон аймшгийн өмнө хүмүүс хадны агуй,
газрын гав уруу орно.
²⁰Тэр өдөр хүмүүс мөргөхөөр өөрсдөдөө зориулан бүтээсэн мөнгөн шүтээнүүд болон
алтан шүтээнүүдээ сохор номин,
сарьсан багваахайнууд уруу шидэлцгээнэ.
²¹Энэ нь ЭЗЭН газрыг донсолгохоор босоход,
Түүний жавхлант сүр хүч,
аймшгийн өмнө хүмүүс хадны агуй,
хавцлын ан цав уруу орохын тулд ажээ.
²²Хамраараа амьсгалдаг хүнийг хүндлэхээ боль.
Учир нь тэр хир үнэтэй юм бэ?