12 ¹Тэр өдөр чи ингэж хэлэх болно.
“ЭЗЭН минь. Би Танд талархал өргөе.
Та надад уурласан хэдий ч уураа татаж,
намайг тайвшрууллаа.
²Үзэгтүн, Бурхан бол миний аврал.
Би итгэн, айхгүй.
ЭЗЭН БУРХАН бол миний хүч ба миний дуу,
Тэр миний аврал болов”
³Тэгээд та нар авралын худгаас баяртайгаар ус татна.
⁴Тэр өдөр та нар ингэж хэлэх болно.
“ЭЗЭНд талархлыг өргө, Түүний нэрийг дууд.
Түүний үйлсийг хүмүүсийн дунд мэдэгд.
Түүний нэр өргөмжлөгдсөнийг тэдэнд сануул.
⁵Гайхамшигт зүйлсийг хийсэн ЭЗЭНийг магтан дуул.
Энэ бүхнийг газар дэлхий даяар мэдүүлэгтүн.
⁶Сионд суугчид аа! Чанга дуугаар баясан хашхирагтун.
Учир нь та нарын дунд байгаа аугаа нь Израилийн Ариун Нэгэн юм”.