32 ¹Үзэгтүн, хаан нь үнэн зөвөөр хаанчлан,
ноёд нь шударгаар захирна.
²Хүн бүр салхинаас хоргодох газар мэт,
шуурганаас халхлах халхавч мэт,
хуурай газрын усны суваг мэт,
ангасан газар дахь өндөр хадны сүүдэр мэт байх болно.
³Тэгээд хараатай хүмүүсийн нүд нь сохрохгүй,
сонсох чихтэй нь сонсох болно.
⁴Адгуу хүний зүрх мэдлэгийг ялган таньж,
хэлгий хүний хэл нь тод ярих гэж яарна.
⁵Цаашид тэнэгийг сурвалжит хүн гэж дуудахгүй,
зальт этгээдийг өглөгч гэхгүй.
⁶Учир нь тэнэг хүн утгагүй юм ярьдаг ба түүний зүрх нь балмад хэргийг үйлддэг.
Тэр өлсгөлөн хүний сэтгэлийг хоосруулж,
ундаасагчийг ундаар дутагдуулахын тулд ЭЗЭНий эсрэг буруу ярьж,
бурхангүй явдлыг үйлддэг.
⁷Зальт этгээдүүдийн хувьд тэдний зэвсэг нь бузар муу билээ.
Хэдийгээр ядуу нэгэн шударгыг яривч,
худал хуурмаг үгсээр үгээгүйчүүдийг хөнөөхийн тулд тэрээр хорт муу арга зохиодог.
⁸Харин сурвалжит хүн зөв шударгаар сэтгэж,
түүгээрээ тогтдог.

⁹Амарлингуй эмс ээ.
Босож, миний дуу хоолойг сонсогтун.
Ихэрхүү охид оо, миний үгэнд чих тавигтун.
¹⁰Жил гаруйхны дотор ихэрхүү та нар зовох болно.
Учир нь усан үзмийн ургац хураалт төгсөж,
жимс хураалт болохгүй.
¹¹Амарлингуй эмс ээ, чичрэгтүн.
Бардам охид оо, зовогтун.
Хувцсаа тайлан нүцгэлж,
бэлхүүсээрээ таар ороогтун.
¹²Үржилтэй талбай, шүүслэг усан үзмийн төлөө цээжээ дэлдэгтүн.
¹³Миний ард түмний нутаг, үүргэнэ ба өргөст халгай ургасан нутаг,
баясгалант хот ба бүх жаргалтай гэрүүдийн төлөө гашуудагтун.
¹⁴Учир нь орд харш хаягдан, их шуугиант хот мартагдан,
хэрэм цамхгууд нь үүрд малын бэлчээр, хулангуудын хороо болно.
¹⁵Өндрөөс, бидний дээрээс Сүнс цутгах хүртэл,
зэлүүд газар нь үржил шимтэй талбай болж,
үржил шимтэй талбай нь ой мод хэмээн тооцогдох хүртэл тийм байх болно.
¹⁶Тэгээд шударга ёс нь цөлд оршиж,
үнэн зөв нь үржилтэй талбайд байна.
¹⁷Үнэн зөвийн үйлс нь амар тайван байж,
үнэн зөвийн үйлчлэл нь үүрдийн амар амгалан,
аюулгүй байдал болох юм.
¹⁸Миний ард түмэн энх амгалан орчинд,
аюулгүй гэрүүдэд, анир чимээгүй газарт амьдарна.
¹⁹Ойд мөндөр орж, хот доош оруулагдсан боловч,
²⁰бүх усны дэргэд тариа тарьж,
шар, илжгээ чөлөөтэй идээшлүүлэгчид та нар ямар ивээлтэй байх вэ!