48 ¹Израиль гэж нэрлэгдсэн Иаковын гэр ээ! Үүнийг сонс!
Чи Иудагийн уснаас гарч ирсэн бөгөөд ЭЗЭНий нэрээр тангараглаж,
Израилийн Бурханыг дууддаг боловч үнэн зөв дотор байдаггүй.
²Учир нь тэд өөрсдийгөө ариун хотынхон гэж нэрлээд,
Израилийн Бурханд түшиж байна.
Түүний нэр бол түмэн цэргийн ЭЗЭН билээ.
³“Би өнө эрт хуучин юмсыг тунхаглан,
Өөрийн амнаас гарсан тэдгээр зүйлсийг Би зарласан.
Гэнэт Би үйлдэхэд, тэдгээр нь биелсэн.
⁴Яагаад гэвэл чи зөрүүд,
чиний хүзүү чинь төмөр булчин,
магнай чинь хүрэл гэдгийг Би мэднэ.
⁵Тиймээс Би бүр өнө эртнээс, энэ явдал болохоос өмнө чамд мэдэгдсэн.
“Миний шүтээн үүнийг хийсэн,
миний сийлмэл хөрөг, цутгамал хөрөг үүнийг тушаасан” гэж чамайг яриулахгүйн тулд ингэсэн юм.
⁶Чи сонссон.
Энэ бүгдийг харагтун.
Чи үүнийг зарлахгүй юу?
Энэ цагаас эхлэн Би чамд шинэ юмс,
тэр ч бүү хэл чиний мэдээгүй нууцлагдсан зүйлсийг сонсгоё.
⁷Тэдгээр нь урьд өмнө нь биш,
саяхан бүтээгдсэн юм.
Өнөөдрийг хүртэл чи тэдгээрийг сонсоогүй.
“Хараач, би тэдгээрийг мэдэж байсан” гэж чамайг хэлүүлэхгүйн тулд ингэсэн юм.
⁸Чи сонсоогүй, мэдээгүй.
Бүр эрт үеэс чих чинь нээгдээгүй байсан.
Учир нь чи бол урван тэрслэгч,
төрөхөөсөө үймээн дэгдээгч гэж нэрлэгдэхийг чинь Би мэдэж байв.
⁹Өөрийнхөө нэрийн төлөө Би уур хилэнгээ хойшлуулж,
Өөрийгөө алдаршуулахын тулд Би чамайг тасталгүй тэвчсэн юм.
¹⁰Үзэгтүн, мөнгө шиг биш ч гэсэн Би чамайг цэвэршүүлсэн.
Би чамайг зовлонгийн зуухан дотор шалгасан.
¹¹Би Өөрийнхөө төлөө, Өөрийнхөө тусын тулд л үйлдэнэ.
Учир нь Миний нэр яаж бузарлагдаж чадах юм бэ?
Би Өөрийн алдрыг бусдад өгөхгүй.

¹²Намайг сонсогтун, Иаков оо. Миний дуудсан Израиль аа.
Би бол Тэр мөн.
Би бол эхэн бөгөөд Би бас эцэс мөн.
¹³Миний мутар газрыг үндэслэн,
Миний баруун мутар тэнгэрийг дэлгэв.
Би тэднийг дуудахад тэд хамтдаа зогсдог.
¹⁴Та нар бүгдээрээ цуглаж, сонсогтун.
Тэднээс хэн нь эдгээр зүйлсийг тунхагласан бэ?
ЭЗЭН түүнийг хайрладаг.
Тэр Түүний сайн тааллыг Вавилон дээр авчирна.
Түүний мутар халдеичуудын эсрэг байна.
¹⁵Би, зөвхөн Би айлдсан.
Үнэхээр Би түүнийг дуудсан.
Би түүнийг авчирсан бөгөөд Тэр түүний замыг өлзийтэй байлгана.
¹⁶Надад ойртон ирээд, үүнийг сонсогтун!
Би эхнээсээ нууцаар яриагүй.
Энэ явдал болох үеэс Би тэнд байсан юм.
Одоо Эзэн БУРХАН Намайг болон Өөрийн Сүнсийг илгээв”.

¹⁷Чиний Аврагч, Израилийн Ариун Нэгэн, ЭЗЭН ингэж айлдаж байна.
“Би бол чиний Бурхан ЭЗЭН мөн.
Би чамд тустайг сурган, чамайг явах ёстой замаар чинь удирддаг.
¹⁸Хэрэв чи зөвхөн Миний тушаалуудад анхаарлаа хандуулбал,
чиний энх амгалан байдал гол мэт,
чиний үнэн зөв нь далайн давалгаа мэт байх болно.
¹⁹Чиний үр удам элс мэт, чиний хойч үе элсний ширхэг мэт болно.
Тэдний нэр Миний оршихуйгаас хэзээ ч тастагдахгүй, устгагдахгүй”.
²⁰Вавилоноос гарч,
халдеичуудаас зугтаа!
“ЭЗЭН Өөрийн боол Иаковыг аварлаа” гэж баярт дуугаар зарлаж,
үүнийг тунхаглан, газрын хязгаар хүртэл дэлгэрүүлэгтүн.
²¹Тэр тэднийг цөлөөр дагуулах үед тэд цангаагүй.
Тэр тэдний төлөө хаднаас ус гаргаж,
хадыг хагалан ус оргилуулав.
²²“Хилэнцтэнд амар тайван байхгүй” гэж ЭЗЭН айлдав.