22 ¹Үзэгдлийн хөндийн тухай зөн.
Эдүгээ та нарт юу тохиолдоод,
та нар бүгдээрээ байшингийн орой дээр гараа вэ?
²Их шуугиан, хөл үймээн ихтэй, цэнгэлтэй хот оо.
Чиний алагдсан хүмүүс илдэнд алагдсангүй, тулаанд үрэгдсэнгүй.
³Чиний бүх захирагч хамтдаа зугтсан бөгөөд нум сумгүйгээр олзлогдов.
Тэд хол зугтсан боловч олдсон, та нар бүгдээрээ хамтдаа хоригдол болно.
⁴Ийм учраас би
“Харцаа надаас холдуул. Би гашуудан уйлъя.
Миний ард түмний охины сүйрлээс болж намайг тайвшруулах гэж бүү оролд” гэв.
⁵Учир нь түмэн цэргийн БУРХАН Эзэнд үзэгдлийн хөндийд сандаргах хийгээд гишгэх ба түйвээх нэг өдөр бий.
Энэ бол хэрмийг нурааж,
уулын эсрэг хашхирах өдөр юм.
⁶Елам тэрэгнүүд ба морьтой хүмүүсийн хамт саадгаа авч,
Кир бамбайг ил гаргав.
⁷Чиний шилмэл сайн хөндийнүүд тэргээр дүүрч,
морьтонгууд дааман хаалган дээр жагсав.
⁸Тэр Иудагийн халхавчийг зайлуулав.
Тэр өдөр та нар ойн сууцан дахь зэвсэгтээ найдна.
⁹Давидын хотын хэрмэн дэх цоорхой олон байгааг та нар үзсэн.
Та нар доод цөөрмийн усыг хураав.
¹⁰Тэгээд та нар Иерусалимын байшингуудыг тоолж,
хэрмийг бэхлэхийн тулд байшингуудыг нураав.
¹¹Та нар хуучин цөөрмийн усанд зориулан хоёр хэрмийн хооронд усан сан барьсан.
Гэвч та нар үүнийг хийсэн Нэгэнд үл найдан,
үүнийг өнө эрт төлөвлөсөн Нэгэнийг анхаараагүй.

¹²Тэр өдөр түмэн цэргийн БУРХАН Эзэн та нарыг таар нөмрөн, үсээ хусан,
гашуудан уйлаач хэмээн дуудсан боловч,
¹³та нар харин зугаа цэнгэл, баяр хөөр болж,
үхэр нядалж, хонь алж, мах идэж, дарс ууж байна.
“Маргааш бид үхэж магадгүй.
Тиймээс идэцгээе, ууцгаая!” гэцгээж байна.
¹⁴Гэвч түмэн цэргийн ЭЗЭН Өөрийгөө надад илчлээд
“Та нарыг үхтэл энэ нүгэл үнэхээр цагаатгагдахгүй” гэж түмэн цэргийн БУРХАН Эзэн айлдав.

¹⁵Түмэн цэргийн БУРХАН Эзэн айлдаж байна.
“Ирэгтүн. Ордны даамал болох, энэхүү нярав Шебна уруу очигтун.
¹⁶“Чи энд юу хийж байгаа юм бэ? Энд өөртөө булш цавчиж,
өндөрлөг дээр өөртөө бунхан цавчиж,
хадан дотор өөртөө зориулан амрах газар сийлэх эрх чамд хэн өгсөн бэ?
¹⁷Үзэгтүн, хүн ээ!
ЭЗЭН чамайг хүчтэйгээр шидэх гэж байна.
Тэр чамайг чанга базах гэж байна.
¹⁸Тэр чамайг бөмбөг шиг чанга эргүүлэн,
өргөн уудам улс уруу шиднэ.
Чи тэнд үхнэ.
Тэнд чиний тансаг тэрэг үлдэж,
чи өөрийнхөө эзний гэрийн ичгүүр нь болно”.
¹⁹Би чамайг албанаас чинь буулгана.
Би чамайг байр сууриас чинь доош татна.
²⁰Тэр өдөр Би Хелкиагийн хүү,
Өөрийн боол Елиакимыг дуудна.
²¹Би түүнийг чиний дээлээр хувцаслаж,
чиний бүсээр бүслэн,
чиний эрх мэдлийг түүнд хариуцуулна.
Тэрээр Иерусалимын оршин суугчид,
Иудагийн гэрийн эцэг болно.
²²Би түүний мөрөн дээр Давидын гэрийн түлхүүрийг тавина.
Түүнийг нээхэд хэн ч хаахгүй,
түүнийг хаахад хэн ч онгойлгохгүй.
²³Би түүнийг хатуу газарт хадаас шиг шаана.
Тэр нь эцгийнхээ гэрт алдрын сэнтий болно. ²⁴Үр удам, хойч үе ба жижиг сав суулганууд бүгдээрээ, хул аягануудаас бүх ваар савнууд хүртэл буюу эцгийнх нь гэрийн бүх алдрыг тэд түүний дээр өлгөнө. ²⁵“Тэр өдөр хатуу газарт хадсан хадаасыг зайлуулна. Тэр хугарч унана. Түүний дээр өлгөгдсөн ачаа ч тасарна” гэж түмэн цэргийн ЭЗЭН тунхаглав. Учир нь ЭЗЭН ийнхүү айлдсан юм.