3 ¹Харагтун,
Түмэн цэргийн БУРХАН Эзэн хангамж,
туслалцааг Иерусалим болон Иудагаас зайлуулах гэж байна.
Талхны бүх хангамж,
усны бүх хангамж,
²хүчит эрс болон дайчид,
шүүгчид ба эш үзүүлэгч,
төлөгч ба ахлагч,
³тавьтын ахлагч ба хүндэт хүн,
зөвлөгч ба уран зураач болон чадварлаг илбэчдийг ч зайлуулна.
⁴Би нялх хөвгүүдийг тэдний ноёд болгож,
эрх хүүхдүүд тэднийг захирна.
⁵Ард олон дарлагдаж,
хүн бүр нэг нь нөгөөгөө,
хөршөө дарлаж,
залуус нь өвгөд уруугаа,
захирагдагсад нь хүндэт хүмүүс уруу дайрна.
⁶Нэг хүн эцгийнхээ гэрт ахыгаа барьж авч
“Чамд нөмрөг бий.
Чи бидний захирагч бол.
Энэ балгаснууд чиний гар дор орно” гэж хэлэхэд,
⁷тэр өдөр өнөөх хүн дуугаа өндөрсгөн
“Би эмч болохгүй.
Манай гэрт талх ч байхгүй,
нөмрөг ч байхгүй.
Тийм учраас намайг ард түмний захирагчаар томилох ёсгүй” гэх болно.
⁸Юу гэвэл,
Иерусалим бүдэрч,
Иуда уналаа.
Учир нь тэдний хэл болон үйлс нь ЭЗЭНий эсрэг байж,
Түүний сүр жавхлант оршихуйн эсрэг босжээ.
⁹Тэдний царайны хувирал өөрсдийнх нь эсрэг гэрчилдэг.
Тэд Содом шиг өөрсдийн нүглээ далдлалгүй дэлгэн үзүүлдэг.
Өөрсдийнхөө дээр бузар мууг авчирсан тэд золгүй еэ!
¹⁰Сайн сайхан яваарай гэж зөв хүмүүст хэлэгтүн.
Учир нь тэд өөрсдийнхөө үйлдлийн үр жимсийг идэх болно.
¹¹Хар санаатан золгүй еэ!
Муу муухай нь түүнтэй хамт байг!
Яагаад гэвэл тэр гарынхаа хувийг хүртэх болно.
¹²Ард түмэн минь!
Хүүхдүүд тэднийг дарлаж,
эмэгтэйчүүд тэднийг захирдаг.
Ард түмэн минь,
та нарыг дагуулагчид та нарыг төөрүүлж,
замыг чинь будлиулж байна.

¹³ЭЗЭН зарга мэдүүлэхээр босож,
хүмүүсийг шүүхээр зогслоо.
¹⁴ЭЗЭН Өөрийн ард түмний ахлагчид болон ноёдтой хамт шүүхэд орж байна.
“Усан үзмийн талбайг та нар цөлмөсөн.
Ядуусаас дээрэмдсэн олз чинь та нарын гэрт бий.
¹⁵Миний ард түмнийг дарлаж,
ядуусын нүүрийг нунтаглана гэдэг чинь юу гэсэн үг вэ?” гэж
түмэн цэргийн БУРХАН Эзэн айлдаж байна.

¹⁶ЭЗЭН ийнхүү айлдав.
“Сионы охид бардам учраас толгойгоо өргөн,
өдсөн харцаар ширтэн алхаж,
хөлийн бугуйвчаа хүртэл жингэнүүлэн ихэмсгээр алхаж байна.
¹⁷Ийм учраас Эзэн Сионы охидын хуйхыг нь яршуулан зовооно.
ЭЗЭН тэдний магнайг нь нүцгэлнэ”. ¹⁸Тэр өдөр Эзэн тэдний хөлийн бугуйвч, толгойн зүүлт, саран хэлбэртэй чимэглэл, ¹⁹ээмэг, бугуйвч, гивлүүр, ²⁰малгай, хөлийн гинж, бүс,
сүрчигний хайрцаг, сахиус, ²¹хурууны бөгж, хамрын гархи, ²²ёслолын хувцас, гадуур цамц, нөмрөг, мөнгөний түрийвч, ²³толь, дотуур хувцас, алчуур, гивлүүр зэргийг бүгдийг нь авч хаяна.
²⁴Анхилуун сүрчгийг өмхий ус,
бүсийг олс,
гоёмсог зассан үсийг үс нь халцарсан хуйх,
сайхан хувцсыг тааран өмсгөл,
үзэсгэлэн гоог ичгүүрийн тамга орлоно.
²⁵Танай эрчүүд илдэнд,
танай хүчтэнүүд дайнд унана.
²⁶Түүний дааман хаалганууд гашуудан уйлж,
хаягдсан тэрээр газар дээр сууна.