9 ¹Бурхан, Ноаг болон түүний хөвгүүдийг ерөөн, тэдэнд
-Та нар олон үр хүүхэдтэй, өнөр өтгөн болж, газар дэлхийг дүүргэгтүн. ²Газар дэлхий дээрх араатан амьтан бүхэн, огторгуйн жигүүртэн шувуу бүхэн, газраар мөлхөгч бүхэн, далайн загас жараахай бүхэн та нараас айж эмээнэ. Тэд та нарын гарт орох болно. ³Аливаа амьд амьтан та нарын хоол хүнс болно. Би та нарт ургамал ногоог өгсөн шигээ одоо би энэ бүхнийг та нарт өгч байна. ⁴Та нар зөвхөн махыг амь нь болох цустай нь идэж болохгүй. ⁵Тэгвэл Би та нарын цус, амин цусыг заавал нэхнэ. Амьтан бүрээс ч би түүнийг нэхнэ. Хүн хийгээд хүний ах дүү бүрээс ч нэхнэ.
⁶Хэн хүний цусыг урсгана,
Түүний цусыг хүн урсгана.
Учир нь Бурхан Өөрийн дүрээр хүнийг бүтээжээ.
⁷Та нар олон үр хүүхэдтэй өнөр өтгөн болж,
Газар дэлхийгээр дүүрч, үржин өсөгтүн гэжээ.
⁸Бурхан Ноа болон түүнтэй хамт байсан хөвгүүдэд нь өгүүлрүүн
⁹-Би Өөрийнхөө гэрээг та нартай болон та нарын үр хүүхэдтэй, ¹⁰бас та нартай хамт байсан бүх амьтан, жигүүртэн шувууд, мал адгуус, газрын бүх амьтан, хөвөгч авдраас гарсан бүхэнтэй буюу дэлхий дээрх бүх араатан амьтантай байгуулна. ¹¹Би та нартай гэрээ байгуулна. Хамаг амьтныг дахин хэзээ ч үерийн усанд устгахгүй. Газар дэлхийг сүйрүүлэх үер дахин хэзээ ч болохгүй. ¹²Бурхан
-Энэ бол та нартай болон та нартай хамт байгаа бүх амьтантай үеийн үед байгуулах Миний гэрээний тэмдэг болой. ¹³Би үүлэнд солонгоо татуулж, тэр нь Миний дэлхийтэй байгуулсан гэрээний тэмдэг болно. ¹⁴Намайг газар дээр үүл хуралдуулахад, тэр үүлэн дээр солонго харагдахад, ¹⁵Би Миний болон та нарын, мах цустай бүх амьтны хооронд байгуулсан Өөрийн гэрээг санан дурсах болно. Ус дахин хэзээ ч мах цустай бүхнийг устгах үер болохгүй. ¹⁶Үүлэн дээр солонго татахыг Би хараад, Бурхан Миний болон дэлхий дээрх мах цустай хамаг амьтны хооронд байгуулсан мөнхийн гэрээгээ санан дурсах болно гэв. ¹⁷Бурхан Ноад
-Энэ бол Миний болон дэлхий дээрх хамаг амьтны хооронд Миний байгуулсан гэрээний тэмдэг болно гэв.
¹⁸Хөвөгч авдраас гарч ирсэн Ноагийн хөвгүүд нь Шем, Хам, Иафет нар бөгөөд Хам нь Канааны эцэг болой. ¹⁹Тэд бол Ноагийн гурван хөвгүүн бөгөөд хүмүүс тэднээс гарч дэлхий дээгүүр тархсан ажээ.
²⁰Ноа тариалангийн ажил эрхэлж, усан үзмийн мод тариалжээ. ²¹Үүний дараа тэрээр усан үзмийнхээ дарснаас ууж согтоод, майхан дотроо нүцгэн байв. ²²Канааны эцэг Хам эцгийнхээ нүцгэн байгааг хараад, гадагш гарч, хоёр ахдаа хэлжээ. ²³Шем, Иафет хоёр нэг дээл авч, мөрөн дээрээ нөмрөөд, ар тийшээ ухарсаар эцгийнхээ нүцгэн биед нөмөргөөд, нүцгэн байдлыг нь харахгүйн тулд нүдээ буруулав. ²⁴Ноагийн согтуу нь гарч, өөрийнх нь төлөө бага хүүгийнхээ юу хийснийг мэдээд
²⁵-Канааныг хараал идэж,
Тэр ах нарынхаа боолын боол болох болтугай ²⁶Бас тэрээр
-Шемийн Бурхан ЭЗЭНийг би магтъя.
Канаан Шемийн боол болох болтугай.
²⁷Бурхан Иафетыг агуу их болгож,
Иафетыг Шемийн асарт амьдруулж,
Канаан түүний боол болох болтугай! гэжээ.
²⁸Ноа үер болсноос хойш гурван зуун тавин жил наслаад, ²⁹есөн зуун тавин насандаа үхэв.