15 ¹Түүний дараа ЭЗЭНий үг Абрамд үзэгдлээр ирж,
-Абрам аа, бүү ай!
Би бол чиний бамбай,
Чиний шагнал агуу их болно. ²Абрам
-Эзэн БУРХАН! Та надад юу хайрлахсан бол? Би үр хүүхэдгүй учир миний өв залгамжлагч нь энэ Дамаскийн Елиезер юм гэв. ³Абрам цааш өгүүлрүүн
-Та надад ганц ч үр заяагаагүй. Тиймээс гэрт минь өссөн хүн л миний өв залгамжлагч болно гэсэнд ⁴ЭЗЭНий үг түүнд ирж
-Тэр хүн чиний өв залгамжлагч болохгүй, харин өөрийн чинь биеэс төрөх хүн л чиний өв залгамжлагч болно гээд, ⁵түүнийг гадагш дагуулан гараад
-Чи тэнгэр өөд хар, хэрэв оддыг тоолж чадваас тоол гэв. Тэр бас дахин түүнд
-Чиний үр удам ийм олон болно гэв. ⁶Тэгээд Абрам ЭЗЭНд итгэсэнд ЭЗЭН түүнийг зөвт байдалд тооцуулав. ⁷Тэрээр түүнд
-Би бол чамд энэ газар нутгийг өгч, өвлүүлэхээр чамайг Халдеин Ураас авчирсан ЭЗЭН байна гэхэд, ⁸Абрам
-Эзэн БУРХАН минь! Би энэ газрыг өвлөн авахаа хэрхэн мэдэх вэ? гэсэнд ⁹ЭЗЭН түүнд
-Надад зориулж гунжин үнээ, хязаалан эм ямаа, шүдлэн эр хонь, хүүрэлзгэнэ, тагтааны ангаахай ав гэв. ¹⁰Абрам тэр бүхнийг авч, тэднийг хоёр таллан хувааж, тал бүрийг өөд өөдөөс нь харуулан тавьжээ. Харин шувууг хуваасангүй. ¹¹Махчин шувууд тэдгээр сэгэн дээр бууж ирэхэд, Абрам тэднийг хөөв.
¹²Нар шингэх үеэр Абрамыг гүн нойрондоо унтаж байтал түнэр харанхуй болон аймшигт айдас түүнийг нөмрөв. ¹³ЭЗЭН Абрамд
-Чиний үр удмынхан өөрсдийнх нь бүс нутагт харь хүмүүс болоод, дөрвөн зуун жилийн турш зарцлагдаж, дарлагдах болно гэдгийг баттай мэдэж ав. ¹⁴Би тэднийг зарцлах үндэстэнг нь шүүнэ. Түүний дараа чиний үр удам их эд юмстай гарч ирнэ. ¹⁵Харин чи урт наслаад, өвөг дээдэс уруугаа амар тайвнаар очиж, ясаа тавих болно. ¹⁶Дөрөв дэх үедээ чиний үр удам энэ нутаг уруугаа эргэж ирнэ. Учир нь аморичуудын гэм нүгэл нь арай дүүрээгүйгээс тэр болой. ¹⁷Нар шингэж харанхуй болох үед утаат зуух болон нөгөө хуваагдсан махнуудыг дайран гарсан галт бамбар үзэгджээ. ¹⁸Тэр өдөр ЭЗЭН Абрамтай гэрээ байгуулж
-Би энэ газрыг, Египет мөрнөөс их мөрөн Евфрат хүртэл
Чиний үр удмынханд өгсөн билээ. ¹⁹Тэр бол кенчүүд, кенизчүүд, кадмончууд, ²⁰хитчүүд, перизчүүд, рефаимчууд, ²¹аморичууд, канаанчууд, гиргашчууд, иебусчуудын газар нутаг юм гэв.