16 ¹Абрамын эхнэр Сараи түүнд ямар ч хүүхэд төрүүлээгүй ажээ. Тэрээр Хагар нэртэй нэгэн Египет зарц бүсгүйтэй байв. ²Сараи Абрамд
-ЭЗЭН намайг төрөхийг зөвшөөрсөнгүй. Тийм учраас та миний зарц бүсгүйтэй унтана уу? Би түүгээр дамжуулан хүүхэдтэй болж магадгүй гэсэнд Абрам Сараигийн үгэнд оржээ. ³Абрамыг Канаанд арван жил суусны дараа Абрамын эхнэр Сараи Хагар гэдэг Египет зарц бүсгүйгээ авчирч, өөрийн нөхөр Абрамд татвар эм болгон өгчээ. ⁴Тэгээд Абрам Хагартай унтсанд, Хагар жирэмслэв. Хагар өөрийн жирэмсэн болсноо мэдээд, өөрийн эзэгтэйг доромжлох болов. ⁵Сараи Абрамд
-Миний хийсэн алдаа тан дээр буух болтугай! Би зарц бүсгүйгээ таны гарт өгсөн. Одоо тэрээр жирэмсэн болсноо мэдээд, намайг доромжилж байна. Та бид хоёрын хоорондохыг ЭЗЭН шүүг гэв. ⁶Абрам Сараид
-Чиний зарц бүсгүй чиний л гарт байна. Чи түүнийг яамаар байна, түүнийгээ л хий гэв. Тэгээд Сараи Хагартай ширүүн харьцсанд Хагар түүнээс зугтаажээ.
⁷ЭЗЭНий тэнгэр элч цөлийн нэгэн булгийн дэргэдээс, Шур хүрэх зам дахь булгийн дэргэдээс Хагарыг олж,
⁸-Сараигийн зарц бүсгүй Хагар аа! Чи хаанаас ирээд, хаашаа явж байна вэ? гэсэнд тэрээр
-Би өөрийн эзэгтэй Сараигаас зугтаж явна гэж хариулжээ. ⁹ЭЗЭНий тэнгэр элч түүнд
-Чи эзэгтэйдээ буцаж очоод, гарын дор нь дуулгавартай бай гээд, ¹⁰ЭЗЭНий тэнгэр элч түүнд бас
-Би чиний үр хүүхдүүдийг ихэд өнөр өтгөн, тоолж баршгүй болгоё гэв. ¹¹ЭЗЭНий тэнгэр элч түүнд бас
-Чи одоо жирэмсэн байна.
Чи хүү төрүүлнэ.
Түүнийг Ишмаел гэж нэрлэ.
Энэ нь ЭЗЭН чиний зовлонг сонссоных болой.
¹²Тэрээр хүмүүсийн дунд зэрлэг илжиг мэт болно.
Түүний гар хүн бүхнийг цохиж,
Хүн бүхний гар түүнийг цохих бөгөөд
Бас тэрээр хамаг ах дүүсийнхээ эсрэг талд амьдрах болно ¹³Хагар өөртэйгөө ярьсан ЭЗЭНийг “Та бол хардаг Бурхан” гэж нэрлэжээ. Учир нь Хагар “Түүнийг харсны дараа би энд амьд үлдлээ гэж үү?” хэмээв. ¹⁴Тийм учраас тэр булгийг Беер-лахаи-рои хэмээн нэрлэсэн бөгөөд тэр нь Кадеш, Беред хоёрын хооронд байжээ.
¹⁵Тэгээд Хагар Абрамд хүү төрүүлсэн ба Хагарын төрүүлсэн тэр хүүд Абрам Ишмаел гэдэг нэр өгөв. ¹⁶Хагар Ишмаелыг Абрамд төрүүлж өгөхөд Абрам наян зургаан настай байжээ.