27 ¹Түүнээс гадна ЭЗЭНий үг надад ирж,
²-Хүний хүү чи Тирийн тухай гашуудлыг гарга. ³Далайн үүдэнд оршиж, олон эргүүдийн хүмүүсийн худалдааны газар болох Тирт өгүүл. “Эзэн БУРХАН ийнхүү айлдаж байна.
“Тир ээ. “Би төгс үзэсгэлэнтэй юм” хэмээн чи өгүүлэв.
⁴Чиний хил хязгаар нь далайн зүрхэнд буй,
чамайг босгогчид чиний үзэсгэлэнг төгс болгов.
⁵Тэд Сенирийн гацуур модоор чиний хамаг банзнуудыг хийж,
тэд чамд шураг хийхээр Ливаны хуш модыг авав.
⁶Башаны царс модоор тэд чамд сэлүүрүүдийг хийж,
Киприйн арлуудын нарс модоор хийсэн чиний тавцанг тэд зааны соёогоор шигтгэсэн.
⁷Чиний дарвуул нь Египетийн нэхмэл маалингаар хийгдсэн ба
энэ нь чиний ялгах тэмдэг болов.
Чиний сүүдрэвч нь Елишагийн арлуудаас авчирсан хөх, нил ягаан өнгийн бөс даавуу байжээ.
⁸Сидон, Арвадын оршин суугчид чиний сэлүүрчид байв.
Тир ээ, чиний мэргэн хүмүүс онгоцон дотор чиний залуурчид байв.
⁹Гебалын ахмадууд болон түүний мэргэн хүмүүс нь чамтай хамт чиний эвдрэлийг засаж байв.
Далайн хамаг онгоц болон тэдний усан цэргүүд нь чиний худалдаа наймаанд оролцохын тулд чамтай хамт байв.
¹⁰Перс, Луд ба Пут нь чиний цэрэгт, чиний дайчдын дунд байв. Тэд чиний дотор бамбай, дуулгыг зүүжээ. Тэд чиний сүр жавхланг нэмэв. ¹¹Арвадын хөвгүүд болон чиний цэргүүд эргэн тойронд чиний хэрмэн дээр байсан бөгөөд гаммадчууд чиний цамхагт байв. Тэд эргэн тойронд чиний хэрмэн дээр бамбайнуудаа өлгөж, чиний үзэсгэлэнг төгс болгосон.
¹²Бүх төрлийн эд баялгаар дүүрэн байсан учраас Таршиш нь чиний худалдан авагч байсан. Тэд чиний барааг мөнгө, төмөр, цагаан тугалга ба хар тугалгаар худалдан авч байв. ¹³Иаван, Тубал, Мешех нар чиний худалдаачид байсан. Хүний амь, хүрэл саваар тэд чиний барааг солилцож байв. ¹⁴Бет-тогармагаас ирсэн хүмүүс чиний эд барааны үнэд морьд, дайны морьд, илжигнүүдийг өгсөн. ¹⁵Деданы хөвгүүд чиний худалдаачид байсан. Олон эрэг хавийн газрууд чиний зах зээл болж байсан. Тэд зааны яс, хар модыг төлбөр болгон чамд авчирч байв. ¹⁶Чиний барааны элбэг дэлбэгээс болж Арам нь чиний худалдан авагч байсан. Тэд чиний барааг маргад чулуу, нил өнгийн бөс, нэхсэн даавуу, нарийн маалинга, шүр хийгээд бадмаараг чулуугаар худалдан авч байв. ¹⁷Иуда болон Израиль нь чиний худалдаачид байсан. Тэд чиний барааг Миннитийн улаан буудай, боов, зөгийн бал, тос болон гавраар худалдан авч байсан. ¹⁸Чиний барааны элбэгээс болж, бүх төрлийн баялаг эрдэнэсийн элбэгээс болж, Хелбоны дарс болон цагаан ноосноос болж Дамаск нь чиний худалдан авагч байсан. ¹⁹Ведан ба Иаван нь Узалаас чиний барааны үнийг төлж байсан. Чиний барааны дотор ширэм, шанц болон амтат чихрийн нишингэ байв. ²⁰Дедан нь эмээлийн тохмоор чамтай худалдаа хийж байв. ²¹Араб болон Кедарын хамаг ноёд хурганууд, хуцнууд болон ямаануудаар чиний худалдан авагчид байсан. ²²Шеба ба Раамагийн худалдаачид чамтай худалдаа хийж байсан. Тэд чиний барааг бүх төрлийн халуун ногооны дээдээр, бүх төрлийн эрдэнийн чулуу ба алтаар төлж байсан. ²³Харан, Канне, Еден, Шебагийн наймаачид, Асшур болон Хилмад нар чамтай худалдаа хийж байв. ²⁴Тэд чамтай тансаг дээлүүд, хөх өнгийн хувцаснууд, нэхмэл бөс болон эрээн хивс, чанга гөрсөн олсоор худалдаа хийж байв. ²⁵Таршишийн онгоцнууд нь чиний барааг зөөж байв.
Чи дүүрч, далайн зүрхэнд ихэд алдаршив.
²⁶Чиний сэлүүрчид чамайг их усанд хүргэж,
дорнын салхи чамайг далайн дунд цохиж эвдэв.
²⁷Чиний сүйрлийн өдөрт чиний баялаг, чиний ачаа, чиний эд бараа,
чиний далайчид, чиний залуурчид, чиний эвдрэлийг засагчид,
чиний барааны худалдаачид, чиний дотор буй бүх дайчид, чиний дунд буй хамаг чуулгантай хамт далайн дунд живэх болно.
²⁸Залуурчдын хашхирах дуунд бэлчээр нутгууд доргих болно.
²⁹Сэлүүрийг баригч бүх далайчид ба тэнгисийн залуурчид хөлөг онгоцнуудаасаа буух болно.
Тэд газар дээр зогсоно.
³⁰Тэд чиний төлөө дуу хоолойгоо өндөрсгөн, гашуунаар уйлах болно.
Тэд өөрсдийнхөө толгойд шороо цацан, үнсэн дотор хөлбөрөх болно.
³¹Бас тэд чиний төлөө өөрсдийгөө халзан болгож, өөрсдийгөө таараар хувцаслана.
Тэд чиний төлөө сэтгэл шимшрэм гашуудан уйлах болно.
³²Түүнээс гадна уйлах дуундаа тэд чиний төлөө гашуудлын дууг гарган, гашуудан дуулах болно.
“Хэн Тиртэй адил, хэн түүнтэй адил далайн дунд чимээгүй байна вэ?
³³Чиний ачаанууд далайгаас гарахад чи олон ард түмнийг цатгажээ.
Өөрийнхөө баялаг эрдэнэс болон эд барааны элбэг дэлбэгээр чи газрын хаадыг баяжуулав.
³⁴Одоо чи усны гүнд далайгаар сүйтгэгдэхэд чиний эд бараа болон чиний хамаг чуулган чиний голд унав.
³⁵Эргийн газруудын хамаг оршин суугчид чамайг харан гайхаж байна.
Тэдний хаад нь ихэд айж байна.
Тэдний царай нь түгшүүрт автжээ.
³⁶Ард түмнүүдийн дундах худалдаачид чам уруу исгэрч,
чи айдас түгшүүр болж, хойшид байхгүй болно””” гэв.