24 ¹Израилийг ерөөх нь ЭЗЭНд таалагдсаныг Балаам хараад, тэрээр урьдын адил ёр хайн явсангүй, харин нүүрээ цөл уруу хандуулав. ²Балаам нүдээ өргөн, овог овгоороо буудаллан буй Израилийг харав. Бурханы Сүнс түүн дээр ирлээ. ³Тэр сургаалт зүйрлэлээр ярин өгүүлсэн нь
-Беорын хүү Балаамын зөн ба
нүд нь нээлттэй хүний зөн.
⁴Бурханы үгсийг сонсдог,
Төгс Хүчит Нэгэний үзэгдлийг үздэг,
унадаг боловч нүд нь халхлагдаагүй хүний зөн.
⁵Иаков аа, чиний майхнууд,
Израиль аа, чиний сууцнууд ямар үзэсгэлэнтэй вэ!
⁶Сунайсан уудам хөндийнүүд мэт,
голын хажуугаарх цэцэрлэгүүд мэт,
ЭЗЭНий тарьсан зуун настууд мэт,
усны дэргэдэх хушнууд мэт.
⁷Түүний хувингуудаас ус урсах агаад
түүний үр нь их усны дэргэд байж,
түүний хаан нь Агагаас илүү өндөр байх бөгөөд
түүний хаанчлал нь өргөмжлөгдөх болтугай.
⁸Бурхан түүнийг Египетээс гаргадаг,
Тэр бол түүний хувьд зэрлэг үхрийн эвэр мэт болой.
Өөрийн дайсан болох үндэстнүүдийг тэр цөлмөж,
ясыг нь хэсэгчин бяцлаж,
өөрийн сумаараа тэднийг хэмхчинэ.
⁹Тэр тухлан арслан мэт хэвтэнэ.
Арслан мэт түүнийг босгож хэн зүрхлэх вэ?
Чамайг ерөөх бүхэн ерөөгдөх агаад
чамайг хараах бүхэн хараагдах болтугай ¹⁰Тэгэхэд Балаамын эсрэг Балакийн уур шатаж, тэр түүний хоёр гарыг нь цохив. Балак Балаамд
-Би чамайг өөрийн дайснуудыг хараалгахаар дуудсан билээ. Гэтэл харагтун, чи ийнхүү гурван удаа тэднийг ерөөхөө үргэлжлүүлсээр байлаа. ¹¹Иймийн тул одоо өөрийн газар уруугаа зугтагтун. Би чамайг үлэмж хүндэтгэх байсан гэдгээ хэлсэн. Гэтэл харагтун, ЭЗЭН чамайг хүндлэлээс буцаан татав гэв. ¹²Балаам Балакт хандан
-Чиний над уруу илгээсэн элч нарт би ¹³“Балак мөнгө алтаар дүүрэн өөрийн гэрийг надад өгөх байсан ч гэсэн, ЭЗЭНий тушаалын эсрэг би өөрийн хүслээр сайныг ч, мууг ч юу ч хийж чадахгүй. ЭЗЭН юу айлдсаныг л би ярих болно” гэж хэлээгүй гэж үү? ¹⁴Одоо харагтун, Би өөрийн ард түмэн уруу явах гэж байна. Ирэгтүн, ирэх өдрүүдэд энэ ард түмэн чиний ард түмэнд юуг хийхийг би чамд зөвлөн хэлье гэлээ. ¹⁵Тэр сургаалт зүйрлэлээр ярин, хэлсэн нь
-Беорын хүү Балаамын зөн ба
нүд нь нээлттэй хүний зөн.
¹⁶Бурханы үгсийг сонсдог ба
Хамгийн Дээд Нэгэний мэдлэгийг мэддэг,
Төгс Хүчит Нэгэний үзэгдлийг үздэг,
унадаг боловч нүд нь халхлагдаагүй хүний зөн.
¹⁷Би түүнийг хардаг, харин одоо биш.
Би түүнийг үздэг, харин ойр биш.
Иаковаас од гарч ирэн,
Израилиас очирт таяг босож,
Моабын магнайг нэвт цөмлөн,
Шетийн бүх хөвгүүдийг нураана.
¹⁸Израилийг хүчээ авах зуур
Едом нь эзлэгдэж,
Сеир болон түүний дайснууд ч бас эзлэгдэнэ.
¹⁹Иаковаас нэг нь ноёрхож,
хотоос үлдэгсдийг устгах болно гэв.
²⁰Амалек уруу тэр харан, сургаалт зүйрлэлээр ярин,
-Амалек нь үндэстнүүдийн тэргүүн байсан боловч,
түүний төгсгөл нь сүйрэл болно гэлээ.
²¹Тэр Кенийг харан, сургаалт зүйрлэлээр ярин,
-Чиний сууц удаан бат тогтвортой бөгөөд
чиний үүр хаданд засагджээ.
²²Гэсэн ч Каин нь шатаагдана.
Асшур нь чамайг хир удаан олзонд байлгах вэ? гэв.
²³Дараа нь тэр сургаалт зүйрлэлээр ярин,
-Аяа, Бурхан үүнийг хийж байхад хэн амьдарч чадах вэ?
²⁴Гэвч хөлөг онгоцнууд Киттимийн эргээс ирж,
тэдгээр нь Асшурыг, Еберийг зовооно.
Тийнхүү тэд ч бас сүйрнэ ²⁵Ингээд Балаам босож, өөрийн нутаг уруугаа салан явсан бөгөөд Балак ч өөрийн замаар явав.