23 ¹Тэгээд Балаам Балакт
-Энд надад зориулан долоон тахилын ширээг босго. Энд надад зориулан долоон бух, долоон хуцыг бэлтгэгтүн гэлээ. ²Балаамын хэлсэн ёсоор Балак хийв. Балак, Балаам нар тахилын ширээ бүр дээр бух болон хуцыг өргөв. ³Тэгээд Балаам Балакт хандан
-Шатаалт тахилынхаа дэргэд зогс. Би явъя. ЭЗЭН надтай уулзахаар ирж магад. Түүний надад үзүүлсэн бүхнийг би чамд хэлнэ гэв. Тийнхүү тэр нүцгэн толгод уруу явлаа. ⁴Бурхан Балаамтай уулзсан бөгөөд тэр Түүнд
-Би долоон тахилын ширээг босгосон. Тахилын ширээ бүр дээр би бух болон хуцыг өргөв хэмээн өгүүллээ. ⁵Тэгээд ЭЗЭН Балаамын аманд үг хийгээд
-Балак уруу буцан очиж, ийнхүү хэлтүгэй гэв. ⁶Тиймээс тэр түүн уруу буцан очлоо. Харагтун, тэр болон Моабын бүх удирдагчид шатаалт тахилынхаа дэргэд зогсож байв. ⁷Тэр сургаалт зүйрлэлээр ярин, хэлсэн нь
-Моабын хаан Балак намайг Арамаас,
Дорнын уулсаас авчирч,
“Ирж, миний төлөө Иаковыг хараагтун.
Ирж, Израилийг буруушаагтун” гэв.
⁸Бурханы хараагаагүй хүнийг
би хэрхэн хараах билээ?
ЭЗЭНий буруушаагаагүй хүнийг
би хэрхэн буруушааж чадах билээ?
⁹Би түүнийг хадны оройгоос харан,
толгодоос ажиглаад,
харагтун, үндэстнүүдийн дунд тоологдохооргүй,
ангид орших ард түмэн байна.
¹⁰Иаковын тоосыг хэн тоолж чадах вэ?
Израилийн дөрөвний нэгийг хэн тоолж чадах вэ?
Шударга зөвийн үхлээр намайг үхүүлтүгэй,
төгсгөл маань түүнийхтэй адил байх болтугай ¹¹Тэгэхэд Балак Балаамд
-Чи надад юу хийчихэв ээ? Би чамайг дайснаа хараалгахаар авчирсан. Гэтэл харагтун, чи чухамдаа тэднийг ерөөлөө гэв. ¹²Тэр хариу болгон
-ЭЗЭН миний аманд хийсэн зүйлийг ярихыг би анхаарах ёсгүй гэж үү? гэлээ.
¹³Дараа нь Балак түүнд
-Чи тэднийг бүхэлд нь биш, зөвхөн тэдний хамгийн наад захыг нь л харах хэдий ч тэднийг харж болох өөр газар уруу надтай хамт яваач. Тэндээс чи миний төлөө тэднийг хараагтун гэлээ. ¹⁴Ингээд тэр түүнийг Писгагийн орой өөд Зофимийн бэлчээр уруу аваачиж, долоон тахилын ширээг босгон, тахилын ширээ бүр дээр бух, хуцыг өргөв. ¹⁵Тэр Балакт
-Тээр тэнд би өөрөө ЭЗЭНтэй уулзаж байх зуур, шатаалт тахилынхаа дэргэд энд зогсож байгтун гэв. ¹⁶Дараа нь ЭЗЭН Балаамтай уулзаж, түүний аманд үгийг хийгээд,
-Балак уруу буцан очиж, чи ингэж хэлтүгэй хэмээн айлдав. ¹⁷Тэр түүн уруу очлоо. Харагтун, тэр болон түүнтэй хамт Моабын бүх удирдагчид шатаалт тахилынхаа дэргэд зогсож байв. Балак түүнээс
-ЭЗЭН юу айлдав? гэж асуув. ¹⁸Тэгэхэд тэр сургаалт зүйрлэлээр ярин, хэлсэн нь
-Балак аа, босож сонсогтун.
Зиппорын хүү, над уруу чих тавь!
¹⁹Бурхан бол худал хэлдэг хүн биш,
гэмшин харамсдаг хүний хүү ч биш.
Тэрээр айлдчихаад,
Тэр түүнийгээ хийхгүй гэж үү?
Эсвэл Тэр ярьчихаад,
Тэр түүнийгээ сайн болгохгүй гэж үү?
²⁰Харагтун, ерөөх тушаалыг би хүлээн авсан.
Тэр ерөөсөн байхад
би түүнийг нь зөрчиж чадахгүй.
²¹Тэр Иаковын дотор гэм бурууг ажиглаагүй.
Израилийн дотор Тэр зовлонг хараагүй.
Түүний Бурхан ЭЗЭН түүнтэй хамт байгаа,
хааны уухай тэдний дунд байна.
²²Бурхан тэднийг Египетээс гарган авчирдаг
Тэр бол тэдний хувьд зэрлэг үхрийн эвэр мэт юм.
²³Учир нь Иаковын эсрэг ямар ч ёр алга,
Израилийн эсрэг аливаа мэргэ төлөг байхгүй.
Бурханы юу хийсэн нь зохистой цагт Иаков болон Израильд хэлэгдэх болтугай.
²⁴Харагтун, ард түмэн эм арслан мэт өндийж байна.
Арслан мэт тэр өөрийгөө өргөнө.
Тэр олзоо залгитлаа,
алагдагсдын цусыг уутлаа доош хэвтэхгүй ²⁵Тэгэхэд нь Балак Балаамд
-Тэднийг ердөө бүү хараа, ердөө бүү ерөөгтүн гэв. ²⁶Гэвч Балаам хариуд нь Балакт
-“ЭЗЭНий айлдсан болгоныг би хийх ёстой” хэмээн би чамд хэлээгүй гэж үү? гэв.
²⁷Тэгэхэд Балак Балаамд
-Ирээч, би чамайг өөр газарт аваачъя. Тэндээс чи миний төлөө тэднийг хараах нь Бурханы мэлмийд зөв байж магад гэв. ²⁸Тийнхүү Балак зэлүүд нутаг уруу харах Пеорын оройд Балаамыг аваачив. ²⁹Балаам Балакт
-Энд надад долоон тахилын ширээг босго. Энд надад долоон бух, долоон хуцыг бэлтгэгтүн гэлээ. ³⁰Балаамын хэлсэн ёсоор Балак хийсэн бөгөөд тахилын ширээ бүр дээр бух болон хуцыг өргөв.