21 ¹Негевд амьдарч байсан Арадын хаан, канаан хүн нь Израилийг Атаримын замаар ирж явааг сонсоод Израилийн эсрэг дайтаж, тэдний заримыг нь олзлов. ²Тиймээс Израиль ЭЗЭНд андгайлан
-Хэрэв Та үнэхээр энэ ард түмнийг миний гарт өгөх аваас би тэдний хотуудыг бүрмөсөн устгах болно гэв. ³ЭЗЭН Израилийн дуу хоолойг сонсож, канаанчуудыг тэдэнд тушаав. Тэгээд израильчууд тэднийг болон хотуудыг нь бүрмөсөн устгав. Тийнхүү тэр газрын нэрийг Хорма гэх болжээ.
⁴Дараа нь тэд Едомын нутгийг тойрон явахаар Улаан тэнгисийн замд буй Хор уулаас хөдөлсөн юм. Аяны улмаас ард түмэн тэвчээргүй болов. ⁵Ард түмэн Бурханы болон Мосегийн эсрэг ярьж
-Энэ цөл газарт үхүүлэхээр юунд чи биднийг Египетээс гарган авчрав? Учир нь энд талх ч алга, ус ч алга. Бид энэ заваан хүнсийг жигшиж байна гэцгээлээ. ⁶ЭЗЭН ард түмний дунд галт могойнуудыг илгээхэд, тэд ард олныг хатгажээ. Ингэснээр Израилийн олон хүн үхэв. ⁷Тиймээс ард түмэн Мосе уруу ирж
-Бид ЭЗЭН болон таны эсрэг ярьснаас болж нүглийг үйлдэв. Биднээс могойнуудыг зайлуулахаар ЭЗЭНд зуучлан залбираач гэв. Мосе ард олны төлөө зуучлан залбирав. ⁸Тэгтэл ЭЗЭН Мосед
-Галт могой хийж, түүнийг шургаагны оройд байрлуулагтун. Тэгвэл хатгуулсан хүн бүр түүнийг хараад амьдрах болно гэв. ⁹Мосе хүрэл могойг хийж, түүнийг шургаагны оройд байрлуулав. Хэрвээ хэн нэгэн хүнийг могой хатгасан байвал, тэр хүн хүрэл могойг хараад амьдарч байлаа.
¹⁰Ингээд Израилийн хөвгүүд нүүж Оботод буудаллав. ¹¹Тэд Оботоос аялан явж, зүүн зүгт Моабын харалдаа орших цөл дэх Иеабаримд буудаллав. ¹²Тэндээс тэд хөдөлж, Вади-Зередэд буудаллаа. ¹³Тэндээс тэд аялан, аморичуудын хил хүртэл үргэлжлэх цөл дэх Арноны нөгөө талд буудаллажээ. Учир нь Арнон бол Моаб, аморичуудын хоорондох Моабын хил хязгаар нь байв. ¹⁴Тиймээс ч үүнийг ЭЗЭНий Дайны Номд
“Суфа дахь Вахеб ба Арноны Вадис,
¹⁵Арын талбай уруу сунан,
Моабын хил хязгаарыг түшсэн Вадисын хормой” ¹⁶Тэндээс тэд ЭЗЭНий Мосед “Ард олныг цуглуулагтун. Би тэдэнд ус өгье” хэмээн айлдсан худаг болох Беер уруу явав.
¹⁷Дараа нь Израиль энэхүү дууг дууллаа.
-Оргилогтун, худаг аа! Түүнд дуулагтун.
¹⁸Удирдагчдын малтаж,
ард олны язгууртнуудын очирт таягаар болон
тэдний таягуудаар ухсан худаг. ¹⁹Маттанагаас Нахалиел уруу, Нахалиелаас Бамот уруу, ²⁰Бамотаас зэлүүд нутаг уруу харсан Писгагийн өндөрлөг дээр орших Моабын нутаг дахь хөндий уруу явав.
²¹Дараа нь Израиль аморичуудын хаан Сихонд элч нарыг илгээн,
²²-Танай нутгаар намайг дамжин өнгөрүүлээч. Бид тариан талбай, эсвэл усан үзмийн цэцэрлэг уруу хазайхгүй. Бид худгуудаас ус уухгүй. Бид танай нутгийн хилээр өнгөртөл хааны их замаар л явах болно гэлээ. ²³Гэвч Сихон нь өөрийн хилээр дамжин өнгөрөхийг Израильд зөвшөөрсөнгүй. Тэгээд Сихон өөрийн бүх ард түмнийг цуглуулан, цөлд Израилийг эсэргүүцэхээр гарч, Иахаз уруу ирж Израилийн эсрэг дайтав. ²⁴Тэгээд Израиль түүнийг илдний ирээр цохиж, Арнонаас Иаббок хүртэл, Аммоны хөвгүүдийг хүртэлх түүний газрыг эзлэн авав. Учир нь Аммоны хөвгүүдийн хил нь Иазер байлаа. ²⁵Израиль тэдгээр бүх хотуудыг авсан бөгөөд аморичуудын бүх хотуудад, Хешбон болон түүний бүх тосгодод Израиль амьдрав. ²⁶Учир нь Хешбон нь аморичуудын хаан Сихоны хот байлаа. Тэрээр Моабын өмнөх хааны эсрэг дайтан, Арнон хүртэлх түүний бүх нутгийг гараас нь авчээ. ²⁷Тиймээс зүйр үгээр яригсад нь
“Хешбонд ирэгтүн.
Тэр нь босгогдог!
Сихоны хот нь байгуулагдаг.
²⁸Учир нь Хешбоноос гал,
Сихоны хотоос дөл гарчээ.
Тэр нь Моабын Арыг,
Арноны ноёрхогч өндөрлөгүүдийг цөлмөв.
²⁹Моаб аа, чамд гай ирэг!
Хемошийн ард олон оо, та нар сүйрсэн байна!
Тэрээр Аморийн хаан Сихонд өөрийн хөвгүүдийг оргодол мэт өгч,
өөрийн охидыг олзлуулав.
³⁰Гэвч бид тэднийг доош хаяж,
Хешбон нь Дибоныг хүртэл сүйрэв.
Дараа нь бид Медеба хүртэл тэлсэн Нофаг хүртэл бут ниргэв” ³¹Ийнхүү Израиль нь аморичуудын нутагт амьдрав. ³²Иазерыг тагнахаар Мосе хүн илгээжээ. Тэд тосгодыг нь эзэлж, тэнд байсан аморичуудыг хөөв.
³³Дараа нь тэд эргэж, Башаны замаар өгсөв. Башаны хаан Ог Едреид дайтахаар өөрийн бүх ард түмэнтэй хамт гарав. ³⁴Гэвч ЭЗЭН Мосед
-Түүнээс бүү ай. Учир нь түүнийг болон түүний бүх ард түмнийг, түүний нутгийг Би чиний гарт өгсөн. Хешбонд амьдарч байсан аморичуудын хаан Сихонд үйлдсэний адил чи түүнд үйлдэгтүн гэж айлдав. ³⁵Тиймээс тэд түүнийг болон хөвгүүдийг нь, бүх ард түмнийг нь ганц ч хүн үлдэхгүй болтол нь хядаж, нутгийг нь эзэмшив.