19 ¹Хезекиа хаан үүнийг сонсмогц, хувцсаа урж, таар нөмрөн, ЭЗЭНий өргөөнд оров. ²Тэрээр ордны даамал Елиаким, гүүш Шебнаг тахилч нарын настангуудын хамт таар нөмөргөн, Амозын хүү эш үзүүлэгч Исаиа уруу илгээв. ³Тэд Исаиад
-Хезекиа ингэж хэлэв “Энэ өдөр бол зовлон, зэмлэл, гутамшгийн өдөр юм. Учир нь төрж буй хүүхэд умайн амсарт ирсэн боловч төрүүлэх чадвар алга. ⁴Амьд Бурханыг доромжлохоор өөрийн эзэн Ассирийн хаанаас илгээгдсэн Рабшакегийн үгийг таны Бурхан ЭЗЭН сонсох биз. Таны Бурхан ЭЗЭН сонссон үгийнхээ төлөө түүнийг зэмлэнэ биз. Тиймээс үлдсэн амьд хүмүүсийн төлөө залбирлаа өргөөч” хэмээв гэжээ. ⁵Ингээд Хезекиа хааны зарц нар Исаиа уруу ирэв. ⁶Исаиа тэдэнд
-Та нар эзэндээ ингэж хэлэгтүн. “ЭЗЭН ийн айлдаж байна “Намайг доромжилсон Ассирийн хааны боолуудын үгс буюу чамд сонсогдсон тэдгээр үгсээс болж бүү айгтун. ⁷Үзэгтүн, Би түүний дотор нэг сүнс тавихад, тэр нэг мэдээ сонсоод өөрийн нутагтаа буцна. Би түүнийг нутагт нь илдээр унагана” хэмээв” гээрэй гэж хэлжээ.
⁸Дараа нь Рабшаке буцаж ирээд, Ассирийн хаанд Лахишийг орхисныг сонсоод, түүнийг Либнагийн эсрэг дайтаж байхад нь олов. ⁹Мөн Кушийн хаан Тирхакагийн тухайд
-Үзэгтүн, тэр өөрийн чинь эсрэг дайтахаар хөдөлсөн гэхийг сонсоод, тэр Хезекиад элч нарыг илгээж,
¹⁰-Иудагийн хаан Хезекиад та нар ингэж хэл. “Чиний итгэдэг Бурхан “Иерусалим Ассирийн хааны гарт өгөгдөхгүй” хэмээн чамайг бүү мэхлэг. ¹¹Үзэгтүн, Ассирийн хаад бүх газруудыг бүрэн устгаж, юу хийснийг нь чи сонссон билээ. Тэгэхээр чи аврагдана гэж үү? ¹²Гозан, Харан, Резеф мөн Телассарт байсан Едений хөвгүүдийг миний эцэг өвгөд устгахад, тэр үндэстнүүдийн бурхад тэднийг аварсан уу? ¹³Хаматын хаан, Арпадын хаан, Сефарваим хотын хаан болон Хена, Иввагийн хаад хаана байна?” гээрэй гэв.
¹⁴Тэгээд Хезекиа элч нарын гараас захидлыг авч уншаад, ЭЗЭНий өргөө уруу явж, уг захидлыг ЭЗЭНий өмнө дэлгэв. ¹⁵Хезекиа ЭЗЭНий өмнө залбиран,
-Херубуудын дээр залрагч, Израилийн Бурхан болох ЭЗЭН, Та бол дэлхий дээрх бүх хаанчлалуудын ганц Бурхан мөн. Та тэнгэр, газрыг бүтээсэн билээ. ¹⁶ЭЗЭН, чих тавин сонсооч. ЭЗЭН, мэлмий талбин хараач. Амьд Бурханыг доромжлохоор Сеннахерибын илгээсэн үгсийг сонсооч. ¹⁷ЭЗЭН, Ассирийн хаад үнэхээр үндэстнүүдийг болон тэдний газар нутгийг сүйтгээд, ¹⁸тэдний бурхдыг галд хаясан. Учир нь тэдгээр нь бурхад бус, харин хүний гарын бүтээл, мод, чулуу байв. Тиймээс тэд устсан билээ. ¹⁹Бидний Бурхан ЭЗЭН, дэлхийн бүх хаанчлалуудад, ЭЗЭН, Та бол цорын ганц Бурхан гэдгийг мэдүүлэхийн тулд одоо биднийг түүний гараас авраач гэж би залбирч байна гэв.
²⁰Тэгээд Амозын хүү Исаиа Хезекиад илгээн,
-Израилийн Бурхан ЭЗЭН ингэж айлдаж байна. “Ассирийн хаан Сеннахерибын талаар чи Надад залбирсан учраас Би чамайг сонслоо” гэв. ²¹Түүний эсрэг ЭЗЭНий айлдсан үг энэ юм.
“Чамайг Сионы онгон охин басамжлан, элэглэв.
Чиний араас Иерусалимын охин толгойгоо сэгсрэв.
²²Чи хэнийг басамжлан, доромжилсон бэ?
Чи хэний эсрэг дуугаа өндөрсгөн, ихэмсгээр нүдээ өргөв?
Израилийн Ариун Нэгэний эсрэг!
²³Чи элч нараараа дамжуулан Эзэнийг доромжилж,
“Би өөрийн олон тэргээр уулсын өндөрлөгүүдэд,
Ливаны хамгийн алслагдсан хэсгүүдэд хүрлээ.
Би тэндхийн өндөр хуш, шилмэл нарс моддыг тас цавчлаа.
Би түүний хамгийн өндөр оргил, хамгийн өтгөн ойд нэвтрэн орсон билээ.
²⁴Би малтаж, харийн ус ууж,
хөлийнхөө улаар Египетийн бүх голыг хатаасан билээ” гэжээ.
²⁵Чи сонсоогүй юм уу?
Би үүнийг өнө эртнээс төлөвлөж,
дээр үед хийсэн юм.
Чамаар бэхлэгдсэн хотуудыг нуранги балгас болгон эргүүлэхийн тулд
одоо Би үүнийг биелүүлэхээр авчирлаа.
²⁶Ийм учраас тэдний оршин суугчид чадал дутаж,
айн түгшиж, ичгүүрт орсон.
Тэд хээр талын өвс, ногоо шиг,
байшингийн орой дээрх ургаж нахиалахаасаа өмнө хатдаг өвс мэт болов.
²⁷Гэвч Би чиний суух, гарах, орохыг болон
Миний эсрэг уурлахыг чинь ч мэднэ.
²⁸Чи миний эсрэг уурлаж,
чиний дээрэлхүү зан Миний чихэнд хүрсэн учраас
Би Өөрийн дөрийг чиний хамарт зүүж,
амыг чинь хазаарлаж,
ирсэн замаар чинь чамайг буцаана.
²⁹Тэгээд энэ нь чамд тэмдэг болно. Энэ жил чи юу ургасныг нь идэж, хоёр дахь жилд мөн түүнээс юу гарсныг нь идэж, гурав дахь жил нь тарьж хураан, усан үзэм тариалж, түүнийхээ үр жимсийг идэх болой. ³⁰Иудагийн гэрийн амьд үлдэгсэд дахин доогуураа үндэслэн, дээгүүрээ үр жимс гаргах болно. ³¹Учир нь Иерусалимаас үлдэгсэд, Сион уулаас аврагдагсад гарч ирнэ. ЭЗЭНий зүтгэл үүнийг гүйцэлдүүлнэ. ³²Тийм учраас Ассирийн хааны талаар ЭЗЭН ингэж айлдаж байна “Тэр энэ хот уруу ирэхгүй, нум сумаар ч харвахгүй. Хотын өмнө тэрээр бамбайтай ирэхгүй, бүслэлт овоо ч босгохгүй. 3³Тэр ирсэн замаараа буцах болно. Тэр энэ хот уруу ирэхгүй” гэв” гэж ЭЗЭН тунхаглаж байна. ³⁴“Учир нь Би Өөрийнхөө төлөө болон Миний зарц Давидын төлөө энэ хотыг аврахын тулд түүнийг хамгаалах болно” гэв гэж хэлжээ.
³⁵Тэр шөнө нь ЭЗЭНий тэнгэр элч гарч ирээд, ассиричуудын хуаранд зуун наян таван мянган хүнийг цохив. Хүмүүс өглөө эрт босоод хартал, тэд бүгд үхэцгээсэн байжээ. ³⁶Ингээд Ассирийн хаан Сеннахериб хөдлөн, буцаж, Ниневед амьдрав. ³⁷Түүнийг өөрийн Нисрох бурхны дугандаа мөргөл үйлдэж байхад нь Адраммелех, Шарезер нар түүнийг илдээр алаад, өөрсдөө Арарат нутаг уруу зугтав. Түүний оронд хүү Есархаддон нь хаан болжээ.