9 ¹Израиль аа, та нар ард түмнүүдийн адил хөөр баярт бүү баяс!
Учир нь чи өөрийн Бурханаа орхин завхайрсан.
Чи бүх л үтрэм дээр янхны хөлсийг хайрлав.
²Үтрэм, дарс шахагч нь тэднийг тэжээхгүй бөгөөд шинэ дарс тэдэнд хүрэхгүй.
³Тэд ЭЗЭНий газарт үлдэхгүй.
Харин Ефраим нь Египет уруу буцан явж,
Ассирид тэд бузар хоол идэх болно.
⁴Тэд ЭЗЭНд зориулж ундаан өргөлийг цутгахгүй ба тэдний тахилууд нь Түүнд таалагдахгүй.
Тэдний талх нь гашуудагсдын талх мэт байх бөгөөд
түүнээс идэгчид бүгд бузарлагдах болно.
Учир нь тэдний талх нь зөвхөн өөрсдийнх нь төлөө байх бөгөөд ЭЗЭНий гэрт орохгүй.
⁵Товлогдсон наадмууд ба ЭЗЭНий найрын өдөрт та нар юу хийх вэ?
⁶Учир нь харагтун, сүйрлээс болж тэд явах болно.
Египет нь тэднийг цуглуулан авч, Мемфис тэднийг булшилна.
Тэдний мөнгөн эрдэнэсийг хогийн ургамал эзлэн авч,
тэдний майхнууд үүргэнээр дүүрэх болно.
⁷Шийтгэлийн өдрүүд ирсэн бөгөөд залхаан цээрлүүлэх өдрүүд ч иржээ.
Үүнийг Израильд мэдүүл!
Та нарын хууль бус явдлын балиараас,
та нарын үлэмж дайсагналын улмаас эш үзүүлэгч нь тэнэг,
сүнслэг хүн нь галзуу болжээ.
⁸Ефраим нь миний Бурхантай хамт харуул ба эш үзүүлэгч байсан.
Гэвч шувуу баригчийн урхи нь түүний бүх замууд дээр байх бөгөөд
түүний Бурханы гэрт зөвхөн дайсагнал байна.
⁹Гибеагийн өдрүүдийнхтэй адил тэд завхралд гүн оржээ.
Тэр тэдний хууль бус явдлыг санаж, тэдний нүглүүдийг шийтгэх болно.
¹⁰Би Израилийг цөл дэх усан үзэм мэт олсон.
Би та нарын өвөг дээдсийг анхны улирал дахь инжрийн модон дээрх анхны жимс мэт харсан.
Гэвч тэд Баал-пеорт ирж, өөрсдийгөө ичгүүрт зориулж,
хайрласан юмс шигээ жигшүүртэй болжээ.
¹¹Ефраимын хувьд гэвэл, тэдний яруу алдар нь шувуу мэт нисэн одох болж,
Төрөлт ч үгүй, тээлт ч үгүй, жирэмслэлт ч үгүй болно!
¹²Тэд өөрсдийн хүүхдүүдээ өсгөх боловч Би нэг ч хүнгүй болтол нь тэднийг хагацаана.
Тийм ээ, үнэхээр Би тэднээс салах үед тэдэнд гай зовлон учраг!
¹³Миний харснаар Ефраим нь Тиртэй адил үзэсгэлэнт нугад суулгагдсан билээ.
Гэвч Ефраим нь хүүхдүүдээ алуурчинд гарган өгнө.
¹⁴ЭЗЭН, Та өгөх юмаа тэдэнд өгөөч.
Тэдэнд үр тогтдоггүй умай, хар дэлэнг өгөөч.
¹⁵Тэдний бүх бузар муу нь Гилгалд байна.
Үнэхээр, Би тэднийг тэнд үзэн ядахаар ирсэн билээ!
Тэдний үйлсийн хорон муугаас болж Би тэднийг Өөрийн гэрээс хөөн гаргана.
Би тэднийг цаашид хайрлахгүй.
Тэдний бүх ноёд нь тэрслэгчид билээ.
¹⁶Ефраим нь цавчигдсан.
Тэдний үндэс нь хувхайрсан бөгөөд тэд ямар ч жимс гаргахгүй.
Тэд үр хүүхэд тээх боловч, Би тэдний хэвлийн үнэт нэгнүүдийг алах болно.
¹⁷Миний Бурхан тэднийг зайлуулах болсны учир нь тэд Түүнийг сонсоогүй юм.
Тэд үндэстнүүдийн дунд тэнүүчлэгчид байх болно.