11 ¹Израилийг залуу байх үед Би түүнийг хайрлан,
Өөрийн хүүг Египетээс дуудан гаргасан.
²Тэд тэднийг дуудах тусам тэд тэднээс улам холдсон.
Тэд Баалуудад тахил өргөсөөр, шүтээнүүдэд утлага уугиулсаар байсан.
³Гэвч Ефраимд алхахыг зааж өгсөн нэгэн бол Би билээ.
Би тэднийг мутартаа авсан. Гэвч Би тэднийг эдгээснийг тэд мэдээгүй.
⁴Би тэднийг хүний оосроор, хайрын уяагаар дагуулсан.
Би тэдний хувьд эрүүнээс нь буулгыг өргөн хаядаг нэгэнтэй адил болсон.
Би тонгойж, тэднийг хооллосон.
⁵Тэд Египет газар уруу эргэж явахгүй.
Гэвч тэд Над уруу эргэхээс татгалзсан учир Ассири нь тэдний хаан байх болно.
⁶Илд нь тэдний хотуудын эсрэг эргэлдэж,
тэдний даамангийн хаалтуудыг нурааж,
тэдний зөвлөгөөнөөс болж тэднийг түймэрдэх болно.
⁷Тийнхүү Миний ард түмэн Надаас урвах сонирхолтой болсон.
Хэдийгээр тэд дээр байгаа Нэгэн уруу тэднийг дууддаг боловч хэн ч Түүнийг ердөө өргөмжлөхгүй байна.
⁸Ефраим аа, Би чамайг хэрхэн орхих вэ?
Израиль аа, Би чамайг хэрхэн дайсанд тушаах вэ?
Би чамайг хэрхэн Адма шиг болгох вэ?
Би чамд хэрхэн Зебоим шиг хандах вэ?
Зүрх минь Миний дотор бүрэн эргэж, Миний бүхий л энэрэл ноцсон байна.
⁹Би Өөрийн догшин уураа гүйцэлдүүлэхгүй.
Би дахин Ефраимыг сүйтгэхгүй.
Учир нь Би бол хүн бус, харин Бурхан юм. Би бол та нарын дунд буй Ариун Нэгэн бөгөөд Би хилэгнэл дотор ирэхгүй.
¹⁰Тэд ЭЗЭНий араас алхах бөгөөд Тэр арслан мэт архирах болно.
Үнэхээр Тэр архирч, Түүний хөвгүүд нь баруун зүгээс чичирсээр ирэх болно.
¹¹Египетээс ирэх шувууд мэт, Ассири газраас ирэх тагтаа мэт тэд чичирсээр ирэх болно.
Би тэднийг өөрсдийнх нь байшингуудад суулгах болно гэж ЭЗЭН тунхаглаж байна.
¹²Ефраим нь Намайг худал үгээр хүрээлж, Израилийн гэр нь заль мэхээр тойруулж байна.
Иуда ч бас Бурханы эсрэг, итгэмжит Ариун Нэгэнд дуулгаваргүй байна.