6 ¹Ирэгтүн, ЭЗЭН уруу буцацгаая.
Учир нь Тэр биднийг тастсан боловч Тэр биднийг эдгээх болно.
Тэр биднийг шархдуулсан боловч Тэр биднийг боож өгөх болно.
²Хоёр хоногийн дараа Тэр биднийг амилуулах болно.
Биднийг Түүний өмнө амьдруулахын тулд гурав дахь өдөрт Тэр биднийг босгох болно.
³Тиймээс мэдэцгээе, ЭЗЭНийг мэдэхийн тулд шамдацгаая.
Түүний ирэх нь үүр цайхын адил гарцаагүй.
Тэр бидэн дээр бороо мэт, газрыг услах хаврын бороо мэт ирнэ.
⁴Ефраим аа, Би чамайг яах вэ?
Иуда аа, Би чамайг яах вэ?
Учир нь та нарын хайр энэрэл чинь өглөөний манантай адил ба эртлэн алга болдог шүүдэртэй адил юм.
⁵Тиймээс Би эш үзүүлэгчдээр дамжуулж тэднийг хэсэгчин цавчсан.
Би Өөрийн амны үгээр тэднийг алсан.
Та нарын дээрх шүүлт нь цахилах аянга мэт юм.
⁶Учир нь Би тахилаас илүүгээр хайр энэрэлд,
шатаалт тахилаас илүүгээр Бурханыг мэдэх мэдлэгт баярладаг.
⁷Харин тэд гэрээг Адам шиг зөрчив.
Тэнд тэд Миний эсрэг урвасан.
⁸Гилеад бол цуст мөрийг үлдээж байдаг бурууг үйлдэгчдийн хот юм.
⁹Хүн отдог дээрэмчид шиг, тахилч нарын бүлэглэл Шехем уруу явах замд хүн алдаг.
Үнэхээр тэд гэмт хэргийг үйлджээ.
¹⁰Израилийн гэр дотор Би жигшмээр зүйлийг харсан.
Ефраимын завхайрал нь тэнд байгаа бөгөөд Израиль ч өөрийгөө бузарлав.
¹¹Мөн Иуда аа, Би Өөрийн ард түмний хувь заяаг сэргээх үед чамд зориулагдсан ургац тэнд бий.