13 ¹Ефраимыг ярихад хүмүүс чичирч байв.
Тэр өөрийгөө Израильд өргөмжилсөн боловч Баалыг шүтсэнээр тэрээр бурууг үйлдэж үхсэн юм.
²Одоо ч тэд улам бүр нүгэл үйлдэж,
өөрсдөдөө зориулан мөнгөөр цутгамал хөргүүдийг хийдэг.
Чадварлаг урласан шүтээнүүд дархдын гар урлал байх боловч
Тэд тэдэнд “Тахил өргөж байгаа хүн тугалуудыг үнсэг” гэжээ.
³Тэгэхээр тэд өглөөний манан шиг,
удахгүй алга болдог шүүдэр шиг,
үтрэмээс үлээгдэн хийсдэг будааны хальс шиг, яндангаас гарах утаа шиг байх юм.
⁴Гэвч Египет газарт байх үеэс Би та нарын Бурхан ЭЗЭН байсаар байсан.
Та нар Надаас өөр ямар ч бурхныг мэдээгүй байсан.
Учир нь Надаас өөр ямар ч аврагч байхгүй.
⁵Цөлд, ган гачигтай газарт Би чамайг халамжилсан.
⁶Өөрийн бэлчээртэй болмогц тэд цатгалан болсон.
Цатгалан болмогц тэдний зүрх бардам болжээ.
Тийм учраас тэд Намайг мартсан.
⁷Тиймээс Би тэдэнд арслан шиг хандах болно.
Ирвэс шиг Би замын хажууд отох болно.
⁸Бамбаруушнуудаа булаалгасан баавгай шиг Би тэдэнтэй тулгарч,
тэдний цээжийг нь яран тастах болно.
Зэрлэг араатан тэднийг тастчихтай адил тэнд Би бас эм арслан мэт тэднийг залгина.
⁹Израиль аа, чи Миний эсрэг, өөрийнхөө тусламжийн эсрэг байгаа нь чиний сүйрэл билээ.
¹⁰“Надад хаан ба ноёдыг өгөөч” хэмээн чи хүсэмжилсэн. Чиний бүх хотод чамайг аврах чиний хаан хаана байна вэ? Шүүгчид чинь одоо хаана байна вэ?
¹¹Би Өөрийн уур дотор чамд хааныг өгсөн ба Өөрийн хилэн дотор түүнийг буцаан авсан.
¹²Ефраимын хууль бус явдал нь хязгаарлагдаж, нүгэл нь хадгалагджээ.
¹³Хүүхэд төрүүлэхийн өвдөлт түүн дээр иржээ.
Тэрээр ухаантай хүү биш юм.
Учир нь умай нээгдэж байхад түүний саатах цаг нь биш билээ.
¹⁴Би тэднийг Үхэгсдийн орны хүчээс золих уу?
Би тэднийг үхлээс золих уу?
Үхэл ээ, чиний өргөсүүд хаана байна вэ?
Үхэгсдийн орон оо, чиний хатгуур хаана байна вэ?
Миний харцнаас энэрэл нууцлагдах болно.
¹⁵Тэр хулсан дунд цэцэглэн хөгжсөн ч дорнын салхи салхилж,
ЭЗЭНий салхи цөлөөс ирж байна.
Түүний оргилуурууд нь ширгэж, булаг нь хатах болно.
Түүний бүх л үнэт эдлэлийн эрдэнэсийн санг хоосруулна.
¹⁶Самари Бурханыхаа эсрэг тэрсэлсэн учир
Буруутайд тооцогдоно.
Тэд илдэнд унаж, балчир хүүхдүүд нь хэмх бяцлагдаж,
жирэмсэн эмэгтэйчүүд нь сийчигдэх болно.