1 ¹Соломоны дуунуудын дуун.
²-Амныхаа үнсэлтээр тэр намайг үнсэг!
Учир нь чиний хайр дарснаас ч илүү.
³Чиний тос тааламжтай анхилуун үнэртэй бөгөөд
чиний нэр асгагдсан тос мэт тул
охид чамд дурлана.
⁴Өөр уруугаа намайг татаач, хамтдаа бид гүйцгээе!
Намайг хаан өөрийн танхимуудад авчрав.
-Бид чамаар бахдан, баярлаж,
Хайрыг чинь дарснаас илүү өргөмжилнө.
Тэдний чамайг хайрладаг нь зөв аж.
⁵-Иерусалимын охид оо!
Би Кедарын майхнууд,
Соломоны хөшиг мэт хар боловч дур булаам сайхан.
⁶Бор хэмээн намайг бүү ширтээч.
Учир нь намайг нар түлсэн юм.
Эхийн минь хөвгүүд надад уурлаж,
намайг усан үзмийн талбайн арчлагч болгосон билээ.
Би өөрийн усан үзмийн талбайгаа арчилсангүй.
⁷Сэтгэлийн минь дурлалт чи, надад хэлээч.
Сүргээ чи хаана бэлчээж,
жин үдэд чи түүнийгээ хаана хэвтүүлнэ вэ?
Юунд би нөхдийн чинь сүргийн дэргэд гивлүүртэй эмэгтэйтэй адил байх ёстой билээ?
⁸-Хэрэв чи мэдэхгүй аваас, эмэгтэйчүүдийн дундах хамгийн үзэсгэлэнт гоо бүсгүй минь,
сүргийн мөрөөр урагш явж,
хоньчдын майхнуудын дэргэд өөрийн ишгүүдийг бэлчээ.

⁹Хонгор минь, чи наддаа фараоны тэрэгнүүдийн дундах гүүтэй минь адил болой.
¹⁰Унжлага зүүлттэй хацар чинь,
шүрэн зүүлттэй хүзүү чинь дур булаам энхрий.
¹¹-Чамд бид мөнгөн унжлагатай алтан зүүлтийг хийж өгнө.
¹²-Хаантан ширээндээ залран байхад миний сүрчигний анхилуун үнэр ханхална.
¹³Хайрт минь наддаа бүх л шөнөжин хөхний минь хооронд байх миррэн багц билээ.
¹⁴Хайрт минь наддаа Енгедийн усан үзмийн талбайнууд дахь хенна цэцгийн хонгорцог билээ.
¹⁵-Хонгор минь, чи юутай үзэсгэлэнтэй вэ,
Юутай үзэсгэлэнтэй вэ, чи!
Тагтаа мэт нүдтэй аж, чи!
¹⁶-Хайрт минь, чи юутай үзэсгэлэн гоо агаад дур булаам бэ!
Үнэхээр буйдан маань торгон зүлэг аж.
¹⁷Байшингийн маань хөндлөвч хуш агаад
дээвэр маань агар мод бөлгөө.