7 ¹Язгууртны охин минь,
шаахай доторх хөл чинь юутай үзэсгэлэнтэй вэ!
Ташааны чинь тойрог уран дархны гарын бүтээл болох эрдэнэс мэт аж.
²Хүйс чинь холилдсон дарсаар хэзээ ч үл дутах хундага мэт агаад
Хэвлий чинь сараана цэцэгсээр хүрээлэгдсэн овоолсон буудай мэт билээ.
³Хоёр хөх чинь зээрийн ихэр хоёр янзага мэт аж.
⁴Хүзүү чинь зааны ясан цамхаг мэт,
нүд чинь Бат-раббимын дааман хаалганы зэргэлдээх Хешбон дахь цөөрөм мэт,
Хамар чинь Дамаскийн эгч харалдаах Ливаны цамхаг мэт билээ.
⁵Толгой чинь Кармел шиг чиний дээр залрах агаад
толгойн чинь долгиолох үс нил ягаан тууз мэт юм.
Хаан долгиолох үсэнд чинь автагджээ.
⁶Бүх гоо үзэсгэлэнтэйгээ хамт чи юутай дур булаам,
юутай үзэсгэлэнтэй вэ, хайрт минь!
⁷Бие чинь далдуу мод мэт бөгөөд
хөх чинь түүнийг хонгорцог мэт ажгуу.
⁸Би “Далдуу мод уруу би авирч,
жимснийх нь шилбээс барья” гэв.
Хөх чинь усан үзмийн хонгорцог мэт,
амьсгалын чинь анхилуун үнэр алим мэт байх болтугай.
⁹Ам чинь шилдэг дарс мэт байх болтугай.

Энэ нь нойрсож буй нэгний уруулаас зөөлнөөр урсан гарч,
миний хайртад төвөггүй хүрнэ.
¹⁰-Би өөрийнхөө хайртынх агаад түүний хүсэл нь миний төлөө юм.
¹¹Нааш ир, хайрт минь,
хамтдаа хөдөө явцгааж,
шөнийг хоёулаа тосгонд өнгөрөөе.
¹²Эртхэн хоёулаа босоод,
усан үзмийн талбай уруу явцгаая.
Усан үзмийн мод гөлөглөсөн эсэхийг, цоморлигоо нээсэн эсэхийг,
мөн анарын мод цэцэглэсэн эсэхийг хоёулаа үзэцгээе.
Тэнд би чамд янаг хайраа өгье.
¹³Мандрагор жимс үнэрээ анхилуулна.
Үүдэн дээр маань шинэ ба хуучин шилмэл бүх жимс байна.
Хайрт минь, би үүнийг чинийхээ төлөө хураан хадгалсан билээ.