6 ¹Есүс тэндээс явж нутагтаа ирэв. Шавь нар нь Түүнийг дагалдан явж байлаа. ²Амралтын өдөр Есүс синагогт сургаал заахад сонссон олон гайхаж,
-Энэ хүн үүнийг хаанаас авав? Түүнд ямар мэргэн ухаан заяасан юм бэ? Гараас нь ямар гайхамшигт үйлс гарна вэ? ³Энэ хүн чинь Мариагийн хүү мужаан биш бил үү? Иаков, Иосеф, Иуда, Симон нарын ах биш үү? Охин дүү нар нь бидний хамт энд байгаа биз дээ? гэж Есүсийг янз янзаар гоочлов. ⁴Есүс тэдэнд
-Эш үзүүлэгч нь өөрийн гэр, төрөл садныхаа дунд болон нутгаасаа өөр газар хүндлэгдэхгүй байх нь үгүй гэж айлдав. ⁵Тэнд Тэр ямар ч гайхамшгийг үйлдэж чадсангүй. Харин өвчтэй байсан хэдэн хүн дээр мутраа тавьж эдгээжээ. ⁶Тэдэнд итгэл байхгүйд Есүс гайхаж байлаа.
Тэгээд Тэр эргэн тойрны тосгодоор явж, сургаал айлдав.
⁷Есүс арван хоёрыгоо дуудаж, бузар сүнсийг захирах эрх мэдэл өгөөд, хоёр хоёроор нь илгээв. ⁸Есүс тэдэнд зааварлан
-Замдаа таягаас өөр юуг ч авч явах ёсгүй. Талх ч болохгүй, уут хүүдий ч болохгүй, хэтэвчиндээ зоос мөнгө ч авч явж болохгүй. ⁹Харин шаахайгаа өмс гээд нэмж
-Цамц давхарлаж өмсөөд хэрэггүй гэв. ¹⁰Есүс тэдэнд
-Та нар ямар айлд орно, хотоос явтлаа тэндээ бай. ¹¹Аль нэг газар та нарыг хүлээж авахгүй, та нарыг сонсохгүй бол тэндээс явахдаа тэдний эсрэг гэрчлэл болгон хөлийнхөө тоосыг сэгсрэн унагаарай гэжээ. ¹²Тэд явж, хүмүүс гэмших ёстойг тунхаглав. ¹³Тэд олон чөтгөрийг зайлуулж, өвчтэй олон хүнийг тосоор тослон эдгээжээ.
¹⁴Херод Хаан үүнийг дуулсан байв. Учир нь Есүсийн нэр дуурссан байлаа. Хүмүүс
-Баптисм хүртээгч Иохан үхэгсдээс амилжээ. Тийм учраас Түүнд гайхамшигт хүч байна гэж ярилцаж байв. ¹⁵Харин зарим нь
-Тэр бол Елиа, зарим нь
-Тэр бол эртний эш үзүүлэгчдийн нэгний л адил эш үзүүлэгч байна гэж байлаа. ¹⁶Харин Херод үүнийг дуулаад
-Миний цаазалсан Иохан амилжээ гэв. ¹⁷Учир нь Херод өөрийнхөө дүү Филипийн эхнэр Херодиатай гэрлэсэн тул түүнээс болж Иоханыг бариулан шоронд хориулжээ. ¹⁸Учир нь Иохан Херодод
-Дүүгийнхээ эхнэрийг авах нь хууль бус гэж хэлсэн байв. ¹⁹Херодиа түүнд хорсож, түүнийг алахыг санаархсан авч чадсангүй. ²⁰Учир нь Херод Иоханаас айдаг байсан бөгөөд түүнийг зөвт шударга, ариун хүн гэдгийг мэдэж, Иоханыг хамгаалдаг байв. Херод Иоханыг сонсохдоо тээнэгэлздэг ч дуртайяа сонсдог байлаа. ²¹Хүлээсэн өдөр нь ирж, Херод төрсөн өдрөө тохиолдуулан ихэс дээдэс, мянгатын дарга нар болоод Галилын хүндэт хүмүүст зориулж зоог барьжээ. ²²Херодиагийн охин орж ирж бүжиглэв. Херод болон тэнд байгсдад охин ихэд таашаагджээ. Хаан охинд
-Чи юу хүссэнээ надаас гуй. Би чамд түүнийг чинь өгье гэв. ²³Тэрээр охинд [олон удаа] ам гарч,
-Чи надаас юуг хүснэ, би түүнийг чинь, хаанчлалынхаа хагасыг ч болов чамд өгнө гэж амлав. ²⁴Охин гарч, эхээсээ
-Би юу гуйх вэ? гэж асуухад эх нь
-Баптисм хүртээгч Иоханы толгойг гэжээ. ²⁵Охин тэр даруй хааны өмнө очиж
-Яг одоо баптисм хүртээгч Иоханы толгойг тавган дээр тавьж надад өгөхийг би танаас хүсэж байна гэж хэлэв. ²⁶Хаан гүнээ харамссан боловч зочид байсан тул, бас амласан учир охинд татгалзахыг хүссэнгүй. ²⁷Хаан тэр даруй алуурчныг явуулж, түүний толгойг авчрахыг тушаалаа. Тэр очоод, шоронд Иоханыг цаазалжээ. ²⁸Тэгээд түүний толгойг тавган дээр авчраад охинд өгөхөд, охин эхдээ өгөв. ²⁹Иоханы шавь нар үүнийг дуулаад ирж, цогцсыг нь авч хадан булшинд тавьжээ.
³⁰Элч нар Есүс уруу цуглан ирэв. Тэд хийсэн, заасан бүхнээ Түүнд айлтгалаа. ³¹Тэр тэдэнд
-Та нар зэлүүд газар уруу оч. Жаахан амар гэжээ. (Учир нь тэнд олон хүн ирж, очиж, тэдэнд тусдаа юм идэх зав ч байсангүй). ³²Тусдаа байхаар тэд зэлүүд газрыг зүглэн завиар явав. ³³Хүмүүс тэдний хөдлөхийг хараад, олонх нь таньжээ. Тэд хот бүхнээс хамтдаа тэр зүгт гүйсээр тэднээс урьтаж тэнд хүрэв. ³⁴Есүс эрэг дээр гарахдаа, үй олон хүнийг хараад тэднийг өрөвдөв. Учир нь хүмүүс хоньчингүй хонь мэт байв. Тэр тэдэнд олон зүйлийг зааж эхлэв. ³⁵хэдийн цаг орой болоход шавь нар нь Түүн дээр ирж,
-Энэ газар зэлүүд. Аль хэдийн орой болчихлоо. ³⁶Хүмүүсийг явуулъя. Тэд ойр орчмын тосгон, суурин уруу очоод, өөрсдөдөө идэх юм худалдаж аваг гэжээ. ³⁷Гэтэл Есүс хариуд нь
-Та нар тэдэнд идэх юм өг гэв. Шавь нар нь Түүнд
-Бид явж, талханд хоёр зуун денар зарцуулж тэдэнд идэх юм өгөх үү? гэхэд, ³⁸Есүс тэдэнд
-Та нарт хэдэн талх байна? Яв, хар гэж айлдлаа. Тэд олж мэдээд,
-Таван талх, хоёр загас байна гэв. ³⁹Бүх хүнийг зүлгэн дээр хэсэг хэсгээр нь суулгахыг тэдэнд Тэр тушаав. ⁴⁰Тэд зуугаараа, тавиараа хэсэг болон суулаа. ⁴¹Есүс таван талх, хоёр загасыг авч, тэнгэр өөд ширтэн хүнсийг ерөөгөөд талхыг хувааж, хүмүүст өгүүлэхээр шавь нартаа өгөв. Хоёр загасыг ч бүгдэд нь хуваан хүртээв. ⁴²Тэд бүгд цөмөөрөө идэж цадсан байлаа. ⁴³Тэд талхны хэлтэрхий, загасны үлдэгдлийг цуглуулахад арван хоёр сагс дүүрчээ. ⁴⁴Тэнд [талх] идсэн таван мянган эрчүүд байсан юм.
⁴⁵Цугласан олныг Тэрээр тараан явуулж байх зуураа шавь нараа тэр даруй завинд суулгаж, нуурын нөгөө зүг дэх Бетсайд уруу түрүүлж явуулав. ⁴⁶Тэднийг явуулсныхаа дараа Тэр залбирахаар уул өөд явжээ. ⁴⁷Орой болоход завь нуурын дунд, харин Есүс ганцаараа газар дээр байв. ⁴⁸Салхи сөрөн явж байсан тул шавь нар нь сэлүүрдэн хүчээ барж буйг Тэр хараад, шөнийн дөрөв дэх манааны үед Есүс нууран дээгүүр алхаж, тэднийг зүглэн ирж байв. Тэдний хажуугаар өнгөрөх санаатай явж байтал, ⁴⁹шавь нар нь Түүнийг нууран дээгүүр алхаж явахыг хараад, хий үзэгдэл байна хэмээн бодож хашхиралдав. ⁵⁰Учир нь Түүнийг бүгд харсан бөгөөд ихэд айжээ. Гэвч тэр даруй Есүс тэдэнтэй ярьж,
-Зоригтой бай. Би байна. Бүү ай гэж тэдэнд айлдав. ⁵¹Тэгээд тэдний байгаа завин дээр Түүнийг гарахад салхи зогсов. Шавь нар нь бүр [ихэд] гайхав. ⁵²Учир нь тэд талхны явдлыг ойлгоогүй, харин ч тэдний зүрх хатуу байв.
⁵³Тэд хөвсөөр Геннесарет нутагт хүрч зангуугаа эрэг дээр хаяв. ⁵⁴Тэднийг завинаас буусан тэр даруй хүмүүс Есүсийг таниад, ⁵⁵бүх нутгаар гүйн явж, Түүнийг байгаа гэж сонссон газар уруу өвчтэй хүмүүсийг дэвсгэртэй нь авчирч эхлэв. ⁵⁶Түүнийг суурин, хот, тосгон, хаа ч очсон олон түмэн өвчтэй хүмүүсийг олон хөлийн газар авчирч байв. Тэд Есүсээс энэ хүмүүсийг хувцасныхаа хормойд зөвхөн гар хүргүүлээч гэж гуйцгаан, гар хүрсэн болгон эдгэрч байлаа.