10 ¹Тэгээд Тэр босож тэндээсээ Иудейн нутаг болон Иорданы чанадад очив. Дахиад л үй олон хүн Түүн уруу цуглахад, Тэр Өөрийн заншсан ёсоороо тэднийг сургаж эхлэв.
²Хэдэн фарисайчууд ирж, Есүсийг сорьж, эр хүн эхнэрээсээ салах нь хуульд таарах эсэхийг асуужээ. ³Есүс хариуд нь тэдэнд
-Мосе та нарт юу гэж тушаасан бэ? гэсэнд, ⁴тэд
-Салалтыг гэрчилсэн бичиг үйлдээд эхнэрээсээ салж болохыг Мосе эр хүнд зөвшөөрсөн шүү дээ гэв. ⁵Гэтэл Есүс
-Та нарын зүрх чинь хатуу тул Мосе та нарт тийм хууль бичиж өгсөн юм. ⁶Харин бүтээлийн эхнээс Бурхан хүмүүсийг эр, эмээр бүтээсэн. ⁷Тийм учраас эр хүн эцэг, эхээ орхиж [эхнэртэйгээ нэгдэнэ]. ⁸Хоёул нэг бие болно. Тэд цаашдаа хоёр биш харин нэг махан бие мөн. ⁹Тиймээс Бурханы хамтад нь холбосон юмыг хэн ч бүү салгаг гэлээ. ¹⁰Айлд байхдаа шавь нар нь энэ тухай дахиад л Түүнээс асуув. ¹¹Есүс тэдэнд
-Эхнэрээсээ салж, өөр эмэгтэйтэй гэрлэгч хэн ч эхнэрийнхээ өмнө завхайрсан болно. ¹²Хэрэв эхнэр нь нөхрөөсөө салж, өөр эрэгтэйтэй гэрлэвэл, тэр эм завхайрсан болно гэв.
¹³Хүмүүс Есүсээр хүүхдүүддээ гар хүргүүлэхийн тул Түүн уруу хүүхдүүдээ авчирч байлаа. Харин шавь нар тэднийг зэмлэв. ¹⁴Есүс үүнийг хараад, уурлаж шавь нартаа
-Хүүхдүүдийг Над уруу ирэхийг зөвшөөр. Тэднийг бүү хорь. Учир нь Бурханы хаанчлал тэдэн шиг хүмүүсийнх юм. ¹⁵Үнэнээр Би та нарт хэлье. Бурханы хаанчлалыг хүүхэд адил хүлээж аваагүй хэн боловч тэнд орохгүй гэж айлдлаа. ¹⁶Есүс хүүхдүүдийг тэвэрч, тэдэн дээр мутраа тавиад ерөөв.
¹⁷Түүнийг аян замдаа гарч явахад нь нэгэн хүн гүйн ирж, Түүний өмнө сөгдөж
-Сайн Багш аа, мөнх амийг өвлөн авахын тулд би юу хийх вэ? гэж асуув. ¹⁸Есүс түүнд
-Чи яагаад Намайг сайн гэж дуудна вэ? Бурханаас өөр хэн ч сайн биш. ¹⁹“Хүн бүү ал, бүү завхайр, бүү хулгайл, бүү худал гэрчил, бүү мэхэл, эцэг эхээ хүндэл” гэсэн хуулиудыг чи мэднэ шүү дээ гэсэнд, ²⁰тэр Түүнд
-Багш аа, энэ бүгдийг би бага залуугаасаа л сахисан гэв. ²¹Есүс түүнийг ширтэн харж, хайрлан
-Чамд нэг л юм дутаж байна. Явж, өөрийн бүх өмчөө зарж ядууст өг. Тэгвэл чи тэнгэрт баялагтай болно. Тэгээд ирж, Намайг дага гэж айлдав. ²²Гэвч энэ үгнээс болж өнөөх хүний царай нь барайж, гунигтайгаар яваад өгөв. Учир нь тэр их хөрөнгөтэй хүн байжээ.
²³Есүс тойруулж хараад Өөрийн шавь нартаа
-Чинээлэг хүмүүсийн хувьд Бурханы хаанчлалд орох нь ямар хэцүү вэ! гэв. ²⁴Шавь нар Түүний үгэнд гайхсан боловч Есүс тэдэнд дахиж
-Хүүхдүүд ээ, Бурханы хаанчлалд орох нь ямар хэцүү вэ! ²⁵Баян хүн Бурханы хаанчлалд орохоос тэмээ зүүний сүвэгчээр орох нь илүү хялбар ажээ гэсэнд ²⁶тэд бүр ч илүү гайхаж, Түүнд
-Тэгвэл хэн аврагдаж чадах юм бэ? гэцгээв. ²⁷Есүс тэднийг хараад
-Энэ нь хүмүүст боломжгүй боловч Бурханы хувьд өөр. Учир нь Бурханд бүх юм боломжтой гэж айлдав. ²⁸Петр Түүнд
-Хар л даа. Бид бүхнийг орхиод Таныг дагасан гээд ярьж эхлэв. ²⁹Есүс -Үнэнээр Би та нарт хэлье. Хэн Миний төлөө болон сайн мэдээний төлөө гэр орноо, ах дүү, эгч дүүгээ, эх, эцгээ, үр хүүхэд, эдлэн газраа орхино, ³⁰
эр хүн одоо энэ үед гэр орноо, ах дүү, эгч дүүгээ, эхээ, үр хүүхэд, эдлэн газраа хавчлагатай хамт зуу дахин илүү авна. Мөн ирэх үед мөнх амийг авна. ³¹Гэвч эхэнд байх олон хүн сүүлчийнх болно, сүүлчийнх нь эхнийх болно гэлээ.
³²Тэд Иерусалим орохоор замдаа явж байв. Есүс тэдний өмнө нь явж байлаа. Тэд гайхаж байсан бөгөөд дагалдаж явсан хүмүүс нь айж байв. Есүс дахиад л арван хоёрыгоо тусад нь авч, Өөрт нь юу тохиолдох тухай тэдэнд айлдаж эхлэв.
³³-Харагтун, бид Иерусалимыг зорьж явна. Хүний Хүү ахлах тахилч нарт болон хуулийн багш нарт тушаагдах болно. Тэд Түүнд алах ял тулгаж, Түүнийг харь үндэстэнд тушаана. ³⁴Тэд Түүнийг басамжилж, нулимж, ташуурдаад ална. Тэгээд гурав хоногийн дараа Тэр дахин амилна гэв. ³⁵Зебедеен хоёр хүү Иаков, И
охан нар Есүст ойртон ирж Түүнд -Багш аа, бид юу ч гуйсан, түүнийг маань бидэнд хийж өгөхийг Танаас хүсэж байна гэв. ³⁶Тэр -Та нарт
юу хийж өгөхийг Надаас хүсэж байгаа юм бэ? гэхэд, ³⁷тэд Түүнд -Таны сүр жавхлан дотор бидний нэгийг Өөрийн баруун гар талдаа, нөгөөг маань Өөрийнхөө зүүн талд суулгаач гэв. ³⁸Харин Есүс
-Та нар юу гуйж байгаагаа мэдэхгүй байна. Та нар Миний уух аяганаас ууж, Миний хүртэж байгаа баптисмыг хүртэж чадах юм уу? гэхэд, ³⁹тэд Түүнд
-Бид чадна гэв. Есүс тэдэнд хандаж
-Миний уух аяганаас та нар ууж, Миний хүртэж байгаа баптисмыг та нар хүртэх болно. ⁴⁰Харин Миний баруун, зүүн талд суух нь Миний өгөх юм биш. Энэ нь хэний төлөө бэлтгэгдсэн байна, тэдэнд өгөгдөнө гэж айлдав. ⁴¹Үүнийг сонсоод нөгөө арав нь Иаков, Иохан нарт зэвүүцжээ. ⁴²Есүс тэднийг Өөр уруугаа дуудаж, тэдэнд
-Харь үндэстнүүдийн захирагчид гэж тооцогдсон хүмүүс ард олноо ноёрхдог. Ихэс дээдэс нь тэднийг эрхэндээ байлгадгийг та нар мэднэ. ⁴³Харин та нарын дунд тийм юм байж болохгүй. Хэн та нарын дунд агуу болохыг хүснэ, тэр хүн та нарын зарц болог. ⁴⁴Мөн хэн та нарын дунд тэргүүнд байхыг хүснэ, тэр хүн бүгдийн боол болог. ⁴⁵Учир нь Хүний Хүү хүртэл үйлчлүүлэхийн тулд бус, харин үйлчлэхийн тулд, мөн Өөрийн амийг олны төлөө золиос болгон өгөхийн тулд ирсэн юм гэж айлдлаа.
⁴⁶Тэд Иериход ирэв. Есүс Өөрийн шавь нар болоод олон түмний хамт Иерихогоос гарч явтал Тимайн хүү Бартимай гэгч сохор гуйлгачин замын хажууд сууж байв. ⁴⁷Назарын Есүс явж байгааг тэр дуулаад
-Давидын хүү Есүс ээ, намайг өршөөгөөч гэж хашхирч эхлэв. ⁴⁸Олон хүн дуугүй бай хэмээн түүнд хатуу хэлсэн боловч тэр харин ч бүр
-Давидын хүү, намайг өршөөгөөч гэж улам их хашхирсаар байв. ⁴⁹Есүс зогсон
-Түүнийг нааш дууд гэлээ. Тэд сохор эрийг дуудаж, түүнд
-Зоригтой бай, бос. Тэр чамайг дуудаж байна гэв. ⁵⁰Тэр гадуур хувцсаа тайлж хаяад үсрэн босож, Есүс уруу очив. ⁵¹Есүс түүнд
-Чиний төлөө юу хийж өгөхийг чи Надаас хүсэж байна вэ? гэхэд, сохор эр Түүнд
-Рабуни (Багш гэсэн утгатай), би дахин хараатай болмоор байна гэжээ. ⁵²Есүс түүнд
-Яв. Итгэл чинь чамайг эдгээлээ гэж айлдахад өнөөх хүн тэр даруй дахин хараа орж, замаар Есүсийг дагалаа.