14 ¹Хоёр хоногийн дараа Дээгүүр Өнгөрөх ба Исгээгүй Талхны Баяр байв. Ахлах тахилч нар болоод хуулийн багш нар Есүсийг зальжин аргаар баривчилж, хөнөөхийг оролдож байв. ²Тэд
-Баярын үеэр болохгүй. Тэгвэл олон түмний дотор үймээн самуун болж магадгүй хэмээцгээв.
³Есүсийг Бетанд, уяман өвчтэй Симоны гэрт тухлан байхад нь гөлтгөнөн савтай цэвэр нардын их үнэтэй үнэрт тосыг барьсан эмэгтэй орж иржээ. Тэр эмэгтэй савыг хагалаад, Есүсийн толгой дээр тос цутгав. ⁴Гэтэл зарим нь дургүйцэн өөр хоорондоо хэлэлцэж
-Юунд энэ тосыг ингэж үрнэ вэ? ⁵Энэ тосыг гурван зуу гаруй денараар зарж, ядууст өгч болох байсан шүү дээ гээд тэд түүнийг зэмлэжээ. ⁶Харин Есүс
-Түүнийг орхи. Та нар юунд түүнд төвөг удна вэ? Энэ эмэгтэй Надад сайныг үйлдсэн. ⁷Учир нь та нар үргэлж ядуустай цуг байна. Хэзээ хүссэн цагтаа та нар тэдэнд сайныг үйлдэж чадна. Харин та нар Надтай үргэлж цуг байхгүй. ⁸Тэр хийж чадахаа л хийсэн. Оршуулахад бэлтгэж тэр Миний биеийг урьдаас тосоллоо. ⁹Үнэнээр Би та нарт хэлье. Сайн мэдээ бүх дэлхийн хаа ч тунхаглагдсан, мөн энэ эмэгтэйг дурсаж, түүний үйлс яригдах болно гэж айлдав.
¹⁰Арван хоёрын нэг байсан Искариотын Иудас Есүсийг барьж өгөхийн тулд ахлах тахилч нар уруу явлаа. ¹¹Тэд үүнийг сонсоод, баярлаж түүнд мөнгө өгнө гэж амлав. Боломжтой цагт Есүсийг яаж барихыг тэр эрэлхийлж эхлэв.
¹²Исгээгүй Талхны Баярын эхний өдөр, Дээгүүр Өнгөрөх Баярын хургыг тахих үед Түүний шавь нар нь
-Та биднийг хаашаа явуулж, Өөрийн идэх Дээгүүр Өнгөрөх Баярын зоогийг бэлдүүлмээр байна вэ? гэв. ¹³Есүс шавь нараасаа хоёр хүнийг явуулж, тэдэнд
-Хот уруу ор. Ваартай ус авч яваа хүн та нартай тааралдана. Түүнийг дага. ¹⁴Тэр хаашаа орно, тэр гэрийн эзэнд “Багш “Шавь нарынхаа хамт Дээгүүр Өнгөрөх Баярын зоог идэх Миний зочны өрөө хаана байна?” гэж хэлүүлж байна” гэж хэл. ¹⁵Тэгээд тэр өөрөө та нарт зассан, бэлэн дээд том өрөөг үзүүлнэ. Тэнд та нар бидэнд зоог бэлд гэж айлдав. ¹⁶Шавь нар нь гарч явж, хотод иржээ. Тэгээд Есүсийн айлдсан ёсоор айлаа олж, тэд Дээгүүр Өнгөрөх Баярт бэлдэв. ¹⁷Орой болоход Есүс арван хоёрынхоо хамт ирлээ. ¹⁸Тэд тухлан суугаад идэж байх үед Есүс
-Үнэнээр Би та нарт хэлье. Та нарын нэг нь буюу Надтай хамт хооллож буй хүн Надаас урвана гэлээ. ¹⁹Тэд гунигтай болон, нэг нэгээрээ Түүнд
-Би лав биш биз дээ? гэлээ. ²⁰Есүс тэдэнд
-Тэр нь арван хоёрын нэг, Надтай хамт нэг хуланд гар дүрж байгаа нэг нь мөн. ²¹Яагаад гэвэл Хүний Хүү Өөрийнх нь тухай бичигдсэнчлэн явна. Харин Хүний Хүүг бариулах тэр хүн золгүй еэ! Тэр хүн төрөөгүй байсан бол дээр байх байсан гэж айлдав.
²²Тэднийг зооглон байх зуур Есүс талх аваад ерөөсний дараа, хуваан тэдэнд өгөөд,
-Үүнийг ав. Энэ бол Миний бие гэв. ²³Тэр аяга авч, талархал өргөөд, аягаа тэдэнд өгөв. Тэд цөмөөрөө түүнээс уулаа. ²⁴Есүс тэдэнд
-Энэ бол Миний гэрээний цус бөгөөд олны төлөө урсах болно. ²⁵Үнэнээр Би та нарт хэлье. Би Бурханы хаанчлалд дахин шинээр дарс уух тэр өдрийг хүртэл усан үзмийн дарс дахин хэзээ ч уухгүй гэж айлдав.
²⁶Магтуу дуулсныхаа дараа, тэд Чидун уул өөд явцгаав.
²⁷Есүс тэдэнд
-Та нар бүгд бүдэрнэ. Учир нь “Би хоньчинг цохиж унагахад хонин сүрэг тарж бутарна” гэж бичигдсэн билээ. ²⁸Харин Би амилуулагдсаныхаа дараа, та нараас өмнө Галилд очно гэв. ²⁹Гэтэл Петр Түүнд
-Хэдийгээр бүх хүмүүс бүдэрсэн ч би бүдрэхгүй гэхэд, ³⁰Есүс түүнд
-Үнэнээр Би та нарт хэлье. Өнөөдөр, энэ шөнө азарган тахиа хоёр удаа донгодохоос өмнө чи өөрөө Намайг гурван удаа үгүйсгэнэ гэв. ³¹Гэвч Петр бүр их хүчлэн
-Би хичнээн Тантай хамт үхэх ёстой болсон ч Таныг үгүйсгэхгүй гэв. Тэд бүгдээрээ бас тэгж хэлж байлаа.
³²Тэд Гетсемани гэдэг газар ирэв. Есүс шавь нартаа
-Намайг залбирах зуур энд сууцгааж бай гээд, ³³Тэр Өөрийн хамт Петр, Иаков, Иохан нарыг авч явав. Есүс ихэд зовж, шаналж эхлэв. ³⁴Есүс тэдэнд
-Сэтгэл минь үхтлээ шаналж байна. Энд үлдээд, сэргэг бай гэв. ³⁵Есүс тэднээс жаахан цаашаа яваад, газар унаж, хэрэв боломжтой бол тэрхүү цаг Өөрийнх нь хажуугаар өнгөрсөн байхын тулд залбирав. ³⁶Есүс
-Аав аа, Эцэг минь! Танд бүх юм боломжтой. Энэ аягыг Надаас зайлуулаач. Гэвч Миний хүсэж байгааг бус, харин Та юу хүсэж байгаагаа үйлд гэлээ. ³⁷Есүс ирж, тэдний унтаж байхыг хараад, Петрт
-Симон, чи унтаж байна уу? Ганцхан цаг сэрүүн байж чи чадсангүй юу? ³⁸Соригдохгүйн тулд сэргэг бай, залбир. Сүнс нь хүсэж байна, харин махан бие сул дорой гэлээ. ³⁹Есүс дахин явж, өмнөх үгээ хэлэн залбирав. ⁴⁰Тэр дахин ирж, тэдний унтаж байхыг харав. Учир нь тэдний нүд анилдаж байв. Тэд Есүст юу гэж хариулахаа ч мэдсэнгүй. ⁴¹Есүс гурав дахь удаагаа ирж, тэдэнд
-Та нар одоо хүртэл унтаж, амарсаар байна уу? Одоо боллоо. Цаг ирлээ. Харагтун, Хүний Хүү нүгэлтнүүдийн гарт тушаагдаж байна. ⁴²Бос, явцгаая. Харагтун, Намайг бариулах хүн ойртон байна гэлээ. ⁴³Түүнийг айл
даж байх зуур, тэр даруй арван хоёрын нэг болох Иудас ахлах тахилч нар, хуулийн багш нар болон ахлагчдаас илд, шийдэмтэй бөөн хүмүүсийг дагуулан хүрч ирэв. ⁴⁴Түүнээс урваж байсан нэгэн нь тэдэнд
-Би хэнийг үнсэнэ, Тэр нь мөн. Түүнийг барьж, хамгаалалттайгаар авч яв гэж хэлсэн байлаа. ⁴⁵Иудас ирээд, тэр даруй Есүс уруу очиж, “Рабби!” гээд Түүнийг үнсэв. ⁴⁶Тэд Түүнийг барин, баривчиллаа. ⁴⁷Гэтэл дэргэд нь зогсогсдоос нэг нь илдээ сугалж тэргүүн тахилчийн боолыг цохиж, чихийг нь тас цавчсан байлаа. ⁴⁸Есүс тэдэнд айлдруун
-Та нар Намайг дээрэмчин барихтай адил санан илд, шийдэмтэй ирэв үү? ⁴⁹Өдөр бүр Би сүмд та нартай хамт байж, зааж байсан. Та нар Намайг бариагүй. Гэвч энэ нь Судар биелэгдэхийн тулд боллоо гэж айлдлаа. ⁵⁰Шавь нар цөмөөрөө Есүсийг орхиод, зугтав.
⁵¹Нүцгэн биен дээрээ даавуун хучлаганаас өөр юу ч нөмрөөгүй нэгэн залуу эр Есүсийг дагаж байлаа. Түүнийг хүмүүс барьж автал, ⁵²тэр хучлагаа ардаа хаяад нүцгэн чигээрээ зугтжээ. ^5
3Тэд Есүсийг тэргүүн тахилчийнд авчрав. Бүх ахлах тахилч нар, ахлагчид болон хуулийн багш нар цугласан байлаа. ⁵⁴Петр тэргүүн тахилчийн хашаан дотор ортлоо Есүсийг алсуур дагажээ. Тэр бараа бологчдынх нь дунд сууж, галд дулаацан байв. ⁵⁵Ахлах тахилч нар хийгээд бүх Зөвлөл Есүсийг алахын тулд Түүний эсрэг гэрчлэхийг хичээсэн боловч юу ч олсонгүй. ⁵⁶Учир нь олон хүн Есүсийн эсрэг хуурамч гэрчлэл өгсөн боловч, гэрчлэлүүд нь таарахгүй байлаа. ⁵⁷Зарим нь босоод Есүсийн эсрэг хуурамчаар гэрчлэл өгөн,
⁵⁸-Бид “Гараар баригдсан энэ сүмийг Би устгаж, гурван хоногийн дотор Би хүний гараар баригдаагүй өөрийг босгоно” гэж Түүний хэлэхийг сонссон гэж байв. ⁵⁹Үүн дээр хүртэл тэдний мэдүүлэг таарахгүй байлаа. ⁶⁰Тэргүүн тахилч босож урд ирээд, Есүсээс -Та ямар ч хариулт өгөхгүй юу? Эдгээр хүмүүс Таны эсрэг юу гэрчилж байгаа юм бэ? гэж асуув. ⁶¹Гэвч Есүс дуугүй байж, ямар ч хариулт өгсөнгүй. Тэргүүн тахилч дахиж Түүнээс асуун
-Та Ерөөлт Нэгэний Хүү, Христ мөн юм уу? гэлээ. ⁶²Есүс
-Би мөн. Та нар Хүний Хүү Хүчит Нэгэний баруун гарт сууж, тэнгэрийн үүлсийн дунд ирэхийг харна гэв. ⁶³Тэргүүн тахилч хувцсаа хүү татаад,
-Бидэнд өөр гэрч нарын хэрэг гэж юу байна? ⁶⁴Бурханыг доромжлохыг нь та нар сонслоо. Энэ нь та нарт ямар санагдаж байна? гэж хэлэв. Тэд бүгдээрээ Есүс үхэх ёстой гэсэн ял тулгав. ⁶⁵Зарим нь Түүний өөдөөс нулимж, нүдийг нь боож нударгалан, жанчиж,
-Эш үзүүлээдэх! гэж байв. Бараа бологчид нь Есүсийн нүүрийг алгадаж байлаа.
⁶⁶Петрийг хашааны доод талд байхад нь тэргүүн тахилчийн шивэгчдийн нэг ирж, ⁶⁷Петрийг өөрийгөө дулаацуулж байхыг хараад, түүнийг ажиглан
-Чи бас Назарын Есүстэй хамт байсан шүү дээ гэв. ⁶⁸Гэвч тэр үүнийг үгүйсгэж,
-Юу яриад байгааг чинь би мэдэх ч үгүй, ойлгох ч үгүй байна гэв. Петр гарч хашааны үүд уруу дөхөв. [Азарган тахиа донгодов.] ⁶⁹Өнөөх зарц эмэгтэй түүнийг хараад, тэнд зогсож байсан хүмүүст дахин
-Энэ хүн бол тэдний нэг мөн гэжээ. ⁷⁰Гэвч Петр үүнийг дахиад л үгүйсгэж байлаа. Хэсэг хугацааны дараа тэнд зогсож байсан хүмүүс Петрт
-Чи гарцаагүй тэдний нэг мөн. Учир нь чи бас Галилын хүн юм байна гэлээ. ⁷¹Гэтэл тэр харааж эхлэн, тангараглаж
-Та нарын яриад байгаа энэ хүнийг би мэдэхгүй гэв. ⁷²Тэр даруй хоёр дахь удаагаа азарган тахиа донгодлоо. Тэгээд Петр
-Азарган тахиа хоёр удаа донгодохоос өмнө чи Намайг гурван удаа үгүйсгэнэ гэж Есүсийн өөрт нь айлдсаныг саналаа. Тэр уйлж гарав.