3 ¹Тэгээд Тэр дахин синагогт ороход тэнд хатангир гартай хүн байжээ. ²Тэд Түүнийг буруутгахын тулд Амралтын өдөр тэр хүнийг Есүс эдгээх нь үү хэмээн Түүнийг ажиглан харж байлаа. ³Есүс хатангир гартай хүнд
-Босоод, урагшаа гар гээд, ⁴тэдэнд
-Амралтын өдөр сайныг үйлдэх эсвэл мууг үйлдэх, амь аврах эсвэл амь хөнөөхийн аль нь хуульд нийцэх вэ? гэсэн боловч тэд дуугарсангүй. ⁵Есүс ууртайгаар тэднийг тойруулан харснаа, тэдний зүрх сэтгэл хатууд харамсаж, тэр хүнд
-Гараа сунга гэв. Мөнөөх хүн гараа сунгасанд, гар нь эдгэсэн байлаа. ⁶Фарисайчууд гарч, тэр даруй Есүсийн эсрэг херодынхонтой Түүнийг яаж алах тухай зөвлөлджээ.
⁷Есүс шавь нарынхаа хамт нуурын зүг цаашлав. Мөн Галилаас үй олон хүн [дагаж байлаа]. Бас Иудейгээс, ⁸Иерусалимаас, Идумаас, Иорданы тэртээгээс, Тир болон Сидон хавиас үй олон хүн Есүсийн хийсэн бүхнийг сонсоод Түүн уруу иржээ. ⁹Хурсан олонд бүчүүлэхгүйн тулд завь бэлэн байлгахыг Өөрийн шавь нарт Тэр даалгав. ¹⁰Учир нь Есүс олон хүнийг эдгээсэн тул өвчинд зовж зүдрэгсэд бүгд Түүнд гар хүрэх гэж дайрч байлаа. ¹¹Бузар сүнснүүд Есүсийг харах болгондоо өмнө нь унаж,
-Та бол Бурханы Хүү мөн гэж хашхиралдаж байв. ¹²Өөрийг нь мэдүүлж болохгүйг Тэр тэдэнд хатуу санууллаа.
¹³Есүс уул өөд гарч Өөрийн хүссэн хүмүүсээ дуудахад тэд Түүн уруу ирэв. ¹⁴Есүс арван хоёр хүнийг [элч гэж нэрлэн] томилжээ. Учир нь тэднийг Өөртэйгөө хамт байлгаж, тунхаглуулахаар илгээх, ¹⁵чөтгөрүүдийг зайлуулах эрх мэдэлтэй байлгахын тулд сонгосон юм. ¹⁶[Тэр арван хоёр хүнийг томилсон нь] Симон, (Тэр түүнд Петр гэдэг нэр өгчээ), ¹⁷Зебедеен хүү Иаков, Иаковын дүү Иохан (Тэр тэдэнд “Аянгын хөвгүүд” гэсэн утгатай Бонергес гэдэг нэр өгчээ), ¹⁸Андрей, Филип, Бартоломай, Матай, Томас, Алфайн хүү Иаков, Таддай, Канын Симон, ¹⁹Есүсээс урвасан Искариотын Иудас нар байлаа.
²⁰Есүс гэрт ороход дахиад л бөөн хүн цугларч тэдэнд юм идэх ч завдал өгсөнгүй. ²¹Үүнийг сонсоод хамаатнууд нь Есүсийг авчрахаар явав. Учир нь хүмүүс Түүний тухай
-Тэр Өөрийн ухаан мэдрэлээ алджээ гэж ярьж байлаа. ²²Иерусалимаас ирсэн хуулийн багш нар
-Тэр Беелзебултэй гээд
-Тэр чөтгөрүүдийн захирагчаар чөтгөрүүдийг хөөн зайлуулдаг гэцгээж байлаа. ²³Тэр тэднийг Өөр уруугаа дуудаж сургаалт зүйрлэлээр тэдэнд айлдруун
-Сатан Сатаныгаа яаж хөөн зайлуулж чадах билээ? ²⁴Хэрэв хаанчлал дотроо хуваагдвал, тэр хаанчлал нь оршин тогтнож чадахгүй. ²⁵Хэрэв айл гэр дотроо хуваагдвал, тэр айл гэр оршин тогтнох чадваргүй болно. ²⁶Хэрэв Сатан өөрийн эсрэг босон хуваагдвал, тэр оршин тогтнож чадахгүй, харин эцэс нь ирнэ. ²⁷Хүчтэй эрийг эхлээд хүлж байж л гэрийг нь дээрэмдэнэ үү гэхээс гэрт нь шууд ороод эд хөрөнгийг нь дээрэмдэж чадах хүн байхгүй билээ. ²⁸Үнэнээр Би та нарт хэлье. Хүний хөвгүүдийн бүх нүгэл, тэдний ярьсан доромжлол бүхэн уучлагдана. ²⁹Харин Ариун Сүнсийг доромжлогч хэн ч хэзээ ч уучлагдахгүй бөгөөд мөнх нүглийн гэмтэн болно гэв. ³⁰Учир нь тэд
-Есүс бузар сүнстэй гэж ярьж байсан юм.
³¹Есүсийн эх болон дүү нар нь ирээд гадаа зогсож, Түүнийг дуудуулахаар хүн оруулав. ³²Есүсийг олон хүн тойрон сууж байлаа. Тэд Түүнд
-Хараач. Ээж болон дүү нар тань Таныг хүлээгээд гадаа байж байна гэхэд, ³³Тэр тэдэнд хариулан
-Хэн Миний ээж, [Миний] дүү нар юм бэ? гээд, ³⁴Өөрийг нь хүрээлэн суугчдыг хараад,
-Миний ээж болон Миний дүү нарыг харагтун. ³⁵[Яагаад гэвэл] Бурханы хүслийг биелүүлэгч хэн боловч Миний ээж болон дүү нар минь юм гэж айлдав.