31 ¹Хаан Лемуелийн үгс буюу эх нь түүнд айлдсан сургаал.
²Хүү минь, хэвлийн үр минь, миний амлалтын хүү,
³Эмэгтэй хүний төлөө хүчээ барж үл болно.
Хаадыг сүйтгэгч нарт хүсэл зоригоо эзэмдүүлж үл болно.
⁴Лемуел минь, хаан хүн дарс уух нь зохисгүй зүйл мөн.
Удирдагч хүн сархдыг хүсэн тэмүүлэх нь зохисгүй.
⁵Учир нь тэд ууж согтууран тогтоолыг умартаж,
Зовж зүдэрсэн олны эрх ашгийг уландаа гишгэх вий.
⁶Ядарч туйлдсан хүмүүст сархдыг барь.
Гашуун амьдралтай хүмүүст дарсыг барь.
⁷Тэр ууж, ядуу зүдүү байдлаа мартан,
Зовлон зүдгүүрээ дахиж бүү санаг.
⁸Хэлгүй хүмүүс болон золгүй бүх хүмүүсийн төлөө амаа нээ.
⁹Амаа нээж, зөв шударгаар шүүж,
Ядуус ба гай зовлонд унагсдын эрхийг хамгаал.

¹⁰Хэн арван хуруу тэгш эхнэр олж чадах вэ?
Тийм эхнэр эрдэнэсээс ч үнэтэй.
¹¹Нөхөр нь түүнд бүрэн итгэх бөгөөд юугаар ч үл дутна.
¹²Тэр бүх л амьдралынхаа турш нөхөртөө мууг бус, зөвхөн сайныг л үйлддэг.
¹³Ноос ба маалинган даавууг тэр сонгон авч, гараа хумхилгүй ажилладаг.
¹⁴Худалдаачны хөлөг онгоцнууд мэт тэр хоол хүнсээ хол газраас зөөдөг.
¹⁵Тэр үүр цайхаас өмнө босож, гэр бүлдээ унд цайг бэлтгэж,
Шивэгчин бүсгүйчүүлдээ хийх ёстойг нь хуваарилдаг.
¹⁶Тэр газрыг үзээд, худалдан авч,
Орлогоороо усан үзмийн мод тариалдаг.
¹⁷Тэр ажилдаа хичээнгүй, шаламгай бөгөөд
Түүний гар улам хүчтэй болно.
¹⁸Ажил үйлс нь бүтэмжтэй байгаад тэр урамшина.
Дэнлүү нь шөнөжингөө асдаг.
¹⁹Гартаа ээрүүл барьж, хуруугаараа шаламгай ажиллана.
²⁰Ядуу хүнд гараа сунгадаг.
Гачигдаж дутагдсан хүмүүст тусалдаг.
²¹Цас хаялахад гэр бүлийнхээ төлөө санаа зовох зүйлгүй байдаг.
Учир нь гэрийнхэн нь дулаан хувцсаар хангагдсан билээ.
²²Тэр орондоо бүтээлэг урлаж,
Ёрог даавуун ба нил ягаан өнгөтэй хувцас өмссөн байдаг.
²³Нөхөр нь хотын дааман хаалган дээр нутгийн ахлагч нарын дунд сууж байхдаа хүндлэгддэг.
²⁴Тэр ёрог даавуун дээл хийж, худалддаг бөгөөд
Бөс даавууг худалдаачдад нийлүүлдэг.
²⁵Тэр хүч чадал ба хүндэтгэлээр хувцасласан бөгөөд
Инээмсэглэлээр ирээдүйгээ угтана.
²⁶Тэр мэргэн үгээр ярьж, энэрлийг сургадаг.
²⁷Тэр гэр орондоо санаа тавих бөгөөд залхуурахыг үл мэднэ.
²⁸Үр хүүхдүүд нь өсөж өндийгөөд, түүнийг ерөөнө.
Эр нөхөр нь ч гэсэн түүнийг магтан
²⁹“Олон эмэгтэйчүүд сайн үйл хийдэг ч чи тэднээс илүү билээ” хэмээнэ.
³⁰Дур булаам байдал хуурамч бөгөөд гоо үзэсгэлэн ч хоосон.
Харин ЭЗЭНээс эмээгч эмэгтэй л магтаал авах учиртай.
³¹Ажил үйлсийнх нь үр жимсийг түүнд өг.
Ажил үйлс нь дааман хаалган дээр түүнд хүндэтгэлийг авчрах болтугай.