3 ¹Хүү минь, миний сургаалыг бүү март.
Чи зүрхэндээ тушаалыг минь сахь.
²Учир нь өдрүүдийн хийгээд амьд явах он жилүүдийн урт,
Амар тайвныг тэд чамд нэмэх болно.
³Үнэн ба энэрэл чамайг бүү орхиг.
Эдгээрийг цээжнийхээ самбарт бичиж, хүзүүгээрээ ороо.
⁴Тийнхүү чи Бурханы болоод хүмүүсийн нүдний өмнө таалал хийгээд нэр төрийг олно.
⁵Бүх зүрхээрээ ЭЗЭНд итгэ.
Өөрийн ойлголтод бүү түшиглэ.
⁶Өөрийн бүх замаараа Түүнийг таньж мэд.
Тэр чиний замыг шулуун болгоно.
⁷Өөрийнхөө нүдний өмнө бүү мэргэн бай.
ЭЗЭНээс эмээж, хорон муугаас эргэ.
⁸Энэ нь ясанд чинь шим тэжээл, биенд чинь амин дэм болно.
⁹Бүх бүтээгдэхүүнийхээ дээжээр болон эд хөрөнгөөрөө ЭЗЭНийг дээдэл.
1⁰Тэгвэл агуулах чинь пиг дүүрч,
Торхнууд чинь шинэ дарсаар бялхана.
¹¹Хүү минь, ЭЗЭНий сахилгажуулалтыг бүү дургүйц, зэмлэлийг нь бүү огоор.
¹²Учир нь хүүгээ таалдаг эцэг хүний адил ЭЗЭН хайрладаг хүнээ зэмлэдэг юм шүү.

¹³Мэргэн ухааныг олдог хүн, ухаарал авдаг хүн ерөөлтэй еэ.
¹⁴Учир нь мэргэн ухааны ашиг болбоос цалин цагаан мөнгөний ашигаас ч илүү,
Орлого нь шижир алтныхаас ч илүү.
¹⁵Энэ нь эрдэнэсээс ч илүү нандин, чиний хүсэх ямар ч зүйл түүнтэй зүйрлэшгүй.
¹⁶Түүний баруун гарт нь урт удаан амьдрал залрах агаад зүүн гарт нь алдар суу болон баялаг буй.
¹⁷Мэргэн ухааны зам тааламжит бөгөөд бүх жим нь амар тайван.
¹⁸Түүнээс зуурагсдад тэр нь амийн мод.
Түүнийг тэр даруй барьж авах хүн бүр ерөөлтэй.
¹⁹ЭЗЭН мэргэн ухаанаар газрыг бий болгож,
Оюун ухаанаар тэнгэрийг тогтоожээ.
²⁰Түүний мэдлэгээр гүнүүд нээгдэж, үүлнээс шүүдэр унасан.
²¹Хүү минь, саруул мэргэн ухаан хийгээд хэрсүү ухааныг сахиж,
Энэ бүхнийг нүднээсээ бүү салга.
²²Тийм байх бөгөөс эдгээр нь сэтгэлд чинь амь,
Хүзүүнд чинь гоёл болно.
²³Тэгвэл чи замаараа аюулгүй алхах бөгөөд чиний хөл бүдрэхгүй.
²⁴Чи хэвтэх үедээ ч айж эмээхгүй.
Хэвтэх үедээ ч зүүд нойр чинь сайхан байх болно.
²⁵Гэнэтийн аймшгаас бүү ай.
Хар санааны хор хөнөөл ирэх үед ч бүү ай.
²⁶Учир нь ЭЗЭН чамд эр зориг болох бөгөөд
Хөлийг чинь занганд орохоос хамгаална.

²⁷Хэрэв чиний хүч хүрэх юм бол хүртвэл зохих хүмүүст нь сайныг өгөхөөс бүү татгалз.
²⁸Туслах боломжтой атлаа хөршдөө
“Яваад ир. Маргааш би өгье” гэж бүү хэл.
²⁹Хажууд чинь амгалан амьдрах хөршийнхөө эсрэг хорон мууг бүү сэд.
³⁰Хэрэв хүн чамд хорон мууг учруулаагүй бол шалтгаангүйгээр тэр хүнтэй бүү маргалд.
³¹Хүчирхийлэгч хүнд бүү жөтөөрх.
Тийм хүний аль ч замыг бүү сонго.
³²Учир нь муу зальтай хүн ЭЗЭНий хувьд жигшүүртэй.
Харин Тэр цэх шулуун хүнтэй дотно байдаг юм.
³³ЭЗЭНий хараал хар муу санаатны гэр дээр байна.
Харин Тэр шударга зөв байгчийн орон гэрийг ерөөнө.
³⁴Хэдийгээр Тэр доромжлогч хүмүүсийг тохуурхдаг боловч
Зовж зүдрэгсдэд нигүүлслээ өгдөг.
³⁵Мэргэн хүмүүс сайн нэрийг өвлөдөг бол
Мунхгууд муу нэрээрээ сайрхдаг ажээ.