24 ¹Хорон муу хүмүүст бүү атаарх.
Тэдэнтэй хамт байхыг бүү хүс.
²Учир нь тэд хүчирхийллийг сэддэг бөгөөд
Тэдний уруул нь гай зовлонгийн үгсийг л ярина.

³Гэр орон мэргэн ухаанаар сүндэрлэж, оюун ухаанаар тогтдог.
⁴Мэдлэгийн хүчээр өрөөнүүд чинь эрхэм нандин баялгаар дүүрнэ.

⁵Мэргэн хүн чадалтай.
Ухаантай хүн хүчээ бататгана.
⁶Мэргэн удирдамжийн дагуу чи дайт.
Олон зөвлөгчийн дотор ялалт бий.

⁷Мэргэн ухаан нь мунхагт дэндүү өндөр юм.
Тэрээр хаалганы дэргэд амаа нээхгүй.

⁸Хорон мууг хийхээр төлөвлөдөг нэгнийг хүмүүс хорлогч гэж дуудна.
⁹Мунхаглалыг сэдэх нь нүгэл.
Басамжлагч нэгэнд хүмүүс дургүйцдэг.

¹⁰Хэрэв чи бэрх цагт сул дорой байваас хүч тэнхээ чинь сул аж.

¹¹Үхэлд баригдсан хүмүүсийг авар.
Алагдах газрынхаа зүг гэлдрэх хүмүүсийг буцааж авчир.
¹²“Бид энэ талаар мэдээгүй” гэж чи хэлж байгаа бол
Зүрхийг Дэнслэгч үүнийг анхааралдаа авахгүй гэж үү?
Сүнсийг чинь хамгаалагч энэ бүхнийг мэдэхгүй гэж үү?
Мөн хийсэн үйлийнх нь хариуг Тэр хүмүүнд өгөхгүй гэж үү?

¹³Зөгийн бал ид, учир нь тэр сайн юм.
Сархинагийн бал тун амттай шүү.
¹⁴Мэргэн ухаан нь сэтгэлд чинь үүнтэй адил гэдгийг мэд.
Хэрэв түүнийг олох аваас чамд ирээдүй байгаа бөгөөд
Итгэл найдвар чинь ор тас мартагдахгүй.

¹⁵Хар санаатан чи,
Зөв шударга хүний гэр орны эсрэг санаа өвөрлөөд бүү отож хэвт.
Алжаалаа тайлдаг газрыг нь бүү сүйтгэ.
¹⁶Учир нь зөв шударга хүн долоо бүдрэвч сэхнэ.
Харин хар санаатай хүн гай тохиох цагт нэгмөсөн бүдэрнэ.

¹⁷Чиний дайсан унахад баярлах хэрэггүй.
Бүдрэхэд нь зүрх чинь бүү баярлаг.
¹⁸Эс тэгвээс ЭЗЭН үүнийг хараад, таалахгүй тул,
Дайснаас чинь уур хилэнгээ буцаан авч юу магад.

¹⁹Хорон мууг үйлдэгсдээс болж сэтгэлдээ бүү тавгүйрх.
Хар санаатанд бүү атаарх.
²⁰Учир нь хорон муу хүн ирээдүйгүй.
Хар санаатны дэнлүү бөхнө.

²¹Хүү минь, ЭЗЭНээс болон хаанаас эмээгтүн.
Тэднийг эсэргүүцэгч нартай бүү нийл.
²²Учир нь тэдний гамшгууд гэнэт гарч ирнэ.
Хэн хэнээс нь ирэх эвдрэл сүйрлийг хэн мэдэх билээ?

²³Эдгээр нь ч гэсэн мэргэн хүмүүсийн үгс юм.
Шүүх дээр тал засах нь сайн зүйл биш.
²⁴Хар санаатай хүнд
“Чинийх зөв шударга” гэж хэлэгчийг хүмүүс зүхэх бөгөөд
Улс үндэстнээрээ түүнд зэвүүцнэ.
²⁵Харин хар санаатныг зэмлэгчдэд талархал байх болно.
Тэдний дээр сайн ерөөл оршино.
²⁶Зөв хариулт өгсөн хүн уруул дээр үнсэж буй хэрэг.

²⁷Байшин барихаасаа өмнө гаднах ажлаа цэгцэлж,
Хээр талд буй юмсаа бэлэн болго.

²⁸Шалтгаангүйгээр хөршийнхөө эсрэг гэрчилж болохгүй.
Уруулаараа бүү мэхэл.
²⁹“Тэр надад яаж хандсан шиг би мөн түүнд тэгж хандана.
Тэр шангаа хүртэнэ дээ” гэж бүү хэл.

³⁰Залхуугийн тариан талбай болон ухаангүй хүний усан үзмийн цэцэрлэгийн дэргэдүүр би өнгөрөв.
³¹Тэгтэл бүх талбай нь хогийн ургамалд баригдсан,
Халгайгаар дүүрсэн ба чулуун хашаа нь нурсан байлаа.
³²Би харуутаа л энэ дүр зургийг өөр дээрээ тусгаж үзээд, эндээс сургамж авав.
 ³³“Жаахан унтчихъя.
Жаахан дугхийчихье.
Жаахан гараа хумхин амраадахъя” гэсээр байтал
³⁴ядуурал чинь хулгайч мэт ирж, хүслэн чинь зэвсэглэсэн хүн мэт болох вий.