14 ¹Мэргэн эмэгтэй орон гэрээ төвхнүүлдэг бол
Мунхаг эмэгтэй өөрийн гараар орон гэрээ нураадаг.
²Цэх шулуунаар алхагч нэгэн ЭЗЭНээс эмээдэг.
Харин замаасаа гажигч хүн Түүнийг жигшдэг.
³Мунхгийн аман дотор нуруун дундуур нь татах саваа бий.
Харин мэргэн хүмүүсийн уруул өөрсдийг нь хамгаалдаг.
⁴Шар байхгүй газар тэжээлийн тэвш хоосон.
Гэвч шарын хүчийг ашиглавал орлого нэмэгддэг.
⁵Итгэмжит гэрч худал ярихгүй.
Харин хуурамч гэрч худал үгс урсгана.
⁶Басамжлагч хүн мэргэн ухааныг эрж хайдаг боловч юуг ч олохгүй.
Харин мэдлэг нь гярхай нэгэнд хялбар ажгуу.
⁷Мунхаг хүнээс хол бай.
Эс тэгвэл чи мэдлэгийн үгсийг олж эс чадна.
⁸Хэрсүү хүний мэргэн ухаан болбоос өөрийнхөө замыг ойлгох явдал мөн.
Харин мунхаг хүмүүсийн мунхаглал болбоос заль мэх юм.
⁹Мунхгууд нүглийг басамжилдаг.
Харин цэх шулуун хүмүүсийн дунд сайн санаа бий.
¹⁰Зүрх бүр өөр өөрийн зовлонг мэднэ.
Гаднын хүн баяр баясгаланг нь үл хуваалцана.
¹¹Хар санаатай хүний байшин нурж,
Цэх шулуун хүний овоохой сүндэрлэнэ.
¹²Хүнд зөв мэт санагдавч төгсгөл нь үхэл уруу хөтөлдөг зам байдаг.
¹³Инээгчийн доторх зүрх өвдсөн ч байж болох юм.
Хөөр баяслын төгсгөл нь уй гашуу ч байж болно.
¹⁴Замаасаа гажигч хүн хийсэн үйлийнхээ үр жимсээр дүүрнэ.
Харин сайн хүн өөрийн хийсэн үйлсдээ сэтгэл ханах болно.
¹⁵Гэнэн хүн юм бүгдэд итгэдэг.
Харин хэрсүү хүн өөрийн алхмууддаа хянамгай ханддаг.
¹⁶Мэргэн хүн болгоомжилдог ба хорон муугаас зайлдаг.
Харин мунхаг хүн омог бардам ба болгоомжгүй байдаг.
¹⁷Түргэн зантай хүн мунхаг үйлийг үйлддэг.
Хорон мууг сэдэгч хүн үзэн ядагддаг.
¹⁸Гэнэн нэгэн мунхаг явдлыг өвлөдөг бол
Хэрсүү нэгэн мэдлэгээр шагнагдана.
¹⁹Хорон муу нь сайны өмнө сөгдөж,
Хар санаатан шударга зөв хүний хаалганы өмнө сөхрөх болно.
²⁰Ядуу хүнээс хөрш нь хүртэл зугтдаг бол
Баян хүнд олон найз нөхөд байдаг.
²¹Хөршөө гадуурхагч нь нүгэл үйлдэж буй хэрэг.
Харин ядуу хүнд нигүүлсэнгүй хандагч хүн ерөөлтэй.
²²Хорон мууг сэдэгч нар төөрөлдөхгүй гэж үү?
Харин сайныг сэдэгч нарт үнэн ба энэрэл байх болно.
²³Хөдөлмөр бүхэн ашиг авчирна.
Харин дэмий хоосон яриа ядууралд л хүргэнэ.
²⁴Мэргэн хүмүүсийн титэм нь тэдний баялаг бол
Мунхгуудын мунхаг явдал тэдний мунхаглал юм.
²⁵Үнэнч гэрч амийг авардаг.
Харин худлыг урсгадаг хүн мэхэлдэг.
²⁶ЭЗЭНээс эмээхүйд бат итгэл бий бөгөөд
Тэрээр Өөрийн хүүхдүүдэд хоргодох газар болдог.
²⁷ЭЗЭНээс эмээхүй нь амийн ундарга болой.
Энэхүү эх булаг нь үхлийн зангыг зайлуулах боломжтой.
²⁸Түмэн олон нь хааны сүр хүч бол
Цөөн ардууд нь ноёны мөхөс байдал юм.
²⁹Уурлахдаа удаан хүн маш их ухаантай.
Түргэн зантай хүн мунхаг явдлыг өргөдөг.
³⁰Амар тайван зүрх бие махбодод амийг өгдөг бол
Хүсэл тачаал ясан дахь идээ бээр юм.
³¹Ядуу хүнийг дарладаг нэгэн Бүтээгчийг нь буруутгаж буй хэрэг.
Харин үгээгүй хүнд нинжин сэтгэл гаргагч Бүтээгчийг нь хүндэтгэж буй хэрэг юм.
³²Хорон санаатан муу үйлийнхээ төлөө хөсөр хаягдах бол
Шударга зөв хүн үхсэн ч хоргодох газартай.
³³Мэргэн ухаан гярхай хүний зүрхэнд оршдог бөгөөд
Мунхгуудын дундаас ч тэнэгүүдэд өөрийгөө мэдүүлдэг.
³⁴Зөв шударга байдал улс үндэстнийг алдаршуулна.
Харин нүгэл хилэнц ард түмнийг гутаана.
³⁵Хааны таалал мэргэн зарцад хүртээгддэг бол
Уур хилэн нь хааны нэрийг хугалагчид оногдоно.