30 ¹Иакены хөвгүүн Агурын айлдсан үгс буюу эш үзүүллэг.
Тэрээр эдгээрийг Итиел ба Укалд уламжилжээ.
²Хүмүүнээс хамгийн мунхаг нь гэвэл би л байж таарна.
Хүний ухаан надад байхгүй.
³Би мэргэн ухаанд ч суралцсангүй.
Ариун Нэгэний тухай мэдлэг ч надад алга.
⁴Хэн тэнгэр өөд одоод бууж ирэв ээ?
Хэн салхийг гартаа атгаж байв аа?
Хэн усыг дээлэндээ ороож чадав аа?
Хэн дэлхийн хамаг хязгаарыг бүтээв ээ?
Түүний нэр болон Хүүгийнх нь нэр хэн бэ?
Та мэдэх үү?

⁵Бурханы үг бүр соригдсон.
Тэрээр Өөрийнх нь дотор хоргодогсдод бамбай юм.
⁶Түүний үгэн дээр бүү нэм.
Тэгвээс Тэр чамайг буруутгаж, чи худалч болох вий.

⁷Хоёр зүйлийг би Танаас гуйж байна.
Намайг амьд сэрүүн байх зуур надад бүү татгалзаарай.
⁸Заль мэх болон худлыг надаас хол байлгаач.
Намайг хоосон ядуу ч бус, баян тарган ч бус байлгаач.
Надад оногдох хувь болох хүнсийг өгч хайрлаач.
⁹Учир нь би оногдох ёстойгоосоо илүүг хүртэж,
“ЭЗЭН гэж хэн юм бэ?” гээд,
Танаас няцаж буцахгүй байхын тулд,
Эсвэл ядууран, хулгай хийж,
Бурханыхаа нэрийг бузарлахгүй байхын тулд билээ.

¹⁰Эзнийх нь нүүрэн дээр зарцыг нь бүү гүтгэ.
Тэгвээс эзэн нь чамайг хараан зүхэж, чи буруутан болох вий.

¹¹Эцгийгээ зүхэж, эхийгээ үл ерөөдөг хүмүүс байдаг.
¹²Өөрийнхөө нүдэнд цэвэр хэмээдэг атлаа
Хир буртгаасаа цэвэрлэгдээгүй хүмүүс ч бас бий.
¹³Басамжилсан нүдтэй ба дээгүүр харцтай ч нэгэн бий.
¹⁴Газар дээрээс зовж шаналагсдыг,
Хүмүүсийн дундаас ядуусыг залгихаар шүд нь илд шиг агаад
Эрүүнүүдэд нь хутга шиг шүдтэй хүн ч бий.

¹⁵Шуналын тулам хоёр охинтой бөгөөд
Тэд байнга л “Өг, Өг” гэцгээдэг.
Ханаж цаддаггүй гурван зүйл
“Одоо боллоо” гэж хэлдэггүй дөрөв дэх зүйл бий.
¹⁶Эдгээр нь
Үхэгсдийн орон,
Үр хүүхэдгүй хэвлий,
Ус ууж ханадаггүй газар хийгээд
“Одоо болсон” хэмээн хэлдэггүй гал зэрэг юм.
¹⁷Эцгийгээ басамжилж,
Эхдээ зэвүүцэгчийн нүдийг хон хэрээ тоншиж, тас шувуу иднэ.

¹⁸Миний хувьд ухааршгүй гайхамшигтай гурван зүйл байна.
Дөрөв дэхийг нь бүр ч ойлгохгүй юм.
¹⁹Эдгээр нь
Тэнгэрт халин нисэх бүргэдийн зам,
Хадан дээгүүр мурилзах могойн зам,
Тэнгисийн дунд хөвөх хөлөг онгоцны зам,
Бүсгүй хүнтэй ханилсан эрийн хувь тавилан болой.
²⁰Садар самуун эмийн зам нь гэвээс тэр идэж,
Амаа арчаад “Би ямар ч буруугүй” гэдэг.

²¹Гурван зүйлийн дор дэлхий чичирч,
Дөрөв дэхийг нь даадаггүй.
²²Эдгээр нь
Хаан ширээнд заларсан зарц,
Хоолоор хангалуун мунхаг,
²³Хайр сэтгэлгүйгээр нөхөрт гарсан ба
Эзэгтэйнхээ оронд эзэгтэй болох шивэгчин зэрэг ажгуу.

²⁴Дэлхий дээр өчүүхэн атлаа үнэнхүү мэргэн дөрвөн зүйл бий.
²⁵Шоргоолж бол том амьтан биш ч гэсэн зуны турш хоол хүнсээ базаана.
²⁶Дорго бол хүчтэй амьтан биш ч гэсэн хад чулуун дотор үүрээ засна.
²⁷Царцаанд хаан байхгүй ч тэд бүгд дэг журамтай.
²⁸Гүрвэлийг гараараа барьж чадах ч тэр нь хааны ордонд байх ажээ.

²⁹Алхах гишгэхдээ сүрлэг гурав буюу бүр дөрөв бий.
³⁰Хэний ч өмнөөс ухардаггүй араатны дунд хүчирхэг арслан,
³¹Азарган тахиа, ухна ба дайчин баатруудтайгаа хамт буй хаан болой.

³²Өөрийгөө өргөмжилж мунхаг зан гаргасан, эсвэл хорон мууг сэдсэн бол гараа аман дээрээ тавь.
³³Сүүнээс цөцгий, дараа нь цөцгийн тос ялгардаг.
Хамар дундуур дэлсвээс цус гоожно.
Түүнчлэн уурандаа автах явдал эвдрэлцлийг бий болгодог.