15 ¹Иудагийн хөвгүүдийн овгийн ургуудынх нь дагуу хуваарилан өгсөн газар нь Едомын хил хязгаар хүртэл үргэлжилж, өмнөд хязгаарт Зиний цөл газар хүртэл хүрч байв. ²Тэдний өмнөд хил нь Давст тэнгисийн доод зах буюу өмнө зүг уруу эргэх тохойноос эхэлж байв. ³Дараа нь тэр өмнө зүг Акраббим уруу өгсөн Зиний дагуу үргэлжлэн, улмаар Кадеш-барнеагийн өмнүүр өгсөөд, Хезроныг өнгөрөн, Аддар уруу өгсөн гарч, Карка уруу эргэсэн байлаа. ⁴Эндээс энэ нь Азмоныг хүртэл үргэлжлэн, Египетийн хил дагуух голыг даган явж, төгсгөл нь газар дундын тэнгис болов. Энэ нь та нарын умард хил байх болно. ⁵Мөн дорнод хил нь Давст тэнгис, Иорданы цутгалан хүртэл байлаа. Хойд талын хил нь Иорданы цутгалан дахь тэнгисийн тохойноос эхэлж байв. ⁶Эндээс уг хил Бет-хогла уруу өгсөж, Бетарабагийн хойгуур үргэлжлэн, Реубений хүү Боханы хад хүртэл өгсөв. ⁷Ингээд цааш Ахорын хөндийгөөс Дебир уруу өгсөж, хөндийн өмнөд хэсэгт орших Адуммимын хөтлийн эсрэг талд байх Гилгалын зүг хойшоо эргэж, Еншемешийн ус хүртэл үргэлжлэн, Ен-рогелд хүрээд дуусаж байв. ⁸Эндээс уг хил дэх Бен-хинномын хөндийгөөр өгсөж, өмнөд зүгт иебусчуудын бэл уруу (энэ нь Иерусалим юм) хүрч, тэндээсээ тэр нь Рефаимын хөндийн хойд зах дахь, Хинномын хөндийн баруунтайд орших уулын оройг хүртэл өгсдөг аж. ⁹Тэр уулын оройгоос хил нь Нефтоагийн усны эх булаг уруу мушгирч, Ефрон уулын хотуудыг хүртэл үргэлжилсэн ба Баала уруу (энэ нь Кириат-иеарим юм) эргэв. ¹⁰Тэгээд уг хил Баалагаас баруун зүгт Сеир уул уруу эргэж, Иеарим уулын (энэ нь Хесалон юм) хойд хормойн дагуу үргэлжлээд, Бет-шемеш уруу уруудан, Тимнад хүрнэ. ¹¹Энэ нь Екроны хойд талд хүрнэ. Дараа нь уг хил Шиккерон уруу чиглэн эргэж, Баала уул уруу үргэлжлээд, Иабнеелд хүрч, төгсгөл нь тэнгис юм. ¹²Мөн баруун хил нь Их тэнгисийн эрэг газарт байлаа. Эдгээр нь Иудагийн хөвгүүдийн ургуудынх нь дагуу эргэн тойрон дахь хил нь билээ.
¹³Ингээд Иошуа ЭЗЭНий тушаасан ёсоор тэр Иефуны хүү Калебт Иудагийн хөвгүүдийн дунд хувийг нь, тухайлбал Кириаф-арбаг (буюу Хеброныг) өглөө. (Арба нь Анакийн өвөг эцэг байжээ.) ¹⁴Калеб тэндээс Анакийн үр удам, Анакийн гурван хүү Шешаи, Ахиман болон Талмаи нарыг хөөн гаргав. ¹⁵Тэгээд тэр тэндээсээ Дебирийн оршин суугчдын эсрэг явлаа. Урьд цагт Дебирийн нэр нь Кириат-сефер байв. ¹⁶Ингээд Калеб “Кириат-сеферийг довтлон эзэлсэн хүнд би өөрийн охин Ахсаг эхнэр болгон өгнө” гэлээ. ¹⁷Калебын дүү Кеназын хүү Отниел түүнийг эзэлсэнд, тэр түүнд өөрийн охин Ахсаг эхнэр болгон өгөв. ¹⁸Тэгээд Ахсаг Отниел дээр ирэхэд, тэр түүнийг эцгээсээ эдлэн газар гуйхыг ятгав. Түүнийг илжигнээс буухад Калеб
-Чамд юу хэрэгтэй вэ? гэхэд нь ¹⁹Ахса
-Намайг ерөөгөөч. Та надад нэгэнт Негев дэх хуурай газрыг өгсөн тул усны эх булгийг ч мөн өгөөч гэлээ. Ийнхүү Калеб түүнд дээд болон доод эх булгуудыг өгөв.
²⁰Иудагийн хөвгүүдийн овгийн ургуудынх нь дагуу өв нь энэ билээ.
²¹Негев дэх Едомын хилийг чиглэсэн Иудагийн овгийн хамгийн захын хотууд гэвэл Кабзеел, Едер, ба Иагур, ²²Кина, Димона, Адада, ²³Кедеш, Хазор ба Итнан, ²⁴Зиф, Телем ба Беалот, ²⁵Хазор-хадатта, Кериот-хезрон (энэ нь Хазор юм), ²⁶Амам, Шема ба Молада, ²⁷Хазар-гадда, Хешмон ба Бет-пелет, ²⁸Хазар-шуал, Беершеба ба Бизиотиа, ²⁹Баала, Иим ба Езем, ³⁰Елтолад, Хесил ба Хорма, ³¹Зиклаг, Мадманна ба Сансанна, ³²Лебаот, Шилхим, Аин ба Риммон зэрэг бүгд хорин есөн хот, тосгодынхоо хамт байлаа.
³³Бэл газарт Ештаол, Зора ба Ашна, ³⁴Заноа, Ен-ганним, Таппуа ба Енам, ³⁵Иармут, Адуллам, Соко ба Азека, ³⁶Шаараим, Адитаим, Гедера болон Гедеротаим зэрэг арван дөрвөн хот нь тосгодынхоо хамт,
³⁷Зенан, Хадаша, Мигдал-гад, ³⁸Дилеан, Мизпе ба Иоктеел, ³⁹Лахиш, Бозкат ба Еглон, ⁴⁰Каббон, Лахмас ба Хитлиш, ⁴¹Гедерот, Бет-дагон, Наама ба Маккеда зэрэг арван зургаан хот нь тосгодынхоо хамт,
⁴²Либна, Етер ба Ашан, ⁴³Ифта, Ашна ба Незиб, ⁴⁴Кеила, Ахзиб ба Мареша зэрэг есөн хот нь тосгодынхоо хамт,
⁴⁵Екрон орчин тойрныхоо суурин ба тосгодынхоо хамт, ⁴⁶Екроноос далай хүртэл, Ашдодын орчмын бүх хот нь тосгодынхоо хамт
⁴⁷Ашдод болон түүний эргэн тойрны суурин ба тосгод, Газ болон түүний суурин ба тосгод, Египетийн хил дагуух гол ба Их тэнгисийн эрэг газар хүртэл багтаж байв.
⁴⁸Уулархаг нутагт Шамир, Иаттир ба Соко, ⁴⁹Данна, Кириат-санна (энэ нь Дебир юм) ⁵⁰Анаб, Ештемо ба Аним, ⁵¹Гошен, Холон ба Гило зэрэг арван нэгэн хот нь тосгодынхоо хамт,
⁵²Араб, Дума ба Ешан, ⁵³Ианум, Бет-таппуа ба Афека, ⁵⁴Хумта, Кириат-арба (энэ нь Хеброн юм) ба Зиор зэрэг есөн хот нь тосгодынхоо хамт,
⁵⁵Маон, Кармел, Зиф ба Иутта, ⁵⁶Иезреел, Иокдеам ба Заноа, ⁵⁷Каин, Гибеа ба Тимна зэрэг арван хот нь тосгодынхоо хамт,
⁵⁸Халхул, Бет-зур ба Гедор, ⁵⁹Маарат, Бет-анот ба Елтекон зэрэг зургаан хот нь тосгодынхоо хамт,
⁶⁰Кириат-баал (энэ нь Кириат-иеарим юм) ба Рабба гэсэн хоёр хот нь тосгодынхоо хамт,
⁶¹Цөл газарт Бет-араба, Миддин, Секака, ⁶²Нибшан, Давст хот ба Енгеди зэрэг зургаан хот нь тосгодынхоо хамт байв.
⁶³Гэвч Иудагийн хөвгүүд Иерусалимд оршин сууж байсан иебусчуудыг хөөн гаргаж чадаагүй бөгөөд тийнхүү иебусчууд Иудагийн хөвгүүдтэй хамт Иерусалимд өнөөг хүртэл амьдарч байна.