7 ¹Үнэт сайн тосноос сайн нэр нь дээр,
Төрөх өдрөөс үхэх өдөр нь дээр буюу.
²Найрын өргөө уруу явснаас гашуудагчийн оромж уруу очсон нь дээр.
Учир нь энэ бол хүн бүрийн төгсгөл бөгөөд
Амьд байгсад нь үүнийг зүрхэндээ авдаг юм.
³Инээснээс уйлсан нь дээр.
Учир нь царай нь гунигтай байвч,
Зүрх нь жаргалтай байж болох буюу.
⁴Ухаантны зүрх гашуудагсдын оромжинд,
Тэнэгийн зүрх зугаацагчдын гэрт байх аж.
⁵Тэнэгийн дуулахыг сонссоноос
Ухаант хүний зэмлэлийг сонсох нь дээр.
⁶Тэнэгийн инээх нь тогоон доорх гишүү шажигнахын адил бөгөөд
Энэ нь бас л утгагүй.
⁷Хавчлага дарамт нь мэргэдийг солиоруулах бөгөөд
Алив хахууль нь сэтгэлийг эвддэг ажээ.
⁸Хэргийн төгсгөл нь эхлэлээсээ чухал аж.
Сэтгэлийн тэвчээр нь зүрхний бардамналаас эрхэм буюу.
⁹Уур тэнэгийн цээжинд оршдог учраас
Уурлах сэтгэлийг бүү урьтал болго.
¹⁰“Яагаад урьдын өдрүүд өнөөгийнхөөс дээр байсан юм бэ?” гэж бүү хэл.
Ингэж асуух нь цэцэн ухааных биш.
¹¹Өвлөгддөг мэргэн ухаан нь эрхэм бөгөөд
Нарыг харагчдад үнэтэй буюу.
¹²Мөнгө бол хамгаалалт адил, мэргэн ухаан ч хамгаалалт юм.
Харин мэдлэгийн давуу чанар гэвээс мэргэн ухаан эзэндээ амийг өгдөг болой.
¹³Бурханы ажлыг эргэцүүлэгтүн.
Түүний муруйлгасныг хэн шулуун болгох чадалтай билээ.
¹⁴Азтай өдрүүддээ аз жаргалтай бай,
Харин бүтэлгүй өдрүүддээ сэтгэн бод.
Аль алийг нь Бурхан бий болгодог тул үгүйсгэх нь хүний хэрэг биш ажээ.
¹⁵Би утгагүй амьдралынхаа туршид юм бүрийг л үзэв. Зөв хүн шударга байдал дотроо үхэж байхад, бузар хүн худал дотроо удаан амьдрах ажээ. ¹⁶Битгий хэт шударга бай, битгий хэт мэргэн бай. Яагаад чи өөрийгөө хөнөөх ёстой юм бэ? ¹⁷Битгий хэт балмад бай, битгий тэнэг бай. Яагаад чи цагаасаа өмнө үхэх ёстой гэж? ¹⁸Нэгээс нь зуурч, нөгөөг нь тавилгүй байх нь сайн бөгөөд Бурханаас эмээгч нэгэн тэр бүгдийн хамт ирдэг.
¹⁹Мэргэн ухаан ухаантныг хотын арван захирагчаас ч илүү хүчирхэгжүүлдэг. ²⁰Үнэнээр газар дэлхий дээр үйлдээд, нүглийг ер үйлддэггүй зөв шударга хүн гэж үгүй бөлгөө. ²¹Мөн ярианы бүх үгэнд анхаарал хандуулах хэрэггүй, боол чинь чамайг хараах аваас бүү чагна. ²²Үүний адил олон удаа бусдыг харааж байснаа чиний зүрх мэдэх билээ.
²³Энэ бүхнийг би мэргэн ухаанаар шалгаад “Би ухаантай болно” гэсэн боловч, мэргэн ухаан надаас алс хол байлаа. ²⁴Юу байсан нь алс бөгөөд гүнээс гүнд байна. Хэн үүнийг нээж чадах вэ? ²⁵Би өөрийн зүрхийг мэргэн ухаан, гүн ухааныг шинжлэн судлах хийгээд тэнэгийн балмад, солиотны тэнэглэлийн учрыг олоход чиглүүлэв. ²⁶Үхлээс ч илүү гашуун нэг зүйлийг би олж харав. Тэр юу хэмээвээс эм хүний зүрх нь занга, гар нь гинж аж. Бурханд тааламжит нэгэн нь түүнээс зугтах бөгөөд харин нүгэлтэн нь түүнд олзлогдох аж.
²⁷“Үзэгтүн, би үүнийг олж мэдэв” гэж Номлогч хэлэхдээ, тайлбарыг олохын тулд нэг зүйлийг нөгөө дээр нэмэн, ²⁸би үүнийг одоо хүртэл эрсээр байгаа боловч олоогүй. Мянгаас нэг эрэгтэйг л би олсон атал эдгээр бүхний дундаас нэг ч эмэгтэйг олсонгүй. ²⁹Үзэгтүн. Миний олж мэдсэн ганц зүйл нь Бурхан хүмүүнийг шударгаар бүтээсэн боловч тэд өөр олон арга замыг өөрсдөө хайдаг явдал юм.