10 ¹Ах дүү нар аа, миний зүрх сэтгэлийн хүсэл болон тэдний төлөө Бурханд хандах миний залбирал нь тэдний аврал билээ. ²Тэд Бурханы төлөө хичээл зүтгэлтэй боловч, энэ нь мэдлэгийн дагуу биш хэмээн би тэднийг гэрчилдэг. ³Учир нь Бурханы зөвт байдлыг мэдэлгүй, өөрсдийнхийгөө тогтоохыг эрмэлзэн тэд Бурханы зөвт байдалд үл захирагдав. ⁴Учир нь итгэдэг хүн бүрд зөвт байдлын төлөө Христ бол хуулийн төгсгөл мөн. ⁵Учир нь хуулиас ирдэг зөвт байдлыг хэрэгжүүлдэг хүн тэрхүү зөвт байдлаар амьдарна гэж Мосе бичжээ. ⁶Харин итгэлээс ирдэг зөвт байдал нь ийнхүү ярьдаг. “Зүрхэн дотроо “Хэн тэнгэрт гарах вэ?” гэж бүү хэл” (Энэ нь Христийг доош авчрахын тулд юм) ⁷Эсвэл “”Хэн ёроолгүй гүнд буух вэ?” гэж бүү хэл”. (Энэ нь Христийг үхэгсдээс босгохын тулд юм) ⁸Харин энэ нь юу хэлдэг вэ? “Үг нь чамд ойр байна. Чиний аманд, чиний зүрх сэтгэлд бий” гэдэг. Энэ нь бидний тунхаглаж буй итгэлийн үг юм. ⁹Хэрэв та Есүсийг Эзэн гэж амаараа хүлээн зөвшөөрч, Бурхан Түүнийг үхэгсдээс амилуулсан гэдэгт зүрхэндээ итгэвэл, аврагдах болно. ¹⁰Хүн зүрхэндээ итгэн зөвт байдалд хүрч, амаараа хүлээн зөвшөөрөн авралд хүрнэ. ¹¹Учир нь Судар “Түүнд итгэгч нь ичгэвтэр байдалд орохгүй” гэдэг. ¹²Иудей болон грек хүний хооронд ялгаа байхгүй. Бүгдийн Эзэн нэг л бөгөөд Түүнийг дуудагч бүгдэд баялаг бялхана. ¹³Учир нь “Эзэний нэрээр дуудах хэн ч аврагдах болно”. ¹⁴Тэгвэл Түүнд итгээгүй тэд яаж Түүнийг дуудах вэ? Түүнийг сонсоогүй тэд яаж Түүнд итгэх вэ? Тэд номлогчгүйгээр яаж сонсох вэ? ¹⁵Илгээгдэхээс нааш тэд яаж номлох вэ? “Сайн мэдээг тунхаглагчдын хөл юутай сайхан!” гэж бичигдсэн байдаг.
¹⁶Харин тэд сайн мэдээнд итгэсэнгүй. Учир нь Исаиа “Эзэн, бидний мэдээнд хэн итгэсэн бэ?” гэж хэлсэн. ¹⁷Тиймээс итгэл нь сонсохоос, сонсох нь Христийн үгээр ирдэг. ¹⁸Гэвч би хэлье. Тэд хэзээ ч сонсоогүй гэж үү? Үнэндээ тэд сонссон.
“Тэдний дуу хоолой бүх газарт,
Тэдний үгс дэлхийн зах хязгаарт ч хүрсэн” ¹⁹Гэвч би хэлье. Израиль үнэндээ мэдээгүй юу? Эхлээд Мосе
“Би үндэстэн биш хүмүүсээр та нарыг атаархуулж,
ухаангүй үндэстнээр уурлуулна” ²⁰Исаиа зоригтойгоор
“Намайг хайгаагүй хүмүүс Намайг олсон.
Намайг сураглаагүй хүмүүст Би илэрхий болсон” ²¹Харин Израилийн талаар Тэр “Бүхэл өдөржин Би дуулгаваргүй, зөрүүд ард түмэнд гараа сунгасан” гэжээ.