1 ¹Өөрсдийн гэрийнхнийг дагуулж Иаковтай хамт Египетэд очсон Израилийн хөвгүүдийн нэрс гэвэл, ²Реубен, Симеон, Леви ба Иуда, ³Иссахар, Зебулун ба Бениамин, ⁴Дан ба Нафтали, Гад ба Ашер юм. ⁵Иаковын үр удам бүгд далан хүн байв. Харин Иосеф Египетэд байсан. ⁶Иосеф, түүний ах дүү нар болон тэр үеийнхэн бүгд нас барав. ⁷Гэвч Израилийн хөвгүүд өсөн, улам үржиж, олшрон, онцгой хүчтэй болж, тэр газрыг дүүргэв.
⁸Иосефыг мэдэхгүй шинэ хаан Египетэд гарч ирэв. ⁹Тэр өөрийн ард түмэнд
-Үзэгтүн! Израилийн хөвгүүдийн ард түмэн биднээс олон, бас хүчтэй боллоо. ¹⁰Тэдэнд нарийн ухаанаар хандацгаая. Тэгэхгүй бол тэд олон болж, дайн гарах үед биднийг үзэн яддаг хүмүүстэй нийлж, бидний эсрэг байлдаж, энэ газраас гарах болно гэв. ¹¹Тиймээс тэднийг хүнд хүчир ажлаар зовоохын тулд тэдний дээр ажлын дарга нарыг тавив. Тэд Фараонд зориулж Питом болон Раамсес гэдэг агуулах хотуудыг барив. ¹²Гэвч тэднийг хэдий чинээ зовоох тусам тэд төдий чинээ үржиж, улам бүр тархлаа. Тиймээс египетчүүд Израилийн хөвгүүдээс болж айдаст автав. ¹³Египетчүүд Израилийн хөвгүүдийг хүнд хүчир ажилд албадан шахав. ¹⁴Тэдэнд оноосон хүнд хүчир ажлууд болох шавар зуурах, тоосго цохих болон хээрийн янз бүрийн ажлаар египетчүүд тэдний амьдралыг гашуун зовлонтой болгов.
¹⁵Дараа нь Египетийн хаан Шифра ба Пуа гэдэг еврей эх баригчдад
¹⁶-Та нар еврей эмэгтэйчүүдийг эх барих үедээ төрөх сандал дээр тэднийг ажиглаж байгаад хэрэв хүү төрвөл үхүүлж, харин охин төрвөл амьд үлдээ гэв. ¹⁷Харин эх баригчид Бурханаас эмээж, Египетийн хааны тушааснаар хийлгүй, харин хөвгүүдийг амьд үлдээв. ¹⁸Тиймээс Египетийн хаан эх баригчдыг дуудаж, тэдэнд
-Та нар юунд ийм юм хийж хөвгүүдийг амьд үлдээв? гэв. ¹⁹Эх баригчид Фараонд
-Еврей эмэгтэйчүүд египет эмэгтэйчүүдтэй адилгүй юм. Тэд эрүүл чийрэг болохоор эх баригчийг ирэхээс өмнө төрсөн байдаг гэж хариулав. ²⁰Иймээс Бурхан эх баригчдад сайнаар ханджээ. Ард түмэн олширч маш хүчирхэг болов. ²¹Эх баригчид Бурханаас эмээсэн тул Тэр тэдэнд гэр бүл бий болгон өгөв. ²²Тэгэхэд Фараон бүх ард түмэндээ
-Шинээр төрсөн хүү бүрийг та нар Нил мөрөнд хаяж, охин бүрийг амьд үлдээ гэж тушаав.