5 ¹Израилийн гэр ээ, би та нарын төлөө гашуудлын дуу болгон өргөж буй энэ үгийг сонс.
²Онгон Израиль нь унаад, дахин босохгүй.
Тэр өөрийн нутагтаа орхигдсон. Түүнийг өргөх хэн ч алга.
³Учир нь Эзэн БУРХАН ингэж айлдаж байна.
“Израилийн гэрт мянган хүчтэнийг гаргаж байгаа хот нь зуун хүнтэй үлдэнэ.
Мөн зуун хүчтэнийг гаргаж байгаа хот нь арван хүнтэй л үлдэнэ”.
⁴Учир нь ЭЗЭН Израилийн гэрт ийнхүү айлдаж байна.
“Та нар амьдрахын тулд Намайг хай”.
⁵Харин Бетел уруу бүү ханд, Гилгал уруу бүү оч, Беершебаг бүү туулан яв.
Учир нь Гилгал заавал олзлогдон явж, Бетел сүйрэлд учрана”.
⁶Та нар амьдрахын тулд ЭЗЭНийг хай.
Эс тэгвэл Иосефын гэр ээ, Тэр гал мэт гарч, түймэрдэх болно.
Бетелд түүнийг унтраах юу ч алга.
⁷Та нар бол шударга байдлыг агь болгож,
шударга ёсыг доош газар уруу хөөдөг хүмүүс юм”.
⁸Тэр Плеиадесыг, Орионыг бүтээж, гүн харанхуйг өглөөгөөр сольдог.
Мөн өдрийг шөнө болгон харанхуйлуулж, далайн усыг дуудан
газрын гадаргуу дээр асгадаг. Түүний нэр бол ЭЗЭН.
⁹Сүйрэл нь бэхлэлт дээр ирэхийн тулд хүчтэн дээр сүйрлийн хамт урагш цахилагч нь Тэр юм.
¹⁰Дааман хаалган дээр зэмлэдэг хүнийг тэд үзэн яддаг,
шулуунаар ярьдаг хүнийг тэд зэвүүцдэг.
¹¹Тиймээс та нар ядуу хүнд татвар ногдуулж,
тэднээс тарианы алба гувчуур нэхсэн учраас та нар сайн зассан чулуун байшингууд барьсан ч гэсэн тэндээ амьдрахгүй.
Та нар тааламжит усан үзмийн төглүүдийг тарьсан ч гэсэн тэдний дарснаас нь уухгүй.
¹²Учир нь та нарын гэм зөрчил нь их, нүгэл чинь үлэмж гэдгийг Би мэднэ.
Та нар зөв шударга хүнийг зовоож, хахууль авч,
дааман хаалган дээр ядуусыг шоовдорлодог.
¹³Тэгэхээр ийм үед хашир хүмүүс дуугаа хураадаг.
Учир нь энэ бол ёрын цаг.
¹⁴Та нар амьдрахын тулд мууг биш, харин сайныг хай.
Та нарын хэлсэн ёсоор түмэн цэргийн ЭЗЭН Бурхан ийнхүү та нартай хамт байх болтугай.
¹⁵Мууг үзэн яд, сайныг хайрла.
Дааман хаалган дээр шударга ёсыг тогтоо.
Тэгвэл түмэн цэргийн ЭЗЭН Бурхан Иосефын үлдэгсдэд нигүүлсэнгүй хандаж магадгүй.
¹⁶Тэгэхээр түмэн цэргийн ЭЗЭН Бурхан, Эзэн ийнхүү айлдаж байна.
“Талбай бүрд орилох дуу сонсогдож, гудамж бүрд “Аяа, аяа” гэж тэд хэлж байна.
Тэд бас тариачныг гашуудахаар дуудаж, мэргэжлийн гашуудагсдыг эмгэнэлд дуудна.
¹⁷Усан үзмийн цэцэрлэг бүрд орилох дуу гарна.
Учир нь Би та нарын дундуур өнгөрөх болно” гэж ЭЗЭН айлдаж байна.
¹⁸ЭЗЭНий өдрийг хүсэмжлэгч та нар гаслантай яа.
ЭЗЭНий өдөр нь та нарт ямар зорилгоор хэрэгтэй вэ?
Энэ нь гэрэл биш, харанхуй байх болно.
¹⁹Энэ нь хүн арслангаас зугтаад баавгайтай учрах мэт,
эсвэл гэртээ хариад, гараараа хана түшээд могойд хатгуулахтай адил юм.
²⁰ЭЗЭНий өдөр нь гэрлийн оронд харанхуй байх биш үү?
Түүгээр ч барахгүй дотроо ямар ч гэгээгүй түнэр харанхуй байх биш үү?
²¹“Би та нарын найр наадмуудаас татгалзаж, тэднийг үзэн ядаж байна.
Би та нарын ёслолын чуулгануудыг чинь таалахгүй байна.
²²Та нар Надад шатаалт тахилууд,
идээн өргөлүүдийг өргөсөн ч Би хүлээн авахгүй.
Түүгээр ч барахгүй та нарын тарган малын эвийн тахилууд уруу ч харахгүй.
²³Өөрсдийнхөө дуунуудын чимээг Надаас зайлуул.
Би та нарын ятгын эгшгийг ч сонсохгүй.
²⁴Харин шударга ёс нь ус мэт, зөв шударга нь мөнх урсах урсгал мэт хуйлран бууг.
²⁵Израилийн гэр ээ, та нар цөлд дөчин жилийн туршид Надад тахилууд ба идээн өргөлүүдийг өргөн барьсан уу? ²⁶Та нар бас өөрсдөдөө зориулан хийсэн танай хаан Сиккут, өөрсдийн Кийун хөргүүд, өөрсдийн бурхдын одыг авч явсан. ²⁷Тэгэхлээр Би та нарыг Дамаскийн чанадад цөллөгт явуулна” гэж ЭЗЭН айлдаж байна. Түүний нэр бол түмэн цэргийн Бурхан.