3 ¹Израилийн хөвгүүд болох та нарын эсрэг Египетийн нутгаас Түүний авчирсан бүхэл бүтэн гэр бүлийн эсрэг айлдсан ЭЗЭНий энэ үгийг сонс.
²“Газар дэлхийн бүх гэр бүлүүдийн дундаас Би зөвхөн та нарыг сонгосон.
Тиймээс та нарын бүх гэм буруугийн төлөө Би та нарыг шийтгэнэ”.
³Хоёр хүн тохиролцоогүй байж хамт алхах уу?
⁴Арслан ямар ч олзгүй байж ой дотор архирах уу?
Залуу арслан ямар нэгэн юмыг бариагүй болбоос,
нүхэн дотроосоо архирах уу?
⁵Урхинд өгөөш байхгүй бол шувуу нь газарт буй урхинд орох уу?
Юу ч баригдаагүй атал, урхи нь газраас дээш өргөгдөх үү?
⁶Хот дотор бүрээг үлээвээс, хүмүүс чичрэхгүй гэж үү?
Хэрвээ хотод гай гамшиг тохиолдвол үүнийг ЭЗЭН хийсэн биш үү?
⁷Үнэхээр Эзэн БУРХАН зарц нар, эш үзүүлэгчиддээ Өөрийн нууцыг илчлэхээс нааш Тэр юуг ч хийхгүй.
⁸Арслан нь архирчээ!
Хэн үл эмээх вэ?
Эзэн БУРХАН айлджээ!
Хэн эш үзүүлэхгүй байж чадах вэ?
⁹Ашдодын цайзууд ба Египет газар дахь цайзуудад зарлагтун. “Самарийн уулс дээр цуглар. Түүний доторх агуу хөл үймээнийг түүний дунд буй дарлалыг үз. ¹⁰Гэвч тэд зөв юмыг яаж хийхийг мэддэггүй” гэж ЭЗЭН тунхаглаж байна. “Тэд өөрсдийн цайзууддаа хүчирхийлэл болон сүйрлийг нөөцөлжээ”.
¹¹Тэгэхээр Эзэн БУРХАН ийнхүү айлдаж байна.
“Дайсан, энэ нутгийг чинь бүсэлж, та нарын хүчийг сулруулж,
та нарын цайзуудыг тонох болно”.
¹²ЭЗЭН ийнхүү айлдаж байна.
“Хоньчин нь арслангийн амнаас хоёр хөл болон чихний тасархайг булаан авдаг шиг
Самарид оршдог Израилийн хөвгүүдийг орны булантай, хэвтрийн дэвсгэртэй хамт булаан авч одох болно.
¹³Сонсож, Иаковын гэрийн эсрэг гэрчил” гэж Эзэн БУРХАН, түмэн цэргийн Бурхан тунхаглаж байна.
¹⁴“Учир нь Би Израилийн гэм зөрчлийг шийтгэх өдөрт бас Бетелийн тахилын ширээнүүдийг ч шийтгэнэ.
Тахилын ширээний эврүүд таслагдаж газарт унана.
¹⁵Би бас өвлийн байшинг зуны байшинтай хамт цохих болно.
Зааны ясан байшингууд бас сөнөж,
агуу байшингуудыг эцэс болгоно” гэж ЭЗЭН тунхаглаж байна.