5 ¹ЭЗЭН, бидэн дээр юу унасныг санаач.
Харж, бидний зэмлэлийг үзээч!
²Бидний өв харийнхан уруу, гэрүүд маань гаднын хүмүүс уруу эргүүлэн өгөгдөв.
³Бид эцэггүй өнчин болсон бөгөөд эхчүүд маань бэлэвсэн эмэгтэйчүүд мэт байна.
⁴Бид уух усныхаа төлөө хөлс төлж, түлээ маань үнэтэй байна.
⁵Биднийг мөшгөгчид хүзүүнд маань тулаад ирлээ.
Бид эцэж, бидэнд ямар ч амралт алга.
⁶Хангалттай талхыг олохын тулд бид Египет, Ассирид захирагдав.
⁷Бидний эцэг өвгөд нүгэл үйлдсэн агаад тэд одоо байхгүй.
Тэдний гэм бурууг үүрэгчид нь бид юм.
⁸Боолууд биднийг ноёрхож байна.
Тэдний гараас биднийг салгах хэн ч алга.
⁹Цөл дэх илдний улмаас бид амь өрсөн талхаа олж авдаг.
¹⁰Ган гачгийн шатаах халууны улмаас бидний арьс зуух шиг халуун болов.
¹¹Тэд Сионд эмэгтэйчүүдийг, Иудагийн хотуудад онгон охидыг хүчиндэв.
¹²Хан хөвгүүд гараасаа дүүжлэгджээ.
Ахмадууд үл хүндлэгджээ.
¹³Залуу эрэгтэйчүүд тээрэмд ажилласан бөгөөд залуус гуалин модны дор бүдрэв.
¹⁴Ахмадууд дааман хаалгануудаас, залуус хөгжмөөсөө холдов.
¹⁵Бидний зүрхний баяр хөөр зогсов.
Бидний бүжиг уй гашуугаар солигдов.
¹⁶Бидний толгойноос титэм унав.
Бид нүгэл үйлдсэн тул гаслантай яа!
¹⁷Үүний улмаас бидний зүрх доройтон, эдгээр зүйлсийн улмаас бидний нүд сүүмийнэ.
¹⁸Эзгүйрэн хэвтэх Сион уулын улмаас үнэгүүд дээгүүр нь гэтнэ.
¹⁹ЭЗЭН, Та мөнхөд захирдаг.
Таны хаан ширээ үеэс үед оршино.
²⁰Юунд Та биднийг үүрд мартана вэ?
Юунд Та биднийг ийм удаан орхино вэ?
²¹Бид сэргээгдэхийн тулд, ЭЗЭН, биднийг Өөр уруугаа сэргээгээч.
Урьдынх шиг бидний өдрүүдийг шинэчлээч.
²²Эс бөгөөс Та биднээс бүрмөсөн татгалзаж, бидэнд хэтэрхий их уурлах вий.